اكتب سؤالك هنا
gannaty.com/
التواصل الاجتماعي
instagram
/ esraagannaty
twitter
/ lr33mpmybraydk1
facebook
www.facebook.c...
tiktok
/ gannatyesraa77
#اسأل_جنتي
النهاردة ان شاء الله هحكي لكم قصتي مع طنط المستفزة اللي في حياتي. وازاي قررت ان انا اتعامل معها? وفي اخر الفيديو ان شاء الله هقول لكم كلام مهم جدا علماء النفس بيقولوا لنا ازاي نتعامل مع الشخص المستفز
انا اصلا شخصيه انطوائية جدا. دائره معارفي صغيرة. والحقيقة ان انا من صغري ان اي حد بيضايقني بخرجه من حياتي من غير حتى ما افكر. لكن للاسف في ناس ما بتقدرش تعمل معهم كده بسبب صلة الرحم. فانا نصيبي ان في واحدة طنط كبيرة في السن كل ما تشوفني تتعمد ان هي تستفزني
فيه كلمة معينة بتجرحني جدا وهي مصممة ان هي تقولها لي. مهما احاول ابين لها ان الكلمة دي بتضايقني وابين لها كده بحركات وشي ان انا زعلانة او متضايقة. مفيش فايدة. عندها تصميم رهيب ان هي تقول لي الكلمة دي
الحقيقة ان انا كل مرة كنت بنجرح. والحقيقة برضو ان انا كنت دراما كوين. كنت دايما بقى اروح افضل زعلانة ومجروحة كم يوم. ومتأثرة ازاي هي تقولي الكلمة دي
لغاية ما في مرة من المرات كنت عارفة ان انا قريب في تجمع للعيلة ومتأكدة ان انا هشوفها في التجمع ده. فضلت بقى افكر قبلها طيب هتعامل معها ازاي? طبعا هتعمل معايه زي كل مرة. والحقيقة ان انا خطرت على بالي فكرة ان انا ادخل كده واعمل بحث
لاقيت فعلا فيديو بيتكلم على ان اللي بيقول الكلمة دي لحد, فالشخص ده يعتبر خارج عن الملة وكافر ومشرك بالله وكلام بصراحة كان صعب جدا جدا ,انا بقى بصراحة وقتها ما صدقت ان انا لاقيت الفيديو ده
وقررت ان انا هحفظ الفيديو ده عندي وان انا اول ما هروح عندها اول حاجة هعملها ان انا هشغل لها الفيديو واخليها تسمع الكلام الجامد ده. وهي اكيد بعد ما تسمع الكلام ده اكيد مش هتقدر تقولي الكلمة دي مرة تانية
نمت اليوم ده وانا كان عندي تصميم رهيب ان انا فعلا هعمل معها كده. الحقيقة بعد ما عدت الليلة وصحيت تاني يوم وبعد ما كان عندي يقين واصرار اني هعمل كده رجع بقى عندي شك تاني. هل رد الفعل ده هو الصح اللي المفروض يتعمل ولا غلط
الحقيقة ان انا حسيت بحيرة وحسيت ان انا بجد مش عارفة اعمل ايه في الوقت ده. فقررت ان انا ارجع للدين. دخلت بقى المرة دي اعمل بحث. الدين بقى بيقول ايه? والحقيقة ان انا لاقيت ايتين في القرآن الكريم
اول اية بتقول
واعرض عن الجاهلين
والاية التانية بتقول
واذا خاطبهم الجاهلون قالوا سلاما.
و تفسير الايتين بيقول ان مش المفروض ان انا ارد على الانسان الجاهل برد مسيء
وان احسن رد على الكلام المسيء هو الكلام الطيب. او اني اعرض عنهم يعني ان انا اصلا اتجاهلهم. والحقيقة ان انا فعلا قررت ان انا اتجاهلها.
ركزوا بقى معايه في الكلام الجاي المهم ده. بعديها سمعت فيديو لدكتور كان بيقول
لما بتتعامل مع شخص مسيء او مؤذي وبتقرر ان انت ترد عليه بنفس طريقته في الحالة دي ما حدش بيخسر غيرك انت. لان انت نزلتله ملعبه هو شاطر في الحتة دي. الحتة دي بتاعته هو. لكن انت مش زيه. فانت لما تقرر ان انت تبقى زيه انت كده بتأذي نفسك
سمعت كمان دكتورة بتقول ان اصعب احساس الانسان ممكن يحس به هو الشعور بالذنب. فانت لما تقرر ترد الاساءة باساءة زيها انت بعدها هتحس بالذنب والاحساس ده اسوأ احساس ممكن تحس به
ان انا لما فكرت في الكلام ده لاقيت الدكتورة عندها حق مليون في المية. انا فعلا لو كنت عملت كده حقيقي فعلا كنت احس بذنب. وحقيقي الاحساس ده كان هيضايقني وحيجرحني جدا جدا. لان مهما كان هي ست كبيرة واكيد ما ينفعش برضو ان انا اعمل معاها كده
حتى لو كانت هي اللي بدأت. لان انا بتعامل باخلاقي انا مش باخلاقها هي. اخر حاجة هاقولها لكم بقى مهمة جدا جدا. انا ليه اصلا كنت بتعصب وبازعل اوي اوي كده من كلامها? ليه كلامها كان بيجرحني
سمعت دكتور كان بيحكي قصته وكان بيقول ان وهو صغير كان رفيع جدا جدا. فكان دايما يسمع تعليقات من الناس انت قد ايه رفيع انت شبه القلم الرصاص. انت بقى مش ناوي تتخن شوية
ان الكلام فعلا كان بيأذيه وبيجرحه قوي. لان هو من نفسه مكنش متقبل شكله ومكنش متقبل ان هو رفيع قوي كده. الدكتور بيقول لما كبرت شوية في السن وقررت ان انا اتقبل جسمي وقررت كمان ان انا احسن منه. خلاص الكلام مبقاش يجرحني ولا يضايقني
ولو حد كده مر عليه وقال لي انت مثلا رفيع او اي كلام من الكلام ده هضحك معاه واقول له فعلا انا رفيع جدا ومش هزعل ولا اتضايق ابدا. فهو ده اللي بيحصل لنا ساعات عشان في حاجات معينة احنا مش متصالحين فيها مع نفسنا فعشان كده بنحس ان احنا بنزعل ونتضايق
لكن لما تتقبل نفسك زي ما انت وتتصالح مع عيوبك. ما فيش اصلا حد هيقدر ان هو يضايقك ولا يستفزك. اتمنى ان انت فعلا تكون استفدت من الفيديو ان شاء الله. انا كده خلصت اشوفكم على خير. والسلام عليكم ورحمة الله وبركاته
6 сен 2024
