السلم القديم 🔥
قصيدة مهداة الى
اللواء عصام بن نايف بن عصام
كلمات الشاعر سليمان بن ساقه
اداء المنشد خالد ال بريك
كلمات العمل
البارحه ماذعذع الغربي ولا هب النسيم
واول هدايا الشبط للسمار ليل سرمدي
.
واليوم اشوف الشمس فـ اخرها مثل سلك البريم
خايف يعود ليلي البارح واطاوله وحدي
.
فك الشراع وولم الفنجال الاشقر ياسليم
واشعم لنا من طارف اللي حاطبينه فالبدي
.
اقصر من رقاب الحشو واطول من رقاب النعيم
ومن اليباس تقول ماندا بها عرق ندي
.
واجلس على جال الدلال الصفر لو انك غشيم
انت اجودين مادرا ان الوقت ماهو بجودي
.
عطني علوم اللي مربع فى سماح وفى كريم
وعطني علوم اللي شعب ذوده ويممها جدي
.
والا علومك يوم مريت المدينه والقصيم
اتحدك الحاجه وقل الحال وتروح محدي
.
انا ادري انك فى محلي لا انت ضيف ولا مقيم
الرزق جابك من بلادك لين حطك فبلدي
.
سولف عسى صوتك يبدد وحشة الليل البهيم
ماغير انا وياك غربٍ من شعيب الاجردي
.
واحذر تقول الناس عندي كلبوها سيم سيم
ان قلتها قضبتك خطوط البراح الجرهدي
.
والله يالولا الطيبين اللي على السلم القديم
ضاعت حقوق الناس بين الفهلوي والهربدي
.
ولولا مواقيف الرجال من الوجع مات السقيم
اللي يقول الظاهر اني ما اتعدي مرقدي
.
الطيبين اوجيههم تَقرع غريم من غريم
اترد رداد البرا ….. وترد كيد المعتدي
.
اوجيههم عند القبايل شانها شان عظيم
لو كان وجه مخلص الدعوى كبر راحة يدي
.
روس الرجال ان ماغدت فوق البسيطه ضل غيم
صارت مصابيحن بها الغادي يدل ويقتدي
.
انا عرفت من العبر مالله بمضمونه عليم
علم تعلمته وانا بكره بعلمه ولدي
.
مااشين من الحاجه ليابانت على وجه الكريم
الا ليامن بانت النعمه على وجه الردي
.
اليا نصاك المنهك اللي صارت ضلوعه هشيم
قله مدامك جيت ماني ذاخرٍ عنك جهدي
.
ولاتقول انطح لهيب النار وانفخ ياشريم
اشريم لو له برطمٍ ينفعه ماجاك يعدي
.
وانا لواني ما امدح الممدوح واذم الذميم
عزالله اني ظالم حرف القصيد الابجدي
.
يا اعصام ابن نايف عليك من المدايح رش ديم
انت ابلج عند العرب ممدوح قبلي وبعدي
.
امجمل العجمان يابن اعصام يالقرم الحشيم
وانا لو اني عسكري … ماصار غيرك سيدي
.
من جاك متضايق عتق لو كان ماهو من عجيم
واتقول للضيقه تعدي عن زبيني وابعدي
.
يفداك من عاقب بني عمه بمعروف يتيم
علم به محمد وعبدالله وهادي ومهدي
يشهد لك اللي عايشن ليله وصبحه فى جحيم
والمكتب اللي غاديٍ مثل البساط الاحمدي
.
اليا نصاك اللي مدا شوفه مثل ريش الظليم
تفزع معه فزعة ( ولد شيخ الجحادر ) لسعدي
.
ربعك محافيظن تعوذ منهم ابليس الرجيم
فى ساعة ماطاعوا الغادين شور المهتدي
.
ربعك هل الجمع الزرين اللي يجلون الخصيم
اللي بحد اسيوفهم ليل الثكالا يبتدى
.
وانا من اللي ضرب اياديهم يوقع فالصميم
امزبين المجرم اللي ماغفر جرمه فدي
.
ادعي لهم فى كل حجه بين زمزم والحطيم
واظن انا اردى واحدٍ فيهم .. وانا ماني ردي
..
للتواصل والاستفسارات :
الحسابات الرسمية لـ منصة بصمة الابداع .
Official Whatsapp :
الرابط محادثة الواتساب المباشر :
wa.me/message/...
+966562778026
Official Snapchat :
/ a_thane2
Official Twitter :
/ a_thane2
Official Instagram :
/ a_thane2
ـــــــــــــــــــ
15 сен 2024
