الشاعر محمد الوسمي رثاء الأم (دخان العرب) 

‪@Mohamaed_alwasmi‬
القصيدة كتابة
(دخان العرب)
صبروني وگالو اسكت مرت ابوك
وصدگ هذا الصدگ بس ما صدگت
لو تردلي امي وتفقدين الحياة
چان هم مرتين بيچ اتيتمت
هية رجفة وخصلن ادموعي عليچ
مثل الاتراب بعبايه وتنكت
چنت احسن مالي قيمة
ومن شوفت روحي بعيونچ ..صاحبت
عايفتني للمذله للأذيه للتعب؟
ضحكة الشامت رخيصة
حتى لو سنة ذهب
يالدللولچ موسيقى
حضن مرجوحة بحديقة
شلون لو كل يوم اذكرچ
انه يوم الما اذكرچ ابچي ساعة بالدقيقه
صاير مسودن وراچ
وكل طفل بعدوني عنه مثل علاگة دواچ
ويسألوني شلون تشتاگ لحضنها الما حضنته
جاوبتهم غزر ابروحي الحليب الما رضعته
وجفنچ الناعس ييمه وگفت بعيني گعدته
دافية امعزبه وحنينه
ويطلع امعطر الياكل يمنه طب
بعد يا ضيف اليجينه وشال دخان العرب
الوحدي ابچي الوحدي ازور
الوحدي اعبر ع الغظب
الطيور اسراب تمشي ..والنسر
الوحده يوگف ع الگبب
انت شجرتنه الچبيرة وبعد مو مال ابني عش
على ارويسات الگصب
محمد الوسمي