المرحوم محمد الغريب ها كضت 

ها گضت ها لا بعدها
ها گضينه ها بعد بينه نفس
ها لگينه عيونه وها ما لگينه
هانسينه الشوف ها بان الخرس
ياهم احنه منين اجينه
ليا نهايه احنه بتدينه
تضيع بين اشفافنه حروف السؤال
وتهنه وسط بيوت اهلنا ولاتصح چلمه تعال
وصاحت الوادم علينه مسودنين وشگگينه اثيابنه
وصاحت الوادم ددلو التايهين وتيهينه ابوابنه
مسودنين...
مسودنين وتايهين
لا اخذنه الكاس قبله ولا توضينه اعله دين
وصار سكر البينه دهنه لاهو ماي ولاهو طين
مسودنين...
نبچي ماندري عليمن
نضحك وما ندري ليش
وما درينه انبعنه يمته ومادرينه انبعنه بيش
وكبرت الفشله بسواد عيونه
ونده الجبين
مسودنين ...
وصاحت علينه الشوارع لاتجون
وصاحت الوادم ابد مايستحون مسودنين
تعرف الوادم حچينه بس تسد اسماعها
واحنه محد يشترينه وتركض اعله الباعها
لا حچينه بالف شفه
ولا لبسنه اهدوم ترفه
ولا گدرنه انعيش يوم ملونين
وباعنه المامشترينه
وصاحت الوادم علينه مسودنين
شــ محمد الغريب (رحمه ورحمنا وتجاوز عنه وعنا)