علاش رميتي قاع هذا الما 😢😢😢؟؟ تبذير كبييير ...حجريه و استعمليه سيقي بيه بالكو و لا حوش و لا دروج ولا المرحاض اعزك الله و لا سقي به يلا عندك غرس ..حرام ترمي كل هذيك المياه كاين ناس مشتاقين قطرة ماء 😢😢😢
💕حكاية اليوم هذا زهري وهذا زهرك💕 🎀 يحكيو على زوج بنات ملاح..باباهم يخدم فلاح..وامهم تخدم طواجن كبار وصحاح..ماكسابو من الظناية غير هادوك لبناويت ..ومن الرزق غير جنان وبيت ...وبقرة وعجلة مربوطة بالخيط...الطفلة لكبيرة بيرها غامقة ..والصغيرة فالشغل غارقة ..كانت الطفلة الصغيرة طيبة ..والطيب يحسبوه بهلول ..مايعرف مايقول وخيار لقول ثبات لعقول ..لكبيرة سميتها أم هاني والصغيرة أم كلتوم..لي تصبح على شغل الدار وأم هاني غارقة فالنوم..وكانت تتمشى بالحيلة دوم...كانت ماتلبس مليح ولا تقد لروحها..حتى لي يشوفها يعوفها ..حالتها حالة .والناس تقول من خدمة الدار مالقات لروحها دالة...عكس اختها..لعوينة مكحلتها واليد محنيتها ..والضفيرة حبل ملويتها...ومن شغل ولا حاجة مخليتها .ولين يطيح الليل ترقد بالخف حليلتها..والناس تقول متهلية في روحيتها ولا في حد جايبتها.. كانت ام هاني تمشي بالحيلة ولمعاني ...اختها تنحي لحليب وهي للآنية تجيب ..اختها تمخض بالجهد وهي تنحي الزبدة كي توجد...اختها تبشم الصوف وتغزل ..وهي للكبة تعدل ...ويعجبك الخطابة رايحة جاية عليها وهي تشرط وتتمشرط..وراقدة فالخط ..في يوم كانت ام كلتوم .. طفي فالحموم..تشوف بنية زينة ومضوية كي لقمرولا اكثر شوية ...خارجة بالتخبية تشوف حبيبها فالثنية ..واستغربت كلتوم صنايع اختها ..وقررت باه تخبر أمها ..لكن استنات تشوف لحكاية وين تبات ...لغدوى جوها من بوها يخطبوها ....وبالفعل فرحو بيهم ومدوها ....وبشطارتها وفحوليتها حكاو ...بالعزة والجلالة جاو ..وفالشروطات فتاو ...ووزنوها بالذهب ولعقيق وماخلاو ...وام كلتوم تخزر بالعين ...مالقات ماتقول غير مبروك وأمين....وصدق لمثل لي قال مولات الشرابل شبعت ومولات الشناشن شنعت ...ايا وشفقت على اختها وقررت تديها لسلفها...وصرات واداها ..ولي دراتو في دارهم كملاتو معاها ....في يوم قالولهم ازواجهم نحبو تخدمولنا حبل لا يتقطع ولا يتحل ...وبدات كلتوم تضفر وتشد .حبل يكركر جمل ..واختها تضفر وتحط ..حبل يلعب بيه القط....دخلو الرجالة ..الاول قال واش هذا لحبال للمشنقة فال ...ولاخر قال ماضله عروي لبيدون الماء نشرب ونروي...ايا بكات كلتوم ...وقالت ماتفراش اليوم ..قلبي ماهناني... لازم ..نعرف سر أم هاني .وراحت لاختها وبالمشكلة خبرتها....قاتلها ام هاني رجلي ورجلك للغابة ...وقت مرواح الحطابة ...وبالصوت نعيطو....لزهرنا ونصبرو...ومشاو..وفوق تلة عيطو واستناو ..شوي هكا وتخرج كلبة بيضا محنية جبهتها.....تلعب مع أم هاني هي تجري والكلبة سابقتها....تتلاح عليها وتلحس في يديها .. وخرجت كلبة كحلة نيابها سبقو لسانها تتلاح على ام كلتوم تفكلها حزامها..هي تجري والكلبة تغير عليها ....فلرض طيحتها وبالتراب مرمدتها ...وبالسيف لا أم هاني سلكتها ..وجاو مروحين قاتلها..ياختي شفتي هذا زهري وهذا زهرك لا تقولي لا لسحرلي ولا لي سحرك..وكلها وزهرو....وهاذو انتوما وهاذي ناية وفضت لحكاية...🎀 ❤تراث وتقاليد مدينة عنابة ❤ شجرة الدار
