عندي شي ملاحظات الإخوة الكرام: هذاك اللي كيمثل الدور ديال المرأة يحاول ياخد كسوة ملونة زوينة و دوك السوتيانات إلى بغا يديرهم يديرهم من تحت الكسوة ماشي من لفوق كايبانو خايبين خاص الملابس ديالكم يكونوا فيها ألوان مبهجة باش ثيري المتفرج داكشي كيتباع غير في البال رخيص سيرو لبال وغاديين تلقاو ملابس للتمثيل زوينين الكراسي إلى مهرسين حيدوهم وديرو كراسي بلا تكاية غير في المقدمة واللي اللور يتفرجو واقفين جيبو شنطة زوينة فيها كل معدات التمثيل وحطو داكشي زوين لأن السياح كيتفرجو وكيبغوا يصورو داكشي مافيها باس تدخلو اللمسة المغربية في الهندام ديال التمثيل الحايك البلغة الشربيل بالنسبة لدور المرأة الجلابة والرزة والبلغة للرجل ولا الجلابة والنݣاب بالنسبة للمرأة وإلى كان غادي يمثل دور امرأة عصرية يلبس لباس عصري راكم قدام في المهنة وباقي ماكاين حتى تجديد إذن حاولوا طلبوا من وزارة الثقافة تزودكم بمعدات التمثيل الى عندكم بطاقة فنان. وحاجة أخرى ما تبقاوش في نفس الروتين خدموا على مواضيع أخرى مواضيع الساعة مثلاً . حاولوا تمثلوا مسرحية كأنكم فوق الخشبة دون الخروج عن النص. واحد الكلمة كتقولوها إلى بغيتي تشتم صاحبك في الدور كتقولو : ينعل بو موك هاذ الكلمة حيدوها وبدلوها بكلمة أخرى مثلا ينعل بو عقلك. بالنسبة للجمهور فاش كتمشي وتجر لشي واحد رجليه خاصك تختار شي واحد ما كيتقلق لأن ردة الفعل تاع الناس تختلف من شخص إلى آخر. على العموم راكم مزيانين غير كيف قلت لازمكم تكونوا في حلة جديدة في اللباس والمواضيع و الديكور وهكذا غادا تكونوا نسبة المشاهدة قوية الله يوفقكم.