المرتبات دلوقتي عامله اي يا هندسه يعني لو تقدر تدينا رينچ مثلا يعني لو سنه خبره ممكن تقبض من كام لكام ولو سنتين خبر ممكن تقبض من كام لكام ولو تلاته خبره وهكذا
معلش بس سؤال مهم هو انتا لما نزلت اشتغلت كان عندك فكره عن العمل وعارف هتعمل ايه بالظبط ولا اتعلمت في الشغل ذات نفسه عشان انا نازل في مصنع البان كمهندس كهرباء ومش عارف حاجه خاالص
لا ماكنتش عارف ومش هتعرف غير لما تشتغل.. لو ماعندكش خبرة يبقى هتكتشف من الشغل لكن لو خبرة من قبل ما تروح هتبقى عارف أنت هتعمل إيه وسائل على الحاجات اللي مش واضحة في الانترفيو
انا مهندس انتاج حديث التخرج و مشروع تخرجي في تصميم و تصنيع قالب حقن بلاستيك و كنت عاوز اعرف اكتر عن مجال البلاستيك ايه الكورسات المطلوبة و الانترفيو هيكون ازاي ؟
@@ابراهيممحمود-ج6ق لا أنا مقدرش أنصحك بحاجة بصراحة لأن السوق بيتغير طول الوقت وأنا كنت هندسة كيميائية أصلًا فحتى ماليش أصحاب كتير إنتاج. فأنت اسأل في القسم وحاول توصل لخريجين عدى عليهم 3 سنين مثلًا.. لكن بصفة عامة وعلى قد معلوماتي إن الاتنين كده كده من التخصصات اللي بيكون لها فرص في مصر
انت راجل برنس انا هشترك في قناتك انا بكره انشاء الله هستلم وظيفتي في مصنع ملابس كبير والحقيقة انا مش عارف طبيعية الشغل ازاي في المصانع لان الدراسة حاجة والواقع تانية خالص فتنصحني بأيه
اعرف دورك وصلاحياتك والأهداف المطلوبة منك بشكل محدد اعرف مكانك في الهرم الإداري.. اعرف مين اللي له حق يطلب منك شغل ومين مالوش فيه. من الآخر امشي ميري علشان أغلب الشغل بيكون سايح على بعضه والموظف الجديد بيتعمل عليه حفلة. من الدخلات اللي بتهت الناس القديمة إنك تسألهم عن السيستم لأن أغلب الشركات مافيهاش سيستم أو السيستم ضعيف فلما تسألهم ويتنحوا أو يضحكوا بيحسوا إنك فاهم. اتعلم الشغل من اللي هيبقى مديرك مش من اللي هتديره علشان تعرف تشغله بعد كده ومايقولش وسط أصحابه إن المهندس فلان ده كان جاي ولا فاهم حاجة وأنا اللي فهمته. خلي كلامك قليل ورسمي لحد ما تعرف مين اللي سالك ومين اللي مش تمام. في حاجات كتير بس دي أهمها من وجهة نظري وربنا يوفقك
أخويا مهندس ميكانيكا.. بس أنا بتكلم عن التخصصات واللي المفروض يحصل.. لكن في واقع مصر البائس احنا لسة محشورين في التخصصات الأولية للهندسة ميكانيكا، كهرباء، مدني، عمارة
طيب هو السؤال ده بيحتاج كلام كتير علشان ماتقعيش في أخطاء كلاسيكية فحاولي تتكلمي مع اللي سابقينك كتير بس نقي كلامهم علشان السوداية اللي هيتكلموا بيها :) .. مبدئيًا كلنا أول ما اتخرجنا ماكناش فاهمين سوق العمل أوي وبالتالي كنا بنضبش لحد ما فهمنا.. في تقديري وبناءً على تجربتي الشخصية صعب تحددي مسارك الوظيفي قبل 3 سنين في سوق العمل.. المهم بقى علشان ال3 سنين دي يكونوا مفيدين إنك تشتغلي أي حاجة بأي مرتب بأي ظروف.. المهم إنك تحطي رجلك في السوق ويتفتح لك شباك تشوفي من خلاله الوضع اللي على أساسه هترتبي وتجهزي لمستقبلك. بالنسبة لموضوع الكورسات في تقديري برضه وبناءً على تجربتي الشخصية برضه سوق العمل مش بيفرق معاه الكورسات العامة اللي بياخدها حديث التخرج لكن اللي بيفرق فعلًا في الفرص والماديات ودرجة الوظيفة هي الدراسات المهنية المتخصصة زي السيفتي أو الجودة أو إدارة المشروعات.. ودول كلهم مش هينفع تدرسيهم قبل سنتين 3 أهم حاجة من وجهة نظري إنك ماتقعديش يوم في البيت قدر المستطاع.. عارف إن السوق مقرف وعارف إن المرتبات تقرف وعارف إن الشركات عايزة ضرب النار بس معلش اصبري شقاء 3 سنين وبعد كده التعب هيكون بمقابل محترم. بالتوفيق
ليه بس يا فندى الاحباط ده كله ههههههههههههه مع تقديرنا للبهدلة الى حصلتلك بس انت كده احبط العيال اوى خالص على الاخر و ممكن ما يردوش يذاكروا و يكملوا و يقولوا هيه دى اخرتها فى النهاية بعد التعب و البهدلة دى كلها تمساح ولا زواحف و كدة يعنى ههههههههههه على العموم تسلم و الله يبشرك بالخير
اه كل واحد يتعلم ويبقى زى الفل و يشتغل و يقرا فاتحة وكله ماشى معاه حلاوة و الناس الى بيشتغل معاهم بيكونوا غيرانين منه و هيطقوا من اجنبهم منه عشان هو اهم منهم و البرستيش بتاعه وكده يعنى و هو فى الاخر ييجى يقولنا متزكروش و متعملوش وكل الى بنخده ما بنستفدش بيه فى شيئ و هتكون مهنتك عاطل بعد التخرج ليه بس نكران النعمة ده
يا بشمهندس انا لسه متخرجتش من هندسة كهرباء اتصالات بس محتاج اعرف معلومات عن مثلا متوسط مرتب المفروض يبق كام ك مهندس ف مصنع ما ، وهل يقدر يوصل ل كام بعد 5 سنين يعني سن ال 30 مثلا مرتبه يوصل ل كام ، انا شايف منافذ قدامي ل شغل البرمجة بس انا مش حابب ادوس فيه غير اما اعمل مقارنة بينه وبين شغل المصانع أو الشركات والمشكلة أن شغل زي دا خبرته بتيجي بعد الكلية والدخول فالسوق مش زي البرمجة تقدر تشتغل وانت فالكلية مثلا ، وهل شغل المبرمج لو تعرف عنه صديق لك مثلا ف سن ال 30 بردو مرتبه ممكن يوصل ل كام... وشكرا جدا لك
الحقيقة أنا تخصص كيمياء ومتخرج من عشر سنين وخلال اخر ٦ سنين اشتغلت في ٣ أماكن مالهمش علاقة ببعض بحكم إني عملت شيفت للإدارة. السوق دلوقتي اتغير خالص بعد الموجات اللي حصلت الكام سنة اللي فاتت بالإضافة لأزمة كورونا.. فالحقيقة مش هقدر أفيدك. بس اللي أعرفه على قد فهمي من أصحابي إن البرمجة فيه تفاصيل وتخصصات كتير وكل واحد واجتهاده ورزقه. كان نفسي أفيدك بس للأسف أنا في مسار تاني خالص.
