تعملي ايه في عمرك اللي راح مع النرجسي 

رقم حجز الاستشارات والكورسات : ٠٠٢٠١١٥٠٥٨٦٠٥٢
تعملي ايه في عمرك اللي راح مع النرجسي؟؟
هو راح فعلا؟ .. الواقع بيقول انه راح ولما الشيطان يركب دماغك حيؤكد لك انه راح ولما تبعدي عن ربنا الشيطان حيتمكن منك اكتر ويحزنك واكتر حاجة حيعرف يحزنك بيها انه يقهرك ع الماضي اللي مش حتعرفي تصلحيه ،لان اللي فقدناه من عمرنا مش حنعرف نسترده مفيش الاوبشن دة ع الأرض .
خدي بالك انك لما تدخلي في الحتة دي اعرفي انك داخلة في نفق مظلم ولو مشيتي فيه مسافة طويلة حتتوهي ومش حتعرفي تخرجي ، اوعي تخلي الشيطان يدخلك في النفق دة او تخلي فكر النرجسي الشيطاني اللي مسيطر على مخك وتفكيرك يدخلك فيه عشان يزيد قهرك ،لما تفكري في الكلام دة كوني منصفة وبصي ع النعم اللي ربنا اداها لك في السنين اللي راحت مع النرجسي ،خليكي منصفة وحاولي تشوفي الجانب الجيد من الحياة مهما كان النرجسي شيطان الا انك كان عندك ام حنونة او اب طيب او ربنا اداكي أولاد وعوضك بيهم وبحبهم عن حب الزوج ، فكري ان بالرغم من وجود النرجسي الا انك عرفتي تقربي من ربنا وقويتي واتعلمتي ، اتحديتي الصعاب واشتغلتي وبقيتي في المركز اللي انتي فيه النهاردة ، اشتغلتي على نفسك وطورتي نفسك . اكيد اكيد الحياة كان فيها لحظات حلوة ولو بعيدا عن الحب والرومانسية والزوج اكيد فرحتي بأول مولود اكيد فرحتي بنجاح اولادك ، اللي عايزة أقوله لكي انك ماتستسلميش لفكرة ان العمر راح هدر وانا ماعشتش حياتي وانا اتعذبت ، ايوة انتي عانيتي محدش ينكر دة لكن انتي ماتنكريش نعم ربنا عليكي هو كان بيعوضك وانتي عارفة هو كان بيقف جنبك وانتي كنتي بتشوفي دة ومعظمكم بيحكي لي مواقف بيشوفوا فيها لطف ربنا بعنيهم .
شوفي انا مش بقول انك مش حقك تحزني ع المعاناه والهم اللي كنتي عايشاه مع النرجسي لكن الحزن لازم يكون له حدود لازم تتقبلي انك حزينة لكن ماينفعش تعيشي الحزن وتستغرقي فيه ، احزني لكن استسلمي لامر الله وقدره عشان تقدري تخرجي من الحزن . الحزن مع العجز عن التغيير بيساوي امراض نفسية ، لكن انتي تقدري تحولي حزنك لقوة دافعة للتغيير ، تقدري تشوفي انتي كمان شاركتي النرجسي ازاي في انه يضيع عمرك وتبدأي تغيريه ، انتي كان عندك مهارات الاعتمادية اللي خلتك تحاولي تتكيفي وتتلائمي مع الحالة المزاجية للنرجسي ودة خلاكي تقبلي منه حاجات محدش يقبلها ، ادمانك اسعاد الاخر كان له يد وادمانك لرعاية الغير ورفضك انك تسمعي لنفسك واحتياجاتك ،كل دة انتي شاركتي بيه انتي حطيتي نفسك في اخر الطابور ولبيتي احتياجات الجميع ماعدا نفسك . صدقيني لما تفهمي ان انتي كان لكي دور حتعرفي انك تقدري تغيري وتعوضي اللي راح لكن طول ما انتي فاكرة انك مكنش لكي أي يد في اللي حصل فانتي بتخدعي نفسك وبتكدبي عليها عشان انتي مش قادرة تواجهيها ، لزم تواجهي نفسك وتسامحيها وتفهمي ان اللي فات مش حنقدر نرجعه لكن نقدر ناخد الحلو دلوقتي وبكرة او اننا نفضل عايشين في الماضي نبكي عليه وفي كل الأحوال العمر بيمر وبيبقى ماضي فيا اما نخليه ماضي سعيد مانبكيش عليه او اننا نكمل ع القديم ونعيش نفسنا في تعاسة ونكمل مهمة النرجسي بنفسنا ، يعني اذا ماخرجناش من الحزن دة العمر حيروح بقيته لانه العمر بيمر على أي حال فبدل مابتحزني ع اللي راح وبس لا انتي كمان حتحزني ع اللي جاي . يبقى خرجي نفسك من الدايرة دي لان دي دايرة النرجسي مش دايرتك .
فقدان حب الزوج مش فقدان الحياة ،فقدان الحياة بيحصل لما نفقد حب ربنا لكن فقدان حب البشر عمره ماكان فقدان للحياة لان حب البشر زيه زي أي حاجة بشرية مش كاملة وفيها منغصات لكن حب ربنا كامل مفهوش أي منغصات بل فيه كل السعادة فمتوهميش نفسك وتخلي الشيطان يوهمك انك فقدتي حاجة كبيرة ، صدقيني لو انتي حبيتي نفسك وراعيتيها حيكون اصح لكي من ان أي حد يحبك ويراعيكي . اكيد احنا بشر وبنحتاج للحب وخصوصا حب الجنس الاخر ودي فطرة وغريزة لكن مش حنموت ولا حنمرض اذا ربنا ماكتبلناش نعيشه ،
احزني بالعقل وافرحي بالعقل . خير الأمور الوسط
لو احنا حبينا بحكمة كنا نحزن بحكمة ،احبب حبيبك هونا ما عسى ان يكون بغيضك يوما ما وابغض بغيضك هونا ما عسى ان يكون حبيبك يوما ما ،دة الحب بحكمة والبغض بحكمة .