-جاتنا أيام ناكل "فقط زبادي أو خبز وتمر أو ايدام وبيض ورز" بالعشاء والغداء والفطور وبركة ولله الحمد وراضين باللي عندنا -جاتنا أيام فقط كنا نفطر الصباح قبل لا نروح المدرسة وبلا فلوس ولما نرجع نتغدى ونذاكر ونطلع للمزارع ونلعب بالسكة والحدايق ويا زين ليلة الأخميس وليلة الجمعة مع لمة الأهل، وآآآآه لما وصلنا التلفزيون الغير ملون والتلفون والأتاري والعائلة وصخر وسيغا .. متعة جميلة وما ننسى الكيرم والاونو وغير تعلقنا بالسيارات ونلحق بالفلاته هههههههه وسيارة الآيسكريم "عسكريم" والوايت حق الماي وسيارة الببسي وكوكاكولا وأتذكر الكاميرا الذهبي الأمريكية ام فلاش أخضر اللي فلمها 24 وبعدين جانا فلم 36 وما أنسى المسجل والرادو والفيديو، ويا زين الآريل لما تختفي المحطة من التلفاز ويصعد واحد يلف العامود الآريل والله يعين إذا بعز الظهر والحرارة والثاني تحت يقول صفت، صفت، بس قزاز ههههه ونفرح لما يكون الجو صافي تطلع قنوات كثيرة مثل قناة الظهران و 33 و 55 والبحرين وقطر وعجمان والقناة الثانية والأولى تحفة .. نتابع الحصن، والجوهرة وعبدالله البري والبحري ودرب الزلق ومسلسلات الكرتون والأفلام -حياتنا قضيناها بالمزارع والأسواق منذ الصغر والله على "القاري" وهي عبارة عن عربة يقودها حمار تكرمون" وندرس بنفس الوقت -كان الحال بسيط جداً وكنا قنوعين وراضين بكل شيء قليل عندنا دون تذمر ولوم وغير ذلك كنا نعلب ألعاب شعبية جميلة من ألعاب أيام زمان ويا زين مناسبات الأعراس يفرشون الفرش بالبراحة عند البيت ويطبخون والطيران "الطبول" تشتغل واللي يردح ههههههه والكل متكاتف ويساعد، ويا زين رمضان والأعياد اللي كنا فيها نلف الحارة لفة نعايد على الناس وتتوزع العيودات من فلوس وحلاو وعصير وشوكولاته .. ولما احد يسافر نودعه وبالرجوع نزوره ونتحمد له ع السلامة حتى إذا أحد مرض نروح نطمن عليه ونواصل الناس والأهل والأصدقاء أيام جميلة الله يرحم أيام زمان ويرحم من فارقنا الحياة ويحفظ من بقى