مؤسف انو موضوع حساس كهذا يناقشوه بهاد السطحية، انا نشوف عمليات التجميل حرية شخصية، لكن نسبة قليلة جدا لي تعمل تجميل لانها فعلا مش راضية هي على شكلها، معظم الحالات هي تقليد وبحث عن الكمال، اي ان الشي لي نشوفوه عيب خلقي هو ليس كذلك انما كي يظهر شكل معين على انو مقياس للجمال نحبو قاع نكونو كيما هذاك الشكل. انا برأيي وظيفة المراة خاصة مش انو تكون جميلة و المفروض انو كل انسان يتقبل نفسو خاصة اذا ماكانش عندو فعلا عيب او شي يزعجو هو، هذا المنطق. لكن الحقيقة انو الضغط ع المراة كبير جدا، التعليق عامة ع الشكل هو لي يخلق هاد الشي، المراة دايما يرافقها التعليق على شكلها، منحكوش عليها شكون لازم ننعتوها بشكلها الجميلة الحسناء الباربي الخ و اذا كان معندهاش خاصية لي تخليها باربي يا ويلها من التعليقات شعرك حرش، سمينة جبهتك كبيرة خشمك كبير و الخ .. لذلك سي نورمال النساء تلهث وراء عمليات التجميل عساها تتخلص من التعليقات السلبية طبعا للحصول على الايجابية لانو التعليق فيها فيها لا مفر منه. انا شخصيا ارفض اي تعليق على شكلي الخارجي و تعلمت مع الوقت اني نوضع حدود لاي انسان يتجرأ و يحكي على شكلي خاصة اذا كان مش مقرب سواء بالسوء او حتى مديح لانو انا اهم من اني نكون امراة جميلة و مزعج جدا حصر النساء في عالم الجمال. المشكل عندنا ان المراة ليس لها حق التصرف في جسدها، "لازم" تكون جميلة و لا تستطيع التعبير عن نفسها بمكياج هي تحبو مش المجتمع لباس هي تحبو مش المجتمع تسريحة هي تحبها مش المجتمع .. فكيف لا تلهث ورا العمليات. التخلص من هوس التجميل لازمو الاول تربية سليمة فيها التركيز على شخصية الفتاة و قدراتها كانسان منتج فالمجتمع لذلك نلاحظو الكثير من النساء البعيدة عن الاضواء او عندهم تربية سليمة يحافظو على اشكالهم و اصلا معندهم البهرجة و المكياج المفرط و ليساج تاع الشعر على خاطر تجاوزن فكرة انهن وجدن ليكن جميلات. نتمنى فعلا انو نرقاو لمستوى نوصلو رسائل ايجابية على الشكل الخارجي و نبركاو عرض صور الفنانات في برنامج و الاختيار من الاجمل بيناتهم، نبركاو ما نطلبو من الفنانات نزع المكياج ع المباشر لانو هادي وقاحة ولي تنحي المكياج برأيي مش شجاعة، عجبتني لي نهار قالت منحيش! لانو جسدها و هي حرة مش جاية للبرنامج بش يقيمولها جمالها. لانو الحقيقة اصلا علاش المطلوب انو تنحيه او لا ؟ و ظهرت مش زينة تحت المكياج و مبعد؟ وش الهدف؟ كل هاد الممارسات ترسخ فكرة عدم تقبل الشكل عند المراة تحديدا. و النتيجة اللهث ورا العمليات بشكل مرضي
