جديد السلطان2019
عابرة (35)
1.top4top.net/...
كلمات محمد احمد الحبيب
*الحان محمد احمد الحبيب
*ادااا:حافظ طه الباسا
عيونك ألهمتني معاني .. غنيت والدمع ينساب
مع ألم الفراق يا أماني .. الناس عذبوني عذاب
بيتهمو السحاب بالجور .. ويقولو علي البرق كذاب
لكن السحاب مأمور.. بأمر العاطي والوهّاب
🔅🔅🔅🔅🔅
وإذا شاء الإله تمطر .. ولو ياعابرة مافي سحاب
لكن الإله قّدر .. جعل لي كل شئ أسباب
يمر بي فوقنا يتبتخر .. يصب في وادي خالي يباب
وهناك لم الأرض تخضر .. منو الشتّت لها التيراب
🔅🔅🔅🔅🔅
كذلك حبي ليك ياعابرة .. طاهر ومُنتهى الإعجاب
أيام ح تظل في الذاكره .. ياعابرة الحنين غلاّب
العاشق حبيب لي غاية .. لو ما صابا تبقى مُصاب
زي مَرت العزيز في الآية .. لما إتفاجأت في الباب
🔅🔅🔅🔅🔅
الريد البحسو برايا .. إحساس مابيطولو غياب
ماطال إنتي في جوايا .. وين ماتبقي نحن قراب
ريداً مابتشوبو وشايه .. ومابيصرف وشيهو عتاب
زي مُهر القوافي الجامحة .. فوق نقد الحُسود وثّاب
🔅🔅🔅🔅🔅
آمال من صِغر أسقيتا .. وآفاها الجراد أسراب
لانجضت حصَد قندولا .. لا لميتا في الورتاب
زمان من بدري إتنبأت .. بي عالم دروبو صعاب
وفي آخر المطاف تلقيني .. بين الركوة والمحراب
🔅🔅🔅🔅🔅
لي حزني العميق ياعابرة .. سويت الفؤاد مِرآب
وقرّشت الأماني الحالمة .. وسديت من وراي الباب
عارفك انتي ماقصرتي .. ومن تالاكي مامُرتاب
لكن الظروف ياعابرة .. هي الضربت عليها حجاب
🔅🔅🔅🔅🔅
أيا أرضاً عزيزة علي .. عامل ليكِ ألف حساب
ولا منك نفضت إيدي .. عشان عارف الزمان دولاب
بشيلك في سواد عيني .. وأكسرك في الوسط قرقاب
عشان إنتي بتغتي علي .. وكت يتنكروا الأصحاب
🔅🔅🔅🔅🔅
أسافر بالسنين محزون .. واعاني قساوة الأغراب
واجيك خالي الوفاض مديون .. معاي حق الرجوع ياداب
وما لاحظت في عينيك .. خلاف الفرحة والترحاب
ولا صريتيّ فيّ وشيك .. ولاقلتي الحبيب شِن جاب
🔅🔅🔅🔅🔅
أخلاق من قديم موروثة .. ماجاتك علوم في كتاب
مع ساق النخيل مغروسة .. وتتمايل مع الهّباب
يكفيك افتخار يا سمحة .. حال الصابرة في الحامداب
يوم فقدت بناتا الخمسة .. ما كالت سبيبا تراب
🔅🔅🔅🔅🔅
يانيل ياحبيب ياغالي .. ياما غابو فيك احباب
لكن ماخطر بي بالي .. مد ايديكَ للطُلاب
ديل البحمو مستقبلنا .. في زمناً وشيهو غُراب
بشراك ياطيور الجنة .. أسراب لي جمال خلاّب
22 сен 2024
