حقيقة اغتيال أيمن الظواهرى 

من سنة فاتت.. الجيش الأمريكي خرج من أفغانستان بعد ما وقع اتفاق مع حركة طالبان بإنه يسلمها البلد.. مقابل انها تتوقف عن دعم تنظيم القاعدة.. اتفقنا يا طالبان؟.. اتفقنا يا أمريكا..
لكن يفاجأ العالم كله بإن المخابرات الأمريكية بتضرب أيمن الظواهرى زعيم تنظيم القاعدة.. فى قلب العاصمة الأفغانية كابل.. حضرتك تقولى مش طالبان وعدت أمريكا بإنها متدعمش تنظيم القاعدة.. ازاى بقى سمحت لزعيم تنظيم القاعدة نفسه انه ينزل من الجبل يعيش فى العاصمة الأفغانية كابل؟.. أقولك الله ينور عليك.. ده سؤال عظيم جدا.. حركة طالبان وبمجرد ما الجيش الأمريكي خرج من أفغانستان.. جابت أيمن الظواهرى قعدته فى واحدة من أرقى مناطق العاصمة كابل..
لكن سيدى المواطن.. مش عاوزك تبقى طيب.. المخابرات الأمريكية مش عبيطه ولا بيضحك عليها.. اختلف معاها زى ما تختلف.. لكن الحق حق.. المخابرات الأمريكية كانت عارفه ان طالبان مش هتلتزم باتفاقها.. ومع ذلك فهمت طالبان انها قدرت تضحك على المخابرات الأمريكية.. فهمت طالبان انها سلمتهم أفغانستان ببلاش.. علشان يا عينى الجيش الأمريكي مش قادر يحاربها أكتر من كده..
لكن الخطة كانت أبسط من كده بكتير.. الخطة كانت انى صحيح هخرج من أفغانستان.. لكن هتفضل عينى عليها.. قواتى هتخرج.. لكن عملائى موجودين على الأرض.. والدرونز بتاعتى طايرة فى السما.. وأقمارى الصناعية بتراقب من الفضاء..
فكانت النتيجة ان طالبان سمحت لأيمن الظواهرى.. زعيم تنظيم القاعدة.. أخطر المطلوبين دوليا.. انه يعيش فى كابل عاصمة أفغانستان.. وده بالظبط اللى المخابرات الأمريكية كانت عاوزاه.. يعيش وسط الجبال بعيد عن عينى ليه؟.. ينزل يا باشا يعيش فى بيت أقدر أضربه بالطيران وقت ما أحب.. زيه زى أسامه بن لادن.. فضلوا سايبينه برده لحد ما نزل من الجبل وعاش مع أسرته فى بيت من بيوت باكستان.. وفجأة نزلت القوات الخاصة الأمريكية بطيارة هليكوبتر خلصوا عليه وخدو جسمانه ومشيوا..
وعلشان تدرك ان تصفية العناصر الإرهابية بالنسبة لأمريكا معدش لازم لها انها تحرك جيشها بالكامل.. فخلينى أقولك ان مثلا أيمن الظواهرى مش أول واحد المخابرات الأمريكية تصفيه فى عهد جو بايدن.. لأنها صفت قبل منه أبو ابراهيم القرشى فى سوريا.. وده قيادى فى تنظيم داعش.. ده غير ماهر العقال برده فى سوريا.. وبرده تابع لتنظيم داعش..
حتى ترامب اللى مكنش بيفهم غير فى الفلوس.. اتصفى فى عهده قاسم سليمانى.. الحرس الثورى الايرانى.. وأبو بكر البغدادى.. تنيظم داعش.. وحمزه بن لادن.. ابن اسامه بن لادن.. وقاسم الريمي.. تنظيم القاعدة.. أما أوباما.. عمهم كلهم.. فقدر انه يصفى أخطرهم.. أسامه بن لادن نفسه.. ده غير سعد بن لادن.. ابن اسامه بن لادن.. ده غير طاهر يولداشيف.. حركة أوزباكستان الإسلامية..
أما جورج بوش الابن.. ففى عهده قدرت المخابرات الأمريكية انها تصفي أبومصعب الزرقاوى.. تنظيم القاعدة.. وأبو حمزه ربيعه.. برده تنظيم القاعدة.. وعماد مغنيه.. حزب الله.. وبالمناسبة تصفية عماد مغنيه كان بالتعاون بين المخابرات الأمريكية والموساد الاسرائيلي.. تقريبا هما الاتنين كانوا مضايقين منه..
وهنا خليك فاكر الناس اللى رؤساء أمريكا صفوهم دول علشان هنحتاجلهم بعد شوية..
حضرتك تقولى طيب لما المخابرات الأمريكية جامده أوى كده وعارفه مكان أيمن الظواهرى من بدرى.. ليه سابته طول المدة دى علشان تصفيه؟.. أقولك الله ينور عليك.. السؤال ده.. هو ده مفتاح الحكاية كلها..
من المصادر
bit.ly/3JpxMdt
bbc.in/3zTQZkg
on.wsj.com/3bo...
on.wsj.com/3BB...
on.wsj.com/3zw...
on.wsj.com/3zT...
on.wsj.com/3BD...
كتاب أيمن الظواهرى من قصور المعادى إلى كهوف أفغانستان للكاتب جمال عبد الرحيم
#المواطن_سعيد #أيمن_الظواهري