كيفن أصبر قليبي .. وكيفن أعمل حسابي
ما دام عشمي في نظرة .. والعندو النظرة مابي
أجرو غناي احكي ليكم .. تعالوا اسمعوا ياصحابي
حكاية الشافعي البريده .. وريدا شقايا وعذابي
احن لها حن القماري .. أقوقيبا اوتار ربابي
واهوي الهوي في هواها .. وهواها قرايتي وكتابي
منو القال ليكم عقلت .. وحاتكم جنيت دابي
بقيت لمن ليها افارق .. افارق عقلي وصوابي
اضيق لمتين ليها ارجع .. اخاف مايطول غيابي
اعاين زين فيها واشبع وازيد اعجابي علي اعجابي
اشرق وين وين اغرب .. واشيل همي واكتئابي
محل ما امشي الاقي طيفها.. هاتك ستري وحجابي
تطير روحي تقيف تقارن.. خدودك زهر الروابي
تتعلق بين عيونا .. ورموشا البي فوقا كابي
قليبي يفارق ضلوعي .. يلاهي عليها ويشابي
ضعيف مابيقدر يقاوم .. بريق البسمة السحابي
صديره لما يهتز .. تبق نار الله في اعصابي
وقديلتا كيتا علي ..وا نشاف ريقي وخم ترابي
حنيني ومرات بتقسي .. تقول في نفسها اتغابي
اتغابي العرفة فيهو .. وا خرابة الحب وا خرابي
صحيح اصبحت مملوكها.. اسوي اورادي وازنابي
متل ماملكت فؤادي .. انا ملك شيطان الكتابي
اخاف ما بقدر اعاتب .. اقول تزعل من عتابي
اموت احسن من هي تزعل..او تزرف دمعة صابي
عشانا انا كم ضقت مرة .. عشانا مهمل عقابي
عرفت الله في عذابك .. انت خاف الله في شبابي
*****
يس عبد العظيم - أغاني طنبور - أغاني شعبيه سودانيه
23 сен 2024
