#شوف #قصتي تقترح عليكم قصص #واقعية و قصص #حقيقية لأشخاص راسلونا بش نحولو تجربتهم لقصة #مصورة.
هاد قصة سيمو وقصة بزاف د شباب المغاربة ...قصة فيها عبرة زوينا و ميساج واااااعر
_ _ _ _ _ _ _ _ _ _ _ _ _ _ _ _ _ _ _ _ _ _ _ _
يو لعشران معاكم سيمو بغيت نعاود ليكم واحد لبلان طرا ليا, جا مع الوقيتة ديال الحملة ... قبل مانبدا, خفيف ضريف, تابوناو فلشين و ورك على الجرس باش ديما يوصلك الجديد. يالاه مشينا ؟ مشينا !
انا خصكم تعرفو عندي بليا بحال ايا واحد, عنديي مع التباوق تانكمي السندويتشات بزاف. موالف بليل تانوقف مع الدراري فراس الدرب ونبقاو عاطينها غير التباوق حتال الوحدة ,الجوج بحال هكاك, كرجع فحالي لدار تنشوف الا الواليدة خلات ما يتقسى وتنطلق شي فيلم نشد به الستون حتا يديني النعاس.
وكما العادة تانصبح ناعس تال العصر, تنفيق مشقاق والواليدة على الصبح ,ولا نكولو على العصر, تتبقا عليا الله يهديك اولدي الله يعفو عليك من هاد الصحاب والبلية ... وانا باغي غير شي قهيوة كحلا وشي سندويتش يالله نتوضر ونعلق شويا على المشاكيل اللي اصلان ماعنديش.
كان عشيري ايوب فارع ليا راسي باش نتفرج فواحد السيري ديال صراع العروش ,game of thrones, وانا كل مرا تانصدرو, تنبقا عليه واخا واخا واخا.
تالواحد النهار كانت الوقيتة ديال البرد والشتا, صافي ولينا تانتفرتكو بكري, حيت دغيا تاتخوا الدنيا وتايبداو الدتيات و امينا اللواطا يدورو. رانكم عارفين ملي تادخل الدار بكري تتبقى تسمع فالنكير على قلبك تالشمن وقت, وعندي واحد الوليد غير الشوفة ديالو تتخليك تحس براسك قاتل له شي واحد.
ملي تنكون مبوق ونتساطح معاه تاينكريني وقلبي تايبدا يضرب وتايطيحو عليا الركابي. اما الوليدة, هاديك شكلو تاني بالبنان, تنحس بها نهار كامل ملي تتكون تتشقا تاتفكر غير فشي دعوا باقا مادايراش, كتفنن فالدعاوي.
واحسن حاجا يدير الواحد هيا يدخل البيت ويطلق شي سيريا واراك ليا لفراجا. ولكن لفراجا بلا تباوق مافراجا ماوالو, انا خاصني ديما نكاد الراس عاد ندخل نتفرج باش نعيييش مع الفيلم.
هيا هاديك ، باش منبقاش نبان لدار اللهم نتخشى فالبيت و نشد الستون بشي سيري، بديت تنقلب على شي سريا ونا نتفكر المسخوط ديال صاحبي ايوب ونا نكول والله تانبدا صراع العروش. لحت السيزون اللولة مع وقيتة المغرب، داكشي ناضي كاين غير سوسبانس و التشلاخ، عجباتني فالصراحة ، ولكن كنت مامكيفش وداكشي خاصو شي سندويتش مهوار. يالله نعيش مع السيريا .
ماكنتش مقضي، والشتا على برا. اش غندير اش غندير ؟ عيطت على أيوب باش يصوفيني وترجل معايا، مسكين جا عندي بالمطور تال الدرب وعطاني واحد ساموان وكال ليا حضي راه كاينا الحملة، ماتسوقتش كتليه متخافش. دزت عند العساس خديت الوريقة ديال السندويتش.
دخلت الدار فرشت بلاستي وجد لعيبات، وبديت تنعدل السندويتش، ساليت كلت تال ديك 12 نخرج راس الدرب ونكموكسي معا راسي. وانا خارج الوليدة تتكول ليا واش عاجباك هاد الحالة؟ تخرج فنصاصات الليل و البرد بحال شي شفار ؟ عنكتها وخرجت وانا معلى بالي.
وقفت حدا واحد الشجرة وشعلت داك السندويتش ، وبقيت حاضي لا تدوز شي ورزازات، بيناتنا مابلان ماوالو تبوق ونتا حاضي، بدات تاطلعني تبويقا وسهيت مع القصة ديال السيريا. شويا بديت تنسمع شي خطوات تايقربو، خبيت داك لمونتيف مورا ضهري وما شكيتش فيه كاع, شويا تايبان ليا خونا جاي قاصدني.
دماغي تكوانسا, تنكول نعلق؟ لا نبقى بلاستي. نعلق؟ حتى صافي وقف عليا. سولني اش تادير هنا ؟ كنت حاس بيه حنشا ولكن النفس ديالي والتبويقة خلاوني نخرج فيه عيني و كلت ليه ونت اش مشا لك؟ حتا صافي خرجت عيني ولي عطا الله عطاه عاد ضربت على التولكي ديالو وانا نجمد ومشا مني اللون.
كاليا اش مشا ليا انا نوريك شمشا ليا؟ كليا وريني داكشي لي فيديك! وانا نوريه وكتليه غير سندويتش اشاف انا لوحو دابا مابقيتش نقرب له كاع, دحاك عليا ولد الناس وكاليا مزيان اولدي ولكن حتى تمشي لهيه وكوليهم هاد الهضرة على تخراج العينين لي فيك.
عيط لسطافيط كانت واقفا غير فالدورة وجاو جوج حناش مينطوني وداوني. الطريق كامل وداك خونا بارك عليا غا بلاتي حتى توصل! تاتخرج فعينيك؟ واحد اخر بارك عليه هادا خصو يتربى... وخوكوم تايفيبري وسط الضلما وانا لداخل ماعارف في كضينين مرا مرا تايتحل لباب تالوح عيني نعرف راسي اينا كوميساريا غادي.
دخلوني فواحد البيرو وكالو ليا بقا هنا وانا مينط, تنكول فراسي ينعل ديلمي انا ولا شي صراع العروش! كنت كالس ترونكيل فالدار حتى صدقت فالكوميساريا.
حابو واحد الجوج اخرين كلهم دمايات ومخسرين, كانو مطايفين والله اعلم. موهيم هبطونا لتحت, مشيت نيشان واحد الركنة وتكوانيت بلا مانهز عينيا. حتى بردت شويا عاد بديت تانشوف فبنادم لي معايا. تا را غير اوخه يوم ادن! واحد خونا بقا محمر فيا عينيه. درت لقب وحدرت راسي وبقيت حاضي لا يسدق هاجم عليا شي واحد.
كان واحد خونا مدخل معاه نص سندويتش يلاه غادي يشعلو شافوه لاخرين هما يتجوقو عليه, واحد فيهم شنق عليه ومرمقها معاه وخداه له. شفت داك لبلان ونا نتكمش وتنكول فراسي هادي هيا اللخرة والله ماباقي نعاود.
لموهيم لوالدة مسكينا بقات مشطونة , ملي تعطلت خرجات مسكينة تقلب عليا, مشات عند العساس حيت هو لي غادي يعطيها خبار السوق وكالها راه ولدك داوه مالين الوقت. شدات طاكسي وجات عندي بجرا, ملي دخلات بقات تاطلب فالكوميسير وتتبكي وكالها ماتخافيش الحاجة غدا ولدك غادي يخرج غادي غير ربيوه شويا.
...
_ _ _ _ _ _ _ _ _ _ _ _ _ _ _ _ _ _ _ _ _ _ _ _
مازال ماشتركتي فالقناة يوتوب ؟ هاهو رابط الاشتراك : bit.ly/chtirak
بغيتي تابعنا على فيسبوك ؟ هاهو رابط الحساب : bit.ly/choof9issti
10 сен 2024