ياعلي قول ولا لواردك ملطوم = ياراعي الخرمة حديد البقومي
عندي علوم وخابر عندك علوم = وتبي تعلمني وتاخذ علومي
لا كن انا ماني رفيق لك اليوم = أنا رفيق للشقاء والهمومي
البارحة واليوم ماجاني النوم = بيني وبينه مثل حرب النجومي
سهران طول الليل لا أرقد ولا أقوم = أقالب الجنبين تقل محمومي
وأن نمت صحاني من النوم جاثوم = اللي يصحي غارقين الحلومي
الله على اللي مقدمه تقل مبروم = شد الوكالة ما ببديه هشومي
ماجِيب عن السمكريين مصدوم = ولا قيل هو مسيوم ولا نسومي
مقوس الصدام وجنوطه كروم = فكسار منوة كل راعي لزومي
إلى مشى بالخط ولخط مزحوم = يروج مثل السيل بين العقومي
بالوصف كنه فارس يمنع القوم = يرخي العنان ولا يحزم الكمومي
فارس وشيخٍ للمغاوير زيزوم = قدام شيخان العبي والختومي
شيخ بكفه رمح مسقى ومسموم = أما من الدوشان وإلا الفرومي
وإلى أعترض خطه لشعبان وحزوم = يشبه لسباحٍ يغوص ويعومي
ما قص له لوحات بحروف وأرقوم = إلا سند جمرك بدفع الرسومي
أبيه عن دارٍ بها الصدر مكتوم = يبعد مسايه قبل أمزع هدومي
لأرضٍ يساقيها من الشبط ديموم = ومن أول الوسمي عليها قدومي
فياض وجبالٍ لهن طور ورجوم = ملس المراقي مكنعات الخشومي
ما فقست بلجوفهن بيضة البوم = مرفا الحرار مخاشرات السهومي
ماكني إلا عايشٍ دايم الدوم = إلى رقيت مناطحات الغيومي
أرتاح وألقى متعة الطير بالحوم = يوم الهوى ينفض شماغي وتومي
وياعلي أنا قبلك عن الشعر أبا أصوم = زينه وشينه مبعدٍ عنه حومي
وش عاد ابا بالشعر والشعر مظلوم = وإلى سمعت الناس ردوا عزومي
اللي ليا سمعوا شريط أم كلثوم = من الطرب كل ٍ يطق البهومي
هيضتني يا ذخر من يذبح الكوم = في ساعةٍ فيها البخيل مهزومي
يقلط وهو كنه على الوجه مرثوم = يطيح وجهه مع وجيه الرخومي
وأصل البخيل خمام معطى ومحروم = وكفه ليا جات اللزوم محزومي
والناس بالأفعال فايز ومذموم = وإلى النواصي ما عليها وسومي
وأنته مع أهل الطيب لك حظ وقسوم = وعن الردى في كل حال محشومي
لك مسهمٍ بالطيب ما هوب مثلوم = ياطيب الرفقة شريف السلومي
وتم الكلام اللي من الراس منظوم = وعسى حياتك يالسبيعي تدومي
وإن مت جعلك من سنا النار معصوم = في جاه غفار الذنوب الرحومي
8 окт 2024
