#وعزابي لو سراك ! طبعا أكون #مسرور ياخي دي سماحة قلب مابعدها سماحة .أنا لو كنت مكان عزيزة منديل النظمت فيها القصيدة لقبلت العرض وأعلنت انبراشي لعبيد عبدالرحمن الشاعر الجميل
صفوة جمالك صاف في الماء علي البلور ينعم صباحك خير يسعد مساءك النور ********* نور من جمالك بان لا نور شموس لابدور فقت معاك في الجيل فقت المعاك في الدور يا الفي علاك بعيد وسماءك سابع دور ذقت الهلاك يا ملاك في هواك هلاكي بدور ********* يا فرحة المحزون يا نفحة المسرور مراءك يزيل الهم يمحي الألم في صدور اسمح لي أتلو ثناك والدور يفاخر الدور ويفوح نشيدى الفيك ذي نفحة الرفدور ********* انا في شقاي ولهان يالفي النعيم مغمور فرشي القتاد يا جميل ثم اتسادى جمور يرضيني ما يرضيك والناس اموره امور ومحال اسيبه هواك اذا السماء تمور ********* بين القلوب ميزان صفاء وزنها المعبور قلبا يميله الحب وقلبا يميل مجبور إنسان عشق إنسان إنسانه ما مجبور شخص الوفاء المفقود ولفقده ماني صبور ********* طرفى السهير يا سمير النوم يضره ضرور وعذابي لو سراك أيضا أكون مسرور أوعد جفوني غميض والطيف يزورني مرور افرح وأقول يا ليل وشرح واحاكي سرور
صباح الخير على ناسا قلوبهم شاربه مويه النيل ... صباح الخير على عيونهم ..على جباهم على ايدينهم الطيبه .. صباح صلوات صباح دعوات . صباح نبداه بالقرآن..تلاوة بتشرح الابدان .. صباح الخير على عيونا تشيل الهم على عيالها ..على جيرانها والحله ...على الساكنين بعيد حتى .. صبح الخير على الزينين...وحتى ان هو زول ما زين مع الزينين حيصبح زين .. نفوسنا كتير بيغشاها الغبار والظلمه عز الليل .. مهم نصبر ..عشان الظلمه بعدها تشرق الاكوان عشان النيل حنين ودفا ..ولمّ الناس وما في جفا .. وصباح الخير على الزينين .. صباح من الاله بركاته تتنزّل على الصلاّي..وتالي المصحف البكّاي.. على البيقًبل اليدين ..ويسرق من جبينها نور .. صباح الخير على امي البحبها موووووووووووت ..وبشتاقها وبناديها وبعلو الصوت .. صباح الخير على ضراعك ابوي الخير وضلنا نحن حتى الغير .. صباح الخير عيون اخواني بشتاقهم ...وبهواهم وسائله المولى يكتب لي .. اشوف الكل سعيد فرحان ... صباح الخير ..على اخواني في المشكاة .. على اهلي البحبوني ..وعلى ناسا حروفهم ساكنه في جواي .. صباح الخير على كل زول بيصحى من الصباح بدري ..يحب يمشى الدروب دغري.. يخاف الله..وخوف الناس بعيد من قلبه ما بغشاه.. ضراعه تخضّر الواطه ..وكلامه البلسم الشافي ..ووجيهو البسمه بتصافي .. وقلب شايل لكل الناس وطن مليان غنا وتحنان .. صباحكم ضي من الرحمن ..
