ضياع حقوق الناس في حوادث السيارات في مصر 

من حوالي ٣ سنين كتبت مقال عن ضياع حقوق الناس في حوادث السيارات في مصر، و أنك بتتعرض لتجربة سخيفة و مهينة و أنت بتشوف نفسك عاجز أنك تاخد حقك بالقانون.. و النهاردة أنا شخصياً عشت التجربة دي بحذافيرها لما اتعرضت لحادث مروري كبير عصر اليوم.
ميني باص خبطني من ورا بسرعته في شارع التسعين الجنوبي و أنا بهدي على المطب الصناعي فلبسني في العربية اللي قدامي، اللي يشاء القدر أنها ميني باص برضه، ولما السواق ينزل يقول لي معلش ملقتش فرامل تحت رجلي 🤷🏻‍♂️
و طبعاً سواق الميني باص التاني اللي كان قدامي نزل شاف المنظر كده قام ماشي لأن أكيد مكانش معاه رخص أو يمكن أنا صعبت عليه.
الكوميدي اني قعدت قرابة ال٤٥ دقيقة بحاول أوصل للنجدة ومش عارف. و بعد ما وصلتلهم و بعت اللوكيشن لأمين الشرطة جالي يقول لي إحنا في أيام مفترجة ولو عملت محضر مش هتاخد حاجة.. ولو عملت محضر هنروح القسم كلنا و أنتو و العربيات تتحجزوا لحين العرض على النيابة 🙂
ولما قلتله نعمل محضر كتب المذكرة اللي بيكتبها دي غلط و كتب وقائع الحادث غلط و خليته يعيدها.. و لما رحنا قسم التجمع الخامس و أنا محمل عربيتي على ونش قعدنا ييجي ٣ ساعات تانيين عشان في الآخر أعمل محضر يتقيد برقم "مخالفة" و يتقالي تابع المحضر في النيابة.
ولولا ان الميني باص رخصته منتهية كانوا سابوه يمشي هو كمان 😐
و الجميل ان المحضر ده آخره هياخد غرامة ٥٠ جنيه مثلاً ولو عايز بعد كده ترفع دعوى تعويض عيش مع نفسك.. فمتشكرين.. حقنا عند ربنا هو معوض مخلف و حسبنا الله ونعم الوكيل.
قدر الله وما شاء فعل و أنا بخير الحمد لله، و شكراً لكل حد اتصل أو بعت رسالة يطمن عليا فيها بعد ما شاف الستوري 🙏🏼🤍
ربنا يحفظكم جميعاً من كل شر و سوء و يصلح أحوالنا جميعاً في هذه الأيام الثقال 🤲🏻
ده لينك المقال السابق لعل و عسى يفيد حد:
www.facebook.c...
#الحوادث #المرور #طرق_مصر #النجدة #القانون