عبد الحسين الحلفي ابوذيات 15 بيت 

ابوذيات
عبدالحسين الحلفي. (رحمة الله عليه وعلينا)
15 ابوذية
حرت مابين اتاني .. ما اتاني
ومو ميه الشماته ... مائتاني
اتناتي والاريده ... مااتاني
اجه المارايده وغف عليه ...
رغم كل الهموم العلي ... راسًا
عشت مرفوع مادنگت ... راسًا
بس من ازعلت فجاتًا ... راسًا
رأسًا راسي دنگ بين اديه ...
حبك ياترف سلني ... علاني
وخله الي گبل حدري ... علاني
زعلت انت وزعلت اني ... عله اني
ولحد الان انه مبدل عليه ...
صراير عشگ روحي ... وكصرتلك
ونفس وكت المنازع ... وكصرتلك
طويل واعله منك ... وكصرت لك
حته اتلوح من اتبوس اديه ...
عدل صوبك جدامي ... جر عدل لك
وادليك بحچي المر ... جرعدلك
اثگل كافي بسك ... جر عدل لك
زعلت ؟ لتجر عدل حقك عليه ...
فال الخير مامره ... فولي
وحبك هم ترس گلبي ... فولي
اذا ما عاجبك فشطح ... فولي
بس ابشرط خنولي سويه ...
امك تنعه وانه انعه ... نعه امتين
وجيتك نعمة والضحكه ... نعمتين
شفافك تين لتگللي ... نعم تين
اخاف تگول ويموعن خطيه ...
اعله روحي شبيها تنشد ... مر شبيها
العشگ مر بيها بسعر ... مر شبيها
انه التانيته ما مر ... مر شبيها
وگمت حسبالي هو شصار بيه ...
گبل من أصل طيب ... فرعينه
هسه العگل طاحت ... فرعينه
الوكت يخزر عليه ... فرعينه
درت عنه وبقت عينه عليه ...
يدنيا بنار ضيمج ... شلوطينه
حزن وسنين عمري ... شلوطينه
بعازه ومن تگله ... شيل واطينه
ينب گبلك انطيني وحط بديه ...
يدنيا وياي بعد وبعد ... جدي
وعلي صيّحي بعالي ألصوت ... جدي
هجمتي بيت ابوي وبيت ... جدي
وأنة ابلا بيت شتهجمين اليه ...
حت الحايط فراگك ... حتاني
اتاني وماتجي لكن ... حتاني
موبس انت تتگلب ... حتى اني
گمت وياك اتگلب عليه ...
شفافك عسل حصتي ... مره منهن
وكطعلي اچلاي سهمك ... مره منهن
چم مره اللحگتك ... مره منهن
مو انت اطلعت وصار بيه ...
الحزن دامي بسبب زعلاك ... ترادم
تعال وباوع عيوني ... تره دم
اعله مودك ضلعي وي ضلعي ... ترادم
وعله مودك گمت أهد انه عليه ...
مجرد شك اشكن ... ها شكو شبيك
تكش بوجهي لكن ... ها شكو شبيك
اشگ حلگه اليغثك ... ها شكو شبيك
وذا غثك اشگ حلگي بديه ...