دقت الدلوكة قلنا الدنيا ما زالت بخير
اهو ناس تعرس و تنبسط
تككت سروالى الطويل
سويتلو رقعات في الوسط
فى خشمى عضيت القميص
أجرى و أزبد شوق و انط
لامن وصلت الحفلة زاحمت الخلق
وركزت
شان البت سعاد
اصلى عارف جنها فى زول بيركز و ينستر
لكنى عارف انها
لو كل زول فى الحله بالسترة انجلد
يانى الاذاها و جنها
برضى عارف اظنها
تحت تحت بتحبنى
ديمة فى صرة وشيها
يلفحنى شوق نافر لبد
و ركزت للحرقة المشت فوق الضلوع
تحت الجلد
و ركزت للحرقة المشت فوق الضلوع تحت الجلد
ضميت قزازتى مرقت عن طرف البلد
و سكرت جد
و انا جايى راجع منتهى
لاقتنى هى
قالت (تعال)
كبرت كراعى من الفرح
نص فى الارض نص فى النعال
إتلخبط الشوق بالزعل
اتحاوروا الخوف و الكلام
هى يا سعاد
على ود سكينة و كلتى فى خشمو الرماد
على ود سكينة و مات اسى
و انا بت بلاك ملعون ابوى لو كنت ارضى اعرسها
وأنا يا سُعاد
وكتين تصُبى سحابَهْ تَنْزِلي زي دُعاش
بفْرِش على روحى واجيكْ
زولاً هِلِك تعبان وطاش
وأنا يا سعاد وكتين أشوفِك ببقى زول
فَرَشولوا فَرْش الموت وعاش
قالت سُعاد
(بطِّل كلام الجِرْسَهْ انجض يا ولد)
مزّقْت روحى نِتَف
مرّقْتَ من جيب القميص
عرقى وأسق
طبّيت قزازتى وصلتَ لى طَرَف البلد
وسكْرتَ جَد
اذّنت فى الشوك والسَلَم
وسرحْتَ بالناس والغَنَم
وحلمتَ زى شالنى ومشَى
فوف زحمة نْبيْ الله الخِضِر
صحَّانى صوت العُمدهْ قال
(مسئول كبير زاير البلد)
20 сен 2024