عقدة النقص عند المصريين| اسكتش الكاجو| أسامة عبدالله
زنقة 23
أفلاطون عزبة النخل
العالم قصر كبير وأنت عايش في اوضة الكلب
النهارده 27 في الشهر، وانت غالبا لسه قابض المرتب
باسم
جبت التايهة انت كدا ؟
أسامة
اللي هو غالبا مش أكتر من 3000 جنيه
باسم
لا كدا جبت التايهة بجد، عرفت منين اني بقبض 3000 جنيه ؟
أسامة
بتشرب سجاير البرول، البلور البروليتاريا الكادحة، بس بتتطلع لسجاير البرجوازيين
باسم
هو حرام اني ادلع نفسي يوم في الشهر
أسامة
شوف يا محترم، الفقرا في بلدنا نوعين، ناس الفقر اختارها، وناس اختارت الفقر
باسم
بس انا مش فقير
أسامة
وانا مقلتش انك فقير، انت اللي إيدك راحت عالبطحة لوحدها، وحتى لو مش فقير انت مش غني، ولا عمرك هتبقى غني
باسم
ليه ؟
أسامة
عشان محاولتش تكون غني قد ما حاولت تقلد الأغنيا، عارف الفرق بين الغني والفقير إيه ؟ الغني أول ما بتجيله فلوس بيفكر هيحوش منهم كام، لكن الفقير أول ما بتجيله فلوس بيفكر هيصرفهم في إيه
باسم
طب ما انت بتقلد المثقفين وبتتكلم زيهم
أسامة
هو يعني الكلام بفلوس ؟ هخسر ايه لما اقول كلمتين محفلطين سمعتهم في برنامج وللا قريتهم في جرنان، لكن انت بتخسر، بتحرق في الفاضي، زي العربية دي لا مؤاخذة لو سيبتها دايرة واحنا واقفين
باسم ( بسخرية )
بخسر ايه بقى يا أفلاطون عزبة النخل ؟
أسامة
بتخسر طاقة، أصل كل بني آدم فينا ربنا صارفله شوية طاقة، اللي بيخلصها في الصياح، واللي بيخلصها في تقليد عيشة مش بتاعته زي حضرتك كدا، واللي بيخلصها في مكانها الصح، في تحقيق الحياة اللي عايز يعيشها
باسم
طب ما انت بتشتغل آهو، حققت إيه ؟
أسامة
على الأقل ما غرزتش في الفخ اللي انت وقعت فيه
باسم
أنا مش واقع في فخ يا عم
الفقرة الرابعة (شرح أسباب المشكلة )
أسامة
يا ابني افهم انت عايش في مقلب، النظام العالمي الجديد قسم الناس فريقين، تيران بتلف في سواقي، واصحاب أراضي بيشغلوا التيران دي
باسم
ويا ترى بقى أنا أنهي نوع فيهم
أسامة
نفض التبن اللي على دقنك الأول وبعدين اسأل، انت بتشتغل آه، بتتعب آه، بس هما اللي بيغتنوا مش انت، عشان عقدة النقص اللي عندك مخلياك بتصرف مرتب الشهر في يوم واحد، طالع من قاع المجتمع للسطح تشم نفسك لمدة دقيقة، بس هما بقى قصاد الدقيقة دي بيسرقوا عمرك كله
باسم
نوت إكيزاكتلي
أسامة
آهي عوجة اللسان دي مصيبة تانية، انتو بتتكلموا انجليزي ليه يا شوية خواجات ؟ عايشين في نيوورك ؟ عمرك شوفت واحد أمريكاني بيقول نهارنا أبيض بالصلاة عالنبي ؟ آهو تقليدك ليهم دا بقى بيبسطهم أوي
باسم
يبسطهم ليه بقى
أسامة
عشان هيخليك تفضل طول عمرك عبد في مؤسساتهم
باسم
أنا شايف انك مكبر الموضوع، دا مكانش نص كاجو دا يا عم ( محاولة هروب )
الفقرة الخامسة ( الإسقاط على المجتمع ككل )
أسامة
جايز لو كانت مشكلتك لوحدك، لكن دي مشكلة مجتمع بحاله، تقدر تقولي ايه اللي يخلي واحد مرتبه 2000 جنيه، يصرف مليون جينه عشان يتجوز، ايه اللي يخلي أسرة معدمة تجيب في جهاز بنتها 3 غسالات و 3 شاشات، وكراتين هتفضل مقفولة ليوم الدين
باسم
أنا كراتين أمي لسه مقفولة لحد دلوقتي
أسامة
وكراتين أمي انا كمان، وفي الآخر يتدايتنوا ويدخلوا السجن ،عشان التقليد .. محاصرينك طول الوقت بوسائل اعلامية مبترحمش، تتفرج على أي مسلسل تلاقي كل الأبطال من الطبقة الهاي وبيرطنوا بالأجنبي، المسلسل يخلص يجيلك اعلان عن وحدة سكنية ب80 مليون وانت عمرك ما مسكت 19 الف على بعض، تقفل التليفزيون وتفتح الفيس تلاقي الناس بتتصور في أماكن عمرك ما شوفتها في أحلامك، العالم قصر كبير وانت عايش في أوضة الكلب ..
باسم ( في استسلام )
يا باشا أنا الكلب
أسامة
وعشان كدا هتفضل طول حياتك مستهلك، تشتري البضاعة بتاعتهم عشان تبقى شبههم، آهو الطريق اشتغل الحمد لله، عقبال دماغك ..
باسم
لا لا نزلني هنا على جنب، أنا هاخد ميكروباص لحد دار السلام مش رايح التجمع
أسامة
عين العقل
يحاسب باسم وينزل من التاكسي، يرن تليفون أسامة
أسامة
ألو، أيوه يا ام مروة، عازمة نسايب مروة عالغدا، وماله نزود جوزين فراخ، يا ستي عنهم ما اتاكلوا نبقى نرميهم في الزبالة، المهم منبانش أقل منهم في حاجة ..
يتحرك التاكسي ونشاهد اللوحة الخلفية مكتوب عليها حروف كلمة ( زنقة 23 )
تمثيل
أسامة عبد الله - باسم موريس
كتابة
عبد الرحمن هيبة (دافنشي)
تصوير
أحمد زنفل
Project manager
أحمد رفاعي
إشراف عام
حنان صبري
ستايلست
رحمة عادل
مدير إنتاج
عمرو الجزيري
مونتاج وألوان
متى رشدي
ميكساج
أحمد جمال
مونتاج وألوان
متى رشدي
مخرج منفذ
فادي ممتاز
إخراج
إسلام صلاح
#اسامة_عبدالله
#الكاجو
#فيديولوجي
5 сен 2024