على گبرك يزيد | لاول مرة على اليوتيوب | الشاعر كاظم اسماعيل الكاطع  

على گبرك يزيد نمر فرد يوم
گبر مهدوم خاسفته الحوافر
عمايم وامهات وخيل وجنود
وتجي ويانه الالوف من المگابر
الرمح الشال راس حسين موجود
وسبايا الشام كلها تعود باچر
تجي ويانه الالوف من الضعيفين
وتجي الصوبين داخل والچوادر
تجي صوب المگابر منك اشكال
المذبوح اجه وبيده خناجر
يالما حسبت ترضع ثدي الموت
وسيفك چان ينحد بالخواصر
نمد اوراقنا ونتحاسب وياك
الناس تريد حگها شبيك طافر ؟
عبد الله الرضيع نريده هاليوم
ونريده طفل منريده كابر
من قصر الإمارة شجبت وياك ؟
حريمك والمزارع والجواهر
وينك يالردت تكتب التاريخ ؟
نگلك شو غبت وحسين حاضر ؟
يالگبرك ينز من دم ضحاياك
ما شفت الفرات شلون صاير ؟
صح ذيچ السنة شح اعله الحسين
بس هسه جره جوه المناير
اگعد يا يزيد وخل احاچيك
الخوف بظلاله اعليك كاسر
امك چانت تربي مقصات
تگص بيها الشوارب والضفاير
مشلوعة الاضافر والجرب زاد
بعد جلدك تحكة بيا اضافر ؟
شفت راس الحسين وگمت صليت
وعلى الصوت النشاز اعله المنابر
كاظم إسماعيل الگاطع
#ادم_ابو_الشعر