غابت الشمس وبردت النســمات ولبست قميص الليل ضيعتنا
وحــــــــط الفلك ع جبالنا شالات وباتوا الطـــــيور بسنديانتنا
وانـــــــــدرز خد الســما شامات بيــــــض متل زرار فلتنا
والندي ســــــقســــق ع الوردات الي فتحوا بحيطان حارتنا
وعرزال تحكيلوا الدني حكايات عن امــــــــــــــجاد ارزتنا
يا ما ع دربو حامت فراشـــــات ونجوم غطت ع سطيحتنا
ومنجيرة الراعي لها عنات مقطـــــفي من نار نهدتنا
وســــــــاقية موجاتها مرايـــــات قديش فرقت شعر حورتنا
وع كل حفة باقـــــــــة بنــــيات قصـــت لهن فصاتين لوزتنا
يا ما عليهن جنت اللفتـــــــات وتنـــهدوا شبيبات حارتنا
يا اختي انشـالله تنجلي الغيمات ومنلـــــتقي من بعد فرقتنا
مشــــــــــتاق للمعذور للرزقات للمصــــــطبة لتنور قبوتنا
لدق الجرس للمخل للقيـــــمات للعين لحــــــكايات جارتنا
للراعية السمرا الي ورا العنزات للميجنا بفيـــــــات خيمتنا
للكنار الاصفر الريشــــــــــا ت ينقر خصور كواز تينتنا
للمحدلة للسطح للخشـــــــــبات للكاس يضحك ع سكملتنا
صلي معي يا حلوة الخيــــــات تنعود يختي هموم حاجتنا
ما بيرجع لخيك هنا الغفـــــوات تا الشـــمل يجمعنا بضيعتن
عرزالنا الاخضر بيفوح بالعنبر
بعدو بهالجوزة منصوب يا اسمر
اووووف يا بااي يابا
بعدا الطيور معشعشة بعبو
والزهر بعدو مدردر بقلبو
عم يسالو علينا وليش حبينا
اللي تعلموا من حبنا يحبو
عرزالنا الاخضر بيفوح بالعنبر
بعدو بهالجوزة منصوب يا اسمر
اووووف يا بااي يابا
ما عليش يا عرزال لا تحزن وتلوي
بعدها بالبال ايامك الحلوة
بكرا بنرجعلك وبارضك بنسهر
موال : بنخبرك شو صار فينا عالفراق
الكاس العكر عا غيبتك ما عاد راق
من كثر ما تمرجح هوانا بالهوى
فيي وفيها الكون يا عرزال ضاق
عرزالنا الاخضر بيفوح بالعنبر
بعدو بهالجوزة منصوب يا اسمر
اووووف يا بااي يابا
6 ноя 2011