فكرتيني في وحدة جارتي كانت مشركة فمها دايمن تروح لدونتيس تحكي تحكي تحكي على ناس دارها بالحفاني وتمنشر كارثة وكانتوخطرا ظرستي قتلتني في نص ليل رحت لنفس دونتيس مع راجلي نحيت ضرستي وكي شاف لاكارط نتاعي دونتيش سقساني اذا نعرف فلانة .ملاحضة عطيتلو لاكارط باسكو نحيت ظرسة مقدرتش نهدر اسمي ولقبي المهم سقساني على جارتنا وضحك انا عاودت وليت لنفس دونتيس باش نبلومبي دخلت وجارتنا كانت ثما تحكي وتمنشر في عجوزتها وانا كنت عند الفرماية برا صوتها يتسمع حتى من جهة الرجال أنا شديت رونديفو ورحت جبت عجوزتها تما غسلتها قدام الناس قولولي واش درت خطأ ولا صحيح مع العلم عجوزتها مرا هائلة وهاذي لعروسة هي لي متسواش
هذا شيئ مايخصكش ربي سبحانو ساترها قدام ناس دارها جيتي نت وفضحتيها تموتو على المداهش وتوصال الهدرة كون صح انسانة صالحة تشديها بجهة وتهدري معاها ياختي الشي لي ديري فيه غالط وخلاص غيري المنكر بالنصيحة أولا يمكن الان سببتيلها مشاكل مع ناس دارها واصلا المسلم لا يتدخل في شؤون الغير إلا بالنصيحة وفقط ماش النميمة والتفرقة وخطرة خلاف قادر نت بعد توقعي في مشاكل نتيجة التدخلات تاعك وربي يهدينا اجمعين ويهديها. وعلاش تحوسي تحكي قصتها هذي حاجة ماتعنيكش خافي ربي
انا واحد المرة كنت عند جينيكولوڤ او جات واحدة تما كانت عروسة جديدة تحكي وتقطع في ناس دارها والناس تما يحمو فالبندير ربي يهديهم حت نضت من بلاستي خرجت للكولوار عيطتلها قلتلها كي راكي تحكي هكذا هاد الناس تعرفيهم قالتلي لالا قلتلها لكان كاش وحدة جارت عجوزتك راهي هنا او هيا تعرفك وتروح تديلها الهدرة ماشي تعشي فالمشاكل كبار قلتلي عندك الحق او ملتم مزادتش هدرت حتى لحقت دالتها بصاح كاين شي نساء ربي يهديهم يروحو غير باش يسمعو حكايات الناس ألله يجعل آلخير
خربتي حياتك وحدة تشراك الفم وين يوصل،وزيد تحبوا الرقاة تموتوا عليهم،على جال الجمايع،تقدري ترقي روحك وحدك بالمواضبة على الصلاة وقراءة القرآن،والأذكار، وزيد لي يتتبع عورات المسلم ويفضحه،راح يجي النهار ويشرب من نفس الكأس،يقول رسولنا الكريم:"من ستر مسلما ستره الله يوم القيامة"هذا راه قانون إلاهي،في بداية حكايتك قلتي انا نسيت حكايتها بسح وين تلقاي لمة تاع نساء تفضحيها،مادام ماشافتش عينك ماتقدريش تحكمي على العبد،لاحول ولا قوة إلا بالله،نتمنى تكوني ستوعبتي الدرس
آللهم صلى و سلم على سيدنا محمد وعلى آله وصحبه أجمعين ❤يامولات القصة 😅مازلتي تشكي تقولى كبير عليا 😊قولى الحمد لله و ألله يرزقك بالذريه الصالحه ❤🎉🎉🎉بارك الله فيك ابنتي فلة سردك للقصص جميل 😊
تعجبوني كي تقولو خذا مكتوب ربي ربي لي حب إسموه البعد على الدين كنت تروحو عند مشعود و مشكل الفم لمشرك هذا هو دواه و تقولي هو كان إحوس على السبة كين سبة أكثر من الخيانة و فضح أسرار
هذي الدشرة نتعكم غير تع بوليتيك وهداير وهذا يعس في هذا حتى تخربو كامل البيوت ياختي سمحيلي نقصي البوليتيك تتسڨم حياتك لا شغوذة لا والو🙃 عوض ماتشغلي لسانك بالناس شغليه بذكر الله بسك ملي بدات الحكاية ونتي فلانة فيها وفلاتة فيها ربي يهدينا
