فيديو كليب للتوعية بمعاناة السوري والعربي المغترب بسبب صعوبة دخوله إلى الأراضي العربية، وبالمقابل تجد الغرب يعامله بكل انسانية، ولكن ! ومهما كان الغرب لطفاء، لن يشعر المغترب بالراحة أكثر إلا عند العرب.. إذا سمحوا بدخوله طبعاً.
كلمات الأغنية :
بعدو الوجع موجود فينا
بعدو القهر عم يكوينا
خوف وألم حرب وحلم
لولا الظلم.. لولا الظلم
كتبت وصيتي ..
عـ باب بيتي واقف
ماسك الشنته بإيدي
عم اسمع أصواتـ(ـن) خايف
إني شوف دمعة إمي ..
وتكون هي آخر مرة
نلتقى فيا بالبيت
وجمعتنا وضحكتنا ذكرى
والحرب تمحي الملامح
تنهي المستقبل ومبارح
تنفي الطيب و المسامح
وتخلي للشر مدابح
و البارود بلا مكابح ..
عم كافح إني وصل
هالرسالة بشفافية
وبصدق بلا ما مثل
بدون إعلام فاسد
دموع تمساح بانت
الشموع بايدي ذابت
و كرامتي بفيزا نهانت
لا انخانت ..
فكرت العرب إخوة وإيد وحدة
بس بعد أحداث بلادي
إتأكدت هي لعبة وكذبة
خود النخوة ..
نقعها بمية العروبة الرخوة
الغرب فتحلي بابو
قبل ما موت من الوحدة
أول سؤال انسألتو من الغرب وين العرب ؟
ما قدرت جاوب فـ سكتت .. وخبيت الضحكة
مشتاق لكل أهلي ومشتاق للناس
الغربة وجع مكتوب صدقوني يا ناس
مش قادر انسى بلدي مش قادر انساه
يا رب لم العوائل إنهي الجراح
السوري بيتو اتفجر
هون بألمانيا مهجّر
إمو تبكي بالدير
عا ابنه هون صغير
مافيني احكي الـ فِيّي
الأسوأ باللاذقية
والعربي آخد مقلب
مفكرها راحة بإدلب
سمعني آخر صرعة
ممنوع نستقبل درعا!
بخجل منك يا سوري
قدامك شو كان دوري
بكتب تغريدة بسب ؟
أو أدعيلو من القلب ؟
طيب وين الأفعال؟
يا أمة الأقوال ..
يا أمتنا العربية
تصريحاتك هزلية
عالسوري تبكي تنوح
بس يدخل مش مسموح
نتشكّر عالتعاطف
وعا قوّة المواقف
لك إنتو بأول فرصة
أول من باع الأقصى
مشتاق لكل أهلي ومشتاق للناس
الغربة وجع مكتوب صدقوني يا ناس
مش قادر انسى بلدي مش قادر انساه
يا رب لم العوائل انهي الجراح
3 авг 2018
