#قصتي_مع_الحرڨة الحلقة1 :الجزائر كيما كل شاب كنت فالجزائر نقرا خممت بلي القراية ماتسعدنيش مع العلم انا من عايلة متوسطة دخلت للجامعة وشفت العقلية ماكان والو آمالا كان عندي 4 خيارات الأول فيزا لأمريكا او كندا ولي يكلف دراهم بزاف وانا معنديش تسما لازمني نخمم في أقل تكلفة باش نوصل للهدف لي هو نخرج من البلاد مهما كان الحال وهذا الاقتراح تخليت عليه الثاني:فيزا لدولة اروبية لي يشبه الأول تقريبا صح أقل تكلفة بصح ياكل دراهم وهنا خدمت راسي الحاجة الأولى لازمي نستنا بزاف باش نشد رونديفو واغلبية النتائج يرفضو الفيزا تسما لازمني نيفيتي الريسك ثالثا:البحر تسما على عنابة ولا على وهران ولا تونس ولا المغرب وانا انسان منطقي مانقدرش نريسكي على لوحة باش نوصل لأوروبا ماهيش جنة باش نرمي روحي هكذا النفس عزيزة يا خاوتي وماننصح حتى واحد بالحرڨة فالبحر بقالي اقتراح واحد وهو تركيا ولي كان عندي معلومات عليها بزاف بعد ما كنت نتفرج فيديوهات فاليوتوب ونشوف قصص كيما هاذي لي راني نحكي فيها ولكن كنت متردد خاطرش كل واحد واش كان يقول كنت نسمع الطريق مغلوقة صعيبة فيها الحبس..الخ بصح كنت داير ها في راسي وكنت مأمن بربي وبلي َ لن يصيبنا إلا ماكتب لنا وبعد ما سمعت فاليوتوب و الفايسبوك طريق فتحت الناس راهي توصل دون تردد قررت نجيب فيزا ونتوكل على ربي بعد ماكنت علابالي بلي غلقت الطريق في 2011 ولاد حومتي رجعو من اليونان حكاولي وفي 2015 الضربة تع سوريا غلقت الطريق.. آواخر 2017 فتحت جبت رونديفو من الانترنت في vfs global وبديت نخدم فالملف تاعي جبت شهادة مدرسية خرجت الاستمارة عمرتها خدمت حجز فندق وحجز طيران وشهادة ضمان السفر وتوجهت لبن عكنون مقر vfs ديت معايا 2 ملاين ماكانش علابالي شحال نخلص نشفا كنا في رمضان عندي رونديفو على 10:30 انا وصلت على 8 سقسيت العامل قتلو عندي رونديفو على 10 قالي تقدر تجي وقت لي تحب هاذي تركيا ماشي ماريكان لقيت المركز فارغ دخلت عطيتو الدوسي قالي اعطيني 13 مية قالي أرواح السمانة الجاية انا خرجت خدمتلي قلت ضرك يديهم وما يحلبنيش سقسيت واحد قالي صراتلي خطرة مارجع لي لا الرفض لا قبول ركبني الشك سمانة وانا ندعي قلت لوكان يعطوني نسجد لربي بعد سمانة رحت لقيت المركز فارغ دخلت مدولي برية ماحبيتش نحلها ثما بديت نمس فيها حسيت فيها باسبور تاعي و معاه ورقة قلت اوفسيال هاذ الورقة تع الرفض خاطرش يطبعولك الفيزا فالباسبور ما يعطوك والو معاها رحت لبلاصة فارغة قلت إذا عطاوني نسجد خلاص درت الكراج فتحتها.. فتحت البرية خرجت الورقة لي شاك بلي الرفض لقيتها الفوطوكوبي تع ضمان السفر رجعوهالي مع الباسبور ركبني الشك قلت اوفسيال ماعطاونيش علاجال خطأ فالملف خاطرش كانو الافكار مخلطين في راسي كنت دارس مليح ونعرف علاش يعطولك الرفض بصح هاذ الامور في فيزا امريكا ولا كندا ولا اروبا اما تركيا ساهلة فتحت الباسبور ديركت فالفيزا فيها 6 شهور فرحت بزاف سجدت لربي تقول عطاوني فيزا لفرانسا ماكنتش علابالي واش راه يستنا فيا رجعت للدار فرحان ماخبرت حتا واحد وبديت نشوف في الانترنت سعر تذكرة الطيران انا عطاوني لفيزا من ماي لجانفي وعندك الحق في شهر حبيت نطلع بعد رمضان بصح المشكل راه فالدراهم سعر التذكرة من 7 ملاين وطلع امالا لازمني نستنا حتى يرخس وكيما كان الحال كل يوم نشوف ونسيي بالتيليفون فالمواقع تع الحجز لقيتو في اكتوبر رخيس( 4 ملاين) شريتو بعد ما بعت كامل واش كنت نملك ساعة سامسونج وايكس بوكس و بلاي 3 وتيلفون جبت واحد رخيس خاطرش ماجياش تحرڨ بتيليفون غالي رحت بدلت دراهم فالبانكا للأورو كان عندي حق 300 اورو لحق النهار لي نروح فيه خبرت العايلة قلتلهم راني رايح لتركيا حواس مكاش لي آمني كامل علابالهم بلي انا ديما نحكي على الحرڨة فالدار بصح ماحبوش يوقفو في طريقي علابالهم انا الحاجة كي نصمم عليها نديرها رحت انا والعايلة للمطار وانا مقلق و نخمم فالطريق كي نوصل ولازمني نطلع ديركت للحدود مانضيعش الوقت ولا نكري دار ونبقا سمانة تلفتلي كامل بقيت داهش يما حست بيا قاتلي واشبيك ياك رايح حواس وانا نبان كي نكون نكذب وجهي يولي حمر قتلها والو راني مقلق على الطيارة برك يما عرفت بلي رح نحرڨ خاطرش خويا مضاري يروح يحوس مايصرالوش هكذا بصح كنت موجد روحي مليح حافظ الطريق من الفيديوهات والجيبياس المهم كي جيت نركب فالطيارة اخر لقاء مع يما فالجزائر قاتلي يا وليدي بالاك تدير عليهم وتحرڨ روح حوس وارواح و عنقتني وقاتلي رد بالك على روحك 😭 ركبت فالطيارة فيها 130 واحد 120 كامل رايحين يحرڨو خاطرش هيا الطيارة الرخيسة وفالليل تحس روحك رايح للرحلة فالمدرسة لي على يميني و يساري حارڨين وبدينا نهدرو حتى نطق لي كان على يميني قالي خويا تولي للدزاير انا بديت نضحك قالي راني حاب ترجعلي الباسبور قوتلو انا مانوليش قالي وين راك رح تحرڨ قتلو على ايديرنة قالي كيفاش قتلو يا ندخل نهار الاول نڨطع من ( نيو فيزا) ولا نزيد نكمل(لأورسيادا)ولا نمشي خمس ايام (لكومونتيني) قالي رانا ربعة ونتا تعرف ارواح معانا نكرو دار ونبقاو نسيو حتى ندخلو قلتلهم الله يربح بدا يبان ضو تركيا من التاقة تع الطيارة ..اسطنبول ترحب بكم #uk
