غض البصر! مرة واحد بيحكي قال: في عرس اخوي الكبير شفت بت جميلة جميلة جمال ما طبيعي، طوالي ناديت امي وقلت ليها تمشي تتكلم معاها هسي دي! ما قدرت اصبر لنهاية العرس خفت واحد يسبقني ويخطبها! فعلا امي مشت واتكلمت معاها وجات نادتني، البت طلعت اخت العروس يا محاسن الصدف! المهم البت قالت لامي خلي يجي والفي خير بحصل، انتظرت اسبوع وانا على اعصابي لو على امشي من بكرا طوالي المهم مشيت بعد اسبوع اتقدمت ليها رسمي ولمن جاني الجواب انا حسيت الارض دي ما شايلاني من الفرح البت وافقت! كنت اسعد انسان على وجه الارض وشايف اني خطبت ملكة جمال ماف احلا منها. تم العرس الحمدلله وعشتا معاها احلا ايام البت طلعت جمال واخلاق وطيبة وكل شي حرفيا كنت سعيد والحمدلله هذا من فضل ربي. بعد شهرين من العرس انا بقيت ما قادر اكمل معاها مسخت لي وطلعت من راسي وبقت لي عادية او اقل من عادية حرفيا ما عارف انا كنت شايف فيها شنو! المشاكل بينا كترت شديد وسببها الرئيسي انا لاني بقيت شايفها ما بنفس الجمال الكانت عليه بقيت ما طايقها وفي اقل شي بتزهج وبعمل مشكله ما عارف مالي والله! مرة كنت قاعد في القهوة مضايق كلعادة وبفكر في حل لي مرتي وبحاول افتش المشكله وين؟ جاني صحبي قعد بعد سلم واتونس معاي سالني مالك مهموم؟ حكيت ليهو قصتي عسى ولعل يلقى لي حل لاني بقيت افكر اطلقها من شدة ما بقت لي مسيخةوباهتة! صحبي الله يديه العافية ويرضى عنو وراني المشكله واداني حلها كمان! قال لي" غض بصرك، لمن تغض بصرك محتشوف احلا منها لانك محتشوف غيرها اصلا" ما اقتنعت بكلامو بس مشيتو ومشيت البيت،اليوم داك الليل كلو بفكر في كلامو وما كنت شايف منطق في الموضوع يعني لو ما عاينت للبنات هي حتبقى حلوة؟ ماف منطق! بس قررت اجرب ونشوف. في البداية الموضوع كان صعب وكل مرة بنسى بس شوية شوية ومع كثير من المجاهدة بقيت ما برفع عيني على اي بت ودايما عيني تحت وتعاملي مع زميلاتي من بعيد لبعيد حدو السلام ومواضيع الشغل فقط حتي الونسة وقت الفطور بطلتها وكل ما اشوفهم متلمين يتونسو امشي منهم بعيد زي المتوحد وشوية شوية حتي المصافحة بطلتها، كلهم طبعا كانو مستغربين فيني وفي الحدود الرسمتها دي! جو سالوني مالي متطرف كدا؟ وقلت ليهم خلو تعاملنا بحدود يا اخوات طبعا ضحكو فيني وقالو مرتو هارشاه وقالو عامل شيخ وقالو وقالو بس م اشتغلت بيهم لاني لقيت ثمرة مجاهدتي! صدقو او ما تصدقو رجعت اشوف مرتي جميلة بل واجمل من زمان بكتير! واصلت معاها ونسيت موضوع الطلاق نهائي وبقيت اشوفها كل يوم اجمل من امس والله العظيم! سبحان الله، من ترك شيئاً لله بدله خيراً منه واجر الطاعة بتلقاها في الدنيا قبل الاخرة الخلاصة الطريق اداهو حقه ومنه غض البصر وإطلاق البصر ي اخوي يقتل قلبك ومشاعرك ويخلى الشيطان يوسوس ليك الحرام فإن النظر سهم مسموم من سهام ابليس وغض البصر حلاوة للقلب ولي اخلاقك وتربيتك اتق الله في بصرك ولا تجعلوا عيونكم كاميرات مراقبة حا تتعب والله المستعان وتمرض قلبك اخواتنا وأمهاتنا التزمو بالحجاب الشرعي والنقاب وكوني عليهو حريصه وإياك والتبرج والزينه خارج بيتك والسلام عليكم احمد عبد السلام
