رائعة الفنان كريم منصور .. تغطيت وبعدني الليله بردان
كلمات الشاعر كاظم اسماعيل الكاطع
والحان : كريم فندي
تغطيت وبعدني الليله بردان
لان مو انت يمي فراشي بارد
وينك يادفو يا جمر الاحزان
احس بدمي بالشريان جامد
يامهر الصبر ماكضت عنان
نسمع بس صهيلك وين شارد
كل ساعه وتعتني جفوف بطران
وانا جلد العلي قماشه بايــد
تعال اوزن هموم وجيب ميزان
وشوف شكد عذاب الروح زايد
أنسحبوا من حياتي هواي خلان
بقيت بعزه ماني الوحدي اعاند
سواد الليل يبقى وتطفي الالوان
واعيد بذكرياتك والمشاهــد
اذا كل طير عنده ثنين جنحان
انا مكسور وعشت بجناح واحد
على بئر المنايا وجيت عطشان
مجبور وشربت الماي راكد
وينك يالبعيد القلب مليان
غنا و بوسات ودمــوع وقصايد
وياك بعشرتي ياليل خسران
مثل عشرة النور وي الكواغد
لو طاهر حليبه الدهر ماخان
ضربني براسي غفله واني كاعد
تغطيت وبعدني الليله بردان
لان مو انت يمي فراشي بارد
وينك يادفو يا جمر الاحزان
احس بدمي بالشريان جامد
5 сен 2024
