أبوالمطامير مدينه من مدن محافظة البحيرة شمال غرب مصر .. وإسم أبوالمطامير بيتكون من مقطعين " أبو" .. وهيه بادئة فى الدارجه أو العامية المصرية تدل على الكثرة والشيوع .. و" المطامير " وهيه كلمة من الجذر اللغوى " طمر " .. وتعنى دفن أو أخفى أو ستر .. والمطمورة هى بناء على شكل بيضاوى من الطوب اللبن له فتحات لإدخال وإخراج الغلال .. وكانت المطمورة شائعه جداً فى الريف المصرى زمان .. لدرجة إن كل فلاح كان عنده واحده فى بيته بيخزن فيها غلال أرضه علشان يستهلك منها طول السنه هوه وعيلته .. وأبوالمطامير تعدت المفهوم ده لشكل أكبر من تخزين الغلال .. فمطامير الغلال الضخمه كانت فى كل مكان فى مركز أبوالمطامير لكثافة ما ينتجه المركز من الغلال .. وعلشان كده إتسمى المركز بإسم المطامير الكتير جداً دى المنتشره على نطاق واسع جداً فى أبوالمطامير .. وإللى كانت الدولة بتخزن فيها الغلال علشان تتنقل بعد كده فى وقت الاحتياج إليها فى أجوله من الخيش لكل ربوع مصر .
وأبوالمطامير كمدينه تاريخها لا يتجاوز 100 سنه .. لما تم فصلها عن أبوحمص فى سنة 1930 لتكون مدينه لمركز منفصل عن مركز أبوحمص .
المصادر :
1 - ar.wikipedia.o....
2 - ar.wikipedia.o...) .
3 - www.marefa.org... .
4 - www.elbalad.ne... .
5 - ar.wikipedia.o... .
6 - gopp.gov.eg/eg-... .
7 - معلومات مباشرة من أفواه السكان المحليين كما وضعنا منشور على صفحة ( الجروب الرسمي لمركز ومدينة ابو المطامير ) لمعرفة بعض المعلومات عن أصل تسمية عزب أبوالمطامير وهذا رابط المنشور :- www.facebook.c... .
قراءة سعيده
2 окт 2024
