بديت باسم مكون الكون تكوينه=المنفرد والمتحد في كيانه
رب الحجر رب الشجر والثقلين= مرسل محمد وامرٍ باتبعانه
اللي عباده له صيامٍ مصلين = يرجون رحمة ربهم وامتنانه
عطفه ولطفه لا غدا الكون نصفين= ويشهد على الإنسان حتى بنانه
يانصرالرسول في بدر وحنين= ياجاعل ألسان البشر ترجمانه
أنت المعين ولا حدٍ غيرك أمعين = ومن بعد ذكرك كل شيٍ بــ(أوانه)
ياراكب اللي من حفيزه قزوزين = تـ2ــو ودبل زيـ00ــرو ون اصدرانه
صدر خلال انتخابات الزعيمين= قدام بوش الابن يكسب أرهانه
وقبل استلام البيت الأبيض بشهرين= ومجلس أشيوخه وأنظمة برلمانه
جي أم سي أحروف ورموز تبيين =للمصنع اللي صممه والصيانة
احدث موديل ابتكنلوجيا الصوالين= والله عطا اللي يصنعونه إتقانه
أليا سرى ماضيٍ من الليل ثلثين = وولع مصابيحه وولع اسكانه
كن اجماحياته شموع المحبين= في عيد ميلاد أوقد الشمع أدانه
وكن اشتغاله هرجةٍ بين ثنتين =يخفنها بين الخجل واللعانة
ويشبه أليا قام أيتمشى على هوين = مشي الفتاه المترفة بــ( امشيانه )
والياعطى مردومةٍ كنها قين= قام أيغنج تقول كن اغنجانه
شريفةٍ في حفل ناسٍ شريفين =ترقص على ياليل دانة يا دانة
اتهز وتهز الخصر والذراعين= ومن رأسها ماطاحت الاستكانة
واليا مشى من نجد بين الصلاتين= ما يصبح ألا في حدود الكنانة
يصرخ بعنف أليا خذ اشوي بنزين =مثل صريخ اصغيرٍ بالحـضانة
ياسايقه بالله هلحين هلحين = قم دق سلفه واربط أحزام أمانه
حنا على رد الجمايل مضرين = حاضر بحاضر والتهاون جبانة
دس له وزد له باشتغال الصلنصين =ولا يحرك الآ بآخر ازعيتمانه
خل الحصى على حصاها حصاتين= تفر من حدره فرير السمانة
حده على قصياه ياسايقه لين= تعزف اقزوزه مثل عزف الكمانة
ويخلي العادم من أطوال الشكامين =غليون حشاشٍ برأسه شطانة
كنه بتفكيره يحرر فلسطين = ومستيسرٍ شارون بالخيزرانه
ونصه ديار طيور شلوى الدماسين =وقل وين مطلق ثم ليا قيل عانه
تلقاه في بيت يذري عن البين = وسلم عليه ومن لقيت أبمكانه
سلام ممزوج بعطرالرياحين=والآزبادٍتوجامن اعمانه
وألذ وأحلى من حليب الملاوين = أليا روحت بن وادين ديدحانه
مثل الزلول الفاخرة بالدواوين = ويلاعب الغربي زهر قحويانه
مقدار ربعن لوهم أبعيد غالين =على خفوق قدرهم ما استهانه
أعيال عود غاب رأسه عن الزين =ممنوح من ربه صلاح البطانة
مطلق وغازي والنعم بالشقيقين = وخوانهم والله عليه وأمانة
ماهو مكفيهم لا نعم ولا نعمين = هيف السمين اللي كثيرادهانه
وأهل هلا يامرحبا فيك وآهلين= وكلٍ حجاجه يعجبك باضحكانه
وأهل دلال اقناد غير المثامين= وأفضل نمونه هيله و زعفرانه
كنه لضرمانه صعوط المجانين = أليا ذاقه النعسان طارانعسانه
وأقول يامطلق فدوك الكثيرين =أهديتني باقة ورده ودانه
الباقة اللي من ورود البساتين =من كل شي زين فيها إذنانه
من باعها من جوف قلب وشرايين = وجم تصدر بالروى عيطشانه
فيها عتب لكن على الرأس و العين= أنا مدان ومعترف بالإدانة
وإن كاننا بالوصل معك متردين =منك السموحة رأس مال الخزانة
أما تجي وألا نجيك امتعنين = وكل على أصحابه وسيع بطانه
وصلاة ربي عد وبل الوداد ين = على رسول عزنا باتبعانه
22 сен 2024