لماذا يجب أن تحاول مرات عديدة بعد الفشل الأول؟
اذا كنت انسان حساس وحاولت تعمل شغلة وفشلت فيها، (ومعظم الناس بالمناسبة بيصير معهم هيك).
أولا - اللي رح تحس فيه هو انك:
• فاشل
• مظلوم
• غبي
• صغير
• هدا قدرك ولازم تقبل فيه
• النجاح مو إلك
• الدنيا حظوظ
• كل شي ضدك
ثانيا - واللي رح تعمله هو:
• انك تبطل تحاول
• مابتشوف او بتقرا شي عن ناس نجحوا
• بتروح بتفش قلبك لشخص صبور
• بتدور على اللي فشلوا متلك
• بتصير بتاكل كتير
• بتصير بتنام كتير
• بتتفرج على مسلسلات حزينة
• ويمكن كوميدية بس سوداء
• بتصير شوي حسود
• بتصير كتير غيور
• بتحكي للاخرين قديش الدنيا صعبة
• بتخترع قصص عن ناس حاولوا ينجحوا بس فشلوا
• قناعتك بتصير انو الحياة غير عادلة
• رح تصير إنعزالي
ثالثا- هلأ يمكن معك حق باللي فكرت فيه وعملته والأسباب هيي:
• الدماغ بيتوقع الأسوأ دوما من أجل حماية الانسان.
• النفس البشرية بتميل للحزن والتشاؤم أكتر من ميلها للفرح والتفاؤل.
• إرادة الإنسان بتضعف إجمالا بعد أول فشل.
• النفس البشرية بتعتبر الفرح شعور عارض سطحي وبتعتبر الحزن شعور أصيل وعميق.
• عقل الانسان الباطن بيخزن مشاعر الخجل والعار والشعور بالذنب وقلة التدبير من الطفولة المبكرة، واللي معظم الناس سمعوها من أهلهم ومحيطهم.
• الفشل بعد أول محاولة بيمنع دوما المحاولة الثانية خصوصا اذا تعب الانسان بالتحضير لتجربته الفاشلة الأولى.
• الانسان بيعتبر التشجيع مجرد نفاق وشفقة.
رابعا- طيب، ليش لكان عم قول إنك لازم تحاول مرة تانية اذا كان معك حق باللي حسيت فيه وباللي عملته؟
• كونك فشلت بالمحاولة الاولى، واعتبرت نفسك فاشل، وين المشكلة انك تحاول مرة تانية وتفشل؟
رح تفشل مرتين؟ طيب، شو اللي رح ينقص منك او يزيد عليك؟
ضاع وقت منك؟ صارشعورك مضاعف بالفشل؟ أو صار عندك شعور مركب بالغباء؟
طيب، اسمعني منيح: إنت وقتك ضاع أصلا بعد فشلك الاول: بالأكل، والشكوى المؤلمة مع رفيقك ومشاهدة التلفزيون والكوميديا السوداء وبساعات التفكير الكئيبة الطويل.
لاحظ انو كل اللي رح تحس فيه مجرد مشاعر مالها وحدة قياس!
يعني، اذا حاولت مرة تانية وتالتة مارح تزيد ١٠ كيلو غباء ولا رح تشرب ٥٠٠ لتر فشل ومارح يزيد عليك مترين إحباط وغضب !!
بس ممكن تزيد عندك نسبة السعادة وتنقص عندك نسبة الحزن إذا نجحت ..
ممكن يزيد شعورك بالثقة بالنفس وينقص شعورك باليأس اذا نجحت..
ممكن تزيد عندك المعرفة ويقل شعورك بالجهل اذا نجحت..
ممكن يخلق عندك شعور جديد لمعنى الصبر ويقل شعورك بالغضب اذا نجحت..
٥ كيف لازم حاول مرات تانية وتالتة؟
١ اكتب اسباب فشلك الاولى اذا بتقدر من اجل تجنبها في المحاولات التالية، ببساطة وبدون تعقيد.
٢ لاتعيد المحاولة وقت بتفكر انك لازم تحاول. اينشتاين بيقول كل الاختراعات تمت بلحظة عدم تفكير، بل، بلحظة بيكون الانسان غرقان فيها بشي تافه، بلا تفكير وبلا جهد.
٣ عيد المحاولة بدون رغبات مسبقة، يعني بدون توقعات فشل أو توقعات نجاح.
٤ لاتحكي لحدا أبدا انك بدك تحاول تعيد شي. الا اذا كنت بحاجة لمساعدة فنية.
٥ تذكر التالي:
حاول ماتزعل كتير اذا فشلت محاولتك التانية او التالتة. ولاتفرح كتير اذا نجحت لانو، المحاولات هيي تجاربك وليست حقيقتك.
انت حقيقتك هيي جزء الطاقة غير المرئي بالأحرى، انت بحقيقتك طاقة لامتناهية ومتجددة من مصدر إلهي كوني لكنها موجودة بشكل بشري لذلك.
محاولاتك هيي تجاربك المادية وليست طاقاتك اللي لايمكن تتفنى حتى بعد ذوبان الجسد في التراب.
تذكر دوما الأفكار التالية:
ممكن تزيد عندك نسبة السعادة وتنقص عندك نسبة الحزن إذا نجحت ..
ممكن يزيد شعورك بالثقة بالنفس وينقص شعورك باليأس اذا نجحت..
ممكن تزيد عندك المعرفة ويقل شعورك بالجهل اذا نجحت..
ممكن يخلق عندك شعور جديد لمعنى الصبر ويقل شعورك بالغضب اذا نجحت..
النجاح والفشل بيعلمونا حكمة خالدة وهيي:
انو نحنا طاقة متجددة مرتبطة بمصدر لاينضب من الطاقات.
كل مازاد احساسنا بدون كلام أو تعريف أو توصيف بهالطاقة اللي فينا كل ما عشنا بنجاح شبه مستمر.
كل ماخف احساسنا بهالطاقة كل مازاد شعورنا بالفشل.
نحنا متحدين بالطاقة الكونية شئنا أم أبينا، نحنا اللي منختار انو نكون متحدين معها أو بعاد عنها.
اعتناق أفكارنا وتصديقها بيبعدنا عنها. قبول اللحظة اللي نحنا فيها بدون تفكير بيقربنا منها.
3 окт 2024