ليه النرجسي بيقبل أي معلومة / ليه سهل جدا خداع النرجسي؟
هل العقل الواعي فيه مشكلة؟ ازاي تستغلي سذاجة النرجسي؟
العقل الواعي للنرجسي مركز كل التركيز على تصيد الكلمات السلبية وبالتالي هو في حالة تشبه التنويم المغناطيسي التجربة اثبتت انه سريع الاستجابة للكلمات السلبية وبالتالي فهو طول مابيسمع أي كلام مخه منشغل باصطياد الكلام السلبي او بالحذر من النقد والهجوم من الاخر وبالتالي عقله الواعي مش بيقوم بعملية الحراسة للمعلومات بالشكل المطلوب ،فلما تيجي معلومة غير منطقية تتقال له فالعقل الواعي بيسيبها تدخل بدون مايقارنها بالمعلومات اللي عنده فالنرجسي يصدقها حديكم امثلة لسذاجة النرجسي وازاي تقدر زوجة النرجسي انها تستفيد من السذاجة دي
مثلا كان في فترة بتنتشر فيها فيديوهات عن البيض الصيني البلاستيكي كلام بالنسبة للناس العاقلة عبارة عن تخريف لان مستحيل حد يعمل حاجة بلاستيك شبه البيضة والناس تاكلها وماتدركش انها مش بيضة ، كمان الكابوتشا او الخس البلاستيك ومؤخرا اللحم المفروم اللي معمول من كراتين البيض ،كل دي معلومات مش مغلوطة وبس لا فيها استخفاف بعقل المتفرج زي جهاز الكفتة كدة بتاع فيروس سي اللي طلع بعد ثورة ٢٠١١ ،كل دي حاجات لما بنشوفها بنقول ايه الهبل دة ليه لان المعلومة بتيجي تدخل المخ بتلاقي العقل الواعي يقارنها بالمعلومات اللي عنده فيلاقيها متناقضة معاها فيرفضها ويقول لك لا المعلومة دي غلط مش حاخدها فانتي تقولي ايه الهبل دة ،طيب ليه النرجسي مش بيحصل معاه كدة؟ لان حارس المعلومات بتاعه نايم زي ماقلنا هو مشغول جدا في حراسة الطفل الداخلي بتاع النرجسي اللي قاعد مرعوب جواه من النقد والاذى اللي شافه ومش عايز يشوفه تاني فمش فاضي لبقيت المعلومات فبيصدق كل حاجة واي حاجة تتقال له ،لكن خدي بالك معاكي مش بيحصل كدة ليه؟ لانك أصلا مصدر الوقود فلازم حارس المعلومات يكون مركز معاكي جدا جدا عشان مايفقدش السيطرة عليكي ، طيب ازاي حنستفيد من المعلومة دي او من سذاجة النرجسي وهو مركز معانا ؟ حقولك ازاي ، فيه أوقات النرجسي مش بيكون مشغل مخه معاكي نهائي وانتي لازم تتصيدي الأوقات دي وكل نوع من أنواع النرجسي له أوقات معينة مش كلهم زي بعض ،يعني مثلا النرجسي الجسماني حارس المعلومات بينام عنك لما بيكون محتاج للعلاقة الحميمة وخصوصا لو انتي بتعرفي تلبي كل طلباته فيها ، النخبة كذلك و النخبة والعقلاني بينام حارس المعلومات بتاعهم في حالة الاندماج في الكلام العلمي او في حالة المناقشات العلمية او المحاضرات التثقيفية اللي بيديها لك او بيديها لاولادك ، النرجسي الضحية في اثناد شكواه من العالم ومن الناس ووهو بيحكي تاريخه المؤلم والآمه واحزانه ، المرح لما بيكون بينكت وفي حالة ابتهاج والخفي في دورة الابتهاج ،والظاهر اثناد ما انتي بتمدحيه او أي حد بيمدحه ، دي الحالات اللي النرجسي بيكون شبه منوم فيها مغناطيسيا وانتي تقدري ترمي له معلومات حيقتنع بيها بس مش حيبين لك انه اقتنع ولا حيرد عليكي لكن حتتفاجئي انه بيكررها لك او لغيرك على انها أفكاره الخاصة وممكن يكون فعلا مش فاكر انه سمعها منك ليه لانها دخلت عقله بدون مايشعر دخلت وهو منوم مغناطيسيا ، واكيد اكيد كلكم جربتوا الحكاية دي انه ياخد معلوماتك وافكارك ويقولها وينسبها لنفسه ، مش دايما بيكون مش فاكر انها افكارك لكن كتير جدا بيتخيل انها أفكاره هو، زي ما انتي بتفكري بعقله وتتهمي نفسك باللي هو بيتهمك بيه ويتهيأ لك انها افكارك وهي أفكاره هو اللي زررعها جواكي وانتي برضه منومة مغناطيسيا .
طيب ايه الأفكار اللي مفروض تزرعيها في الأوقات دي عشان تكون مثمرة لحياتك وحياة اولادك؟ عقاب الكبر والخوف من ربنا وعواقب الظلم ، الاعمال اللي ممكن تنقذ من النار والكرم مع الاهل اللي هم الزوجة والأولاد لانه كدة كدة كريم مع اهله ، وخيركم خيركم لاهله ، عشان تعملي دة لازم تقرأي كتير وتعرفي الاحاديث المهمة ، كمان من الأفكار اللي ممكن تزرعيها ،ان المشاعر مش ضعف وان الانسان بدون مشاعر حيوان ناطق لان معظمهم مجمد مشاعره بمزاجه ، كمان ان الانسان قيمته في الداخل مش في الخارج وقيمته من نفسه مش من الاخرين ، كل دي أفكار النرجسي بيختزنها وبيفكر فيها واحيانا بيبدأ يبحث ويدور وخصوصا خصوصا ايه اللي ينقذه من النار وتلاقيه بيحاول يصلي ويحفظ قرآن ويحاول يعدل نفسه ،لكن طبعا مش دايما بينجح بس ع الأقل حيقل اذاه عنك وعن اولادك شوية ولما تخوفيه بربنا بيرتدع ،طبعا احنا بنتكلم بعيدا عن الخبيث والمستوى الثالث
كمان ممكن تزرعي فيه ان الراجل الاحسن اللي بيصرف على زوجته وأولاده كويس هو دة اللي يتقال عليه راجل وحاجات من هذا القبيل وكل واحدة تشتغل على مشكلتها معاه
28 июн 2022
