محمد النصري اغاني طمبور
كلمات وألحان ..محمد احمد الحبيب
نحلة في عُشّ الدَبابير
يا سلام يا طِفلَة .. يطراكِ الله بالخير
يا حكاية نحلة في عُشّ الدَبابير
والعسل أُمَاتنا في بعض التفاسير
حَرَّمَنُّو علي الرسول .. قالَن مَغافير
طفلة من ولدوها .. ما بتعرف طوابير
لا رأت سَبّورة .. لا شافت طَباشير
لما كانت تسعى .. تصحى مع البواكير
وفي المغيب الرجعة كانت عايشة كالطير
في البيوت خدامة .. شان ما تسأل الغير
والزمان وداها لي زول مُو وَشِي خير
ما لاحظ براءة البسمة .. ما بَيقرا التعابِير
قلبو مَنزُوع رحمة خالي من أيَّ تأثير
غَرَّ بيك يا طفلة من دون أدنى تفكير
وما نَعوك للذِكرى .. تَنعاكِ الطنابير
ما اتعرف مَثْواها .. واحدين قالو في السير
والبِقول شافوها فُوق عِدّ أُم جَواسير
البحر ما شالا .. مُويتا في المواسير
وما معَ بنوتنا .. ساعة فَاتّن الجِير
إختفت مَجهُولة سِرَّها ماهو في بير
تَعرِفو العاقُولة .. والقَطَا والسَنانِير
يوم حكيت للزاهية قُتَّلا زي ده شِرير
وقُتَّ ليها ادعِيهو .. قالت دي المقادير
ربّي يغفر ليهو ويشرح قلبو للخير
ويهدي يصلِح حالُو شان ما يفسِّد الغير
يا سلام يا زاهيَّة قلبِك مَعصرَة خير
وكُلّ شَيء بالفِيهو يَنضَّح كالنوافير
22 сен 2024
