محمد نسيم قلب الأسد 

اللى قرا من حضراتكم سلسلة قصص رجل المستحيل أدهم صبرى.. هيفتكر العميلة الاسرائيلية سونيا جراهام اللى استغلت فقدان أدهم صبرى ظابط المخابرات المصرى للذاكرة.. واتجوزته علشان تخلف منه.. وبكده تكون قدرت تنتصر عليه بعد ما فشلت تهزمه وهو لسه فى وعيه..
فاكرين القصة دى؟.. طيب ايه رأيك بقى ان القصة دى حصلت فعلا فى الحقيقة.. لكن بتفاصيل مختلفة أغلب الظن انها مش مقصوده.. وخلينى أحكيلك..
فى بداية التمانينات.. كان فى شاب مصرى اسمه هشام الدين نسيم.. اتعرف على بنت اسرائيلية جميلة اسمها فيريد ليفوفيتش.. بعد شوية وقت العلاقة تطورت وحبوا بعض.. وبعد كمان شوية وقت اتجوزوا عرفى.. وحصل حمل.. مبروك المدام حامل.. لأ مبروك ايه مينفعش.. هو ايه ده اللى مينفعش.. أنا بالذات مينفعش أتجوز اسرائيلية.. ليه انت تبقى مين؟.. أنا هشام الدين محمد نسيم.. ابن ظابط المخابرات المصرى محمد نسيم.. الملقب بقلب الأسد..
طبعا صدمه كبيرة جدا.. ابن قلب الأسد اللى دوخ جهاز الموساد .. ابنه يتجوز اسرائيلية ويخلف منها كمان؟.. مستحيل.. لكن هو ده اللى حصل..
وخيلنى أحكيلك الحكاية من الأول..
ظابط المخابرات المصرى محمد نسيم خلف ولد وسماه هشام الدين.. هشام كبر واتعلم وبقى مهندس ميكانيكا اد الدنيا.. وبعدها اشتغل فى مجال السياحة وكبر فى شغله لحد ما بقى عنده قرية سياحية فى سينا.. ولأن هذا الشبل من ذاك الأسد.. هشام كان متفوق جدا فى رياضة اسمها التحدى البشرى.. لدرجة انه دخل موسوعة جينيس 3 مرات.. وده بعد ما قدر انه يعبر بحر الرمال الأعظم فى 5 ساعات بس.. فى حين ان الناس اللى نظمت المسابقة قالت ان مستحيل حد يقدر يعدى المسافة دى فى أقل من 12 ساعة..
المهم.. فى بداية التمانينات كانت مصر وقعت معاهدة السلام مع اسرائيل، والبعض تخيل ان الدنيا هتدأ بين الطرفين.. وفى الوقت ده اتعرف المهندس هشام محمد نسيم على البنت الاسرائيلية فيريد ليفوفيتش..
حضرتك تقولى يعنى من بين كل بنات الدنيا ميحبش غير دى.. أقولك هو نفسه قال كده.. وهحكيلك ده دلوقتى..
عجبه فيها تعاطفها الشديد مع العرب.. وهجومها الشديد على بلدها.. لدرجة انها رفضت الخدمة فى الجيش الاسرائيلى.. ورغم اننا لو طبقنا نظرية المؤامرة هنلاقى ان ده التصرف الطبيعى منها.. خصوصا لو قارنته بتعاطف الجاسوس المصرى رأفت الهجان مثلا مع اسرائيل خلال تنفيذ مهمته.. ما هى أكيد مش هتيجى تقولك أنا بكره العرب وعايزاك تحبنى.. لكن ورغم رأينا ده إلا إن المهندس هشام محمد نسيم كان ولايزال مصدقها.. زى ما هتقرأ تصريحاته اللى قالها فى حوار صحفى سنة 2009.. هسيبلك الحوار فى المصادر مع الحلقة..
هو مصدقها وبيثق فيها جدا.. واللى زود ثقته فيها انه اشترط عليها تعلن اسلامها لو ارتبطوا.. وفعلا أسلمت.. ارتبطوا.. شوية واتجوزوا عرفى.. وكان الاتفاق تأجيل الإنجاب.. يأجلوا الخلفة يعنى.. لكن اللى حصل هو انهم بسبب غلطة غير مقصودة حصل الحمل.. وهنا كانت الصدمة التانية.. وخصوصا لوالده ظابط المخابرات المصرى محمد نسيم.. أو قلب الأسد.. اللى قال لابنه المهندس هشام انت غلطت غلطة هتفضل تدفع تمنها طول عمرك..
اللطيف ان الزوجة الاسرائيلية قابلت الظابط محمد نسيم.. حماها يعنى.. واتكلمت معاه واعتذرت له وقالت له أنا اسفه على اللى حصل.. مكنتش أقصد.. لكن أحيانا مش بنقدر نتحكم فى كل تصرفاتنا..
وبالرغم من كده إلا إن الظابط محمد نسيم كان فى حالة نفسية سيئة جدا.. وتوفى بعد ما أُصيب بجلطة.. هل الجلطة بسبب حزنه .. منقدرش نُجزم بده أو ننفيه.. لكن محدش يقدر ينكر ان اللى حصل سبب له صدمة كبيرة جدا.. خصوصا وان ده الراجل اللى كان مدوخ الموساد .. ولسه لحد النهاردة التاريخ بيخلد عملياته سواء تدريب الجاسوس رأفت الهجان.. أو تنفيذ عملية الحفار اللى شرحناها بالتفصيل فى حلقة الحفار.. أو عملية إيلات.. وغيرهم من العمليات الكتير..
ايه اللى حصل وازاى؟.. هقولك...
المصادر
tinyurl.com/xw9pn9v
tinyurl.com/xw9pn9v
tinyurl.com/tp558bym
tinyurl.com/4vfhsx7y
tinyurl.com/5m7rv56
tinyurl.com/hf9p35w2
#محمد_نسيم #قلب _الأسد #المواطن_سعيد