صدمة مدبولي الأولى !!
___________________________
🛑 زيادة الأسعار
_____________________
🛑 زي ما كان متوقع . لجنة تسعير المواد البترولية قررت رفع أسعار البنزين بكافة أنواعه والسولار، بما يتراوح بين 1.25 إلى 1.5 جنيه،
للمرة الثانية خلال 2024 وتثبيت المازوت،
🛑 تثبيت المازوت معروف علشان محطات الكهرباء لكن رفع أسعار السولار 15% بكل تأكيد هيكون له تأثير على أسعار كل السلع في مصر !!
🛑 رئيس الوزراء مخباش حاجة امبارح وقال إن الحكومة هترفع أسعار العديد من الخدمات خلال الفترة اللي جاية بشكل تدريجي خلال سنه ونص حتى لا يؤثر على معدلات التضخم،
🛑 خد بالك إن صندوق النقد أجل مراجعة قرض مصر الايام اللي فاتت للسبب ده .. الصندوق كان مستني قرارات رفع الدعم،
🛑 خد بالك بردو الدولة لو كملت في دعم المنتجات البترولية هيخفف الضغط على الناس مؤقتاً لكنه هيزود عجز الموازنة، اللي هو من أهم مسببات التضخم،
🛑 يعني ببساطة تأجيل او عدم رفع السعر مش حل لا هيوجعك بردو عجز الموازنة ده هو اللي خلق أزمة دولار وأزمة الدولار خلقت أزمة كهرباء وأدوية وأسعار مرتفعة !!
🛑 البنك المركزي
_______________________
🛑 البنك المركزي المصري عمال يسحب تريليونات من البنوك أخرهم سحب 947.1 مليار جنيه سيولة من السوق،
🛑 البنك المركزي بيسحب من الجنيه الزيادة في البنوك، البنوك بتخسر بركنة الفلوس، والبنوك ملتزمة بقرار المركزي برفع الفايدة، للسيطرة على التضخم، ورفع الفايدة يعني سيولة كتير في البنوك، وقروض أقل، فتكدس الفلوس في البنوك بيعمل خساير للبنوك،
🛑 البنوك المفروض أنها تشغل الفلوس وعشان تدي فايدة الفلوس دي، لصحابها فتقوله إلحقني يامركزي، حل بقى مش أنت اللي رفعت الفايدة وعشان تحتوي التضخم، ألحقنا ألا نفلس،
🛑 هنا المركزي يدخل ياخد منهم الفلوس الزيادة، ويدفع فايدة عليها من جيبه، رغم أنه شبه مش بيشغلها يعتبر وطبعًا الفايدة اللي بيدفعها من جيبه دي، بتترجم خسارة في نهاية السنة.
🛑 توقعات رويترز
_______________________
🛑 توقع استطلاع عملته "رويترز" تراجع قيمة الجنيه مقابل الدولار وخفض سعر الفائدة وتباطؤ معدل التضخم خلال السنتين اللي جايين 2025 و2026،
🛑 الجنيه هيتراجع إلى 49.50 جنيه بحلول نهاية يونيو 2025، ويوصل إلى 52.50 جنيه بنهاية يونيو 2026،
🛑 خد بالك ده عكس توقعات بنوك زي جولدمان ساكس أو بنك أوف أميركا اللي بيتوقعوا صعود للجنيه او على الأقل إستقرار،
🛑 وتوقع استطلاع رويترز يبلغ معدل التضخم السنوي 20.5% في 2024-2025 و12.05% في 2025-2026،
🛑 وتوقع المحللين في استطلاع رويترز، أن تنخفض الفائدة في البنك المركزي إلى 21.25% بنهاية يونيو 2025 و15.25% بنهاية يونيو 2026.
🛑 ضيوف مصر
____________________
🛑 رد الدكتور مصطفى مدبول على الاتهامات أن اللاجئين القادمين من السودان وسوريا واليمن بيساهموا في ارتفاع تكاليف المعيشة وأسعار الإيجارات في مصر،
🛑 وقال مدبولي دول “ضيوف مصر” ولا ينبغي تضخيم الموضوع،
“بلدنا دائماً مقصد للعديد من الناس، وإحنا كمصريين نستقبلهم كضيوف، ولا نقوم بوضعهم في معسكرات أو ملاجئ كما تفعل بعض الدول،
🛑 وقال أن اللاجئين يتمتعوا بنفس الحقوق اللي بيحصل عليها المواطنين المصريين، ولكن يجب عليهم الالتزام بالإجراءات والأنظمة اللي تضعها الدولة. و“المخالفين هيواجهوا إجراءات صارمة.”،
🛑 وقال “بعض هؤلاء الضيوف ساهموا في استثمارات وأنشطة اقتصادية ساعدت في نمو الاقتصاد المصري، وبالتالي لازم نشوف الإسهامات دي بشكل إيجابي بدل من النظر إليها بمنظور سلبي.”
🛑 محافظ إسكندرية
_________________________
🛑 الاسكندرانية مبيعجبهمش العجب .. لكن دي اول مرة من بعد اللواء عبد السلام المحجوب اشوف الاسكندرانية مبسوطين بمحافظ،
🛑 الفريق أحمد خالد محافظ اسكندرية شغال كويس حكلات يومية علشان الشوارع ترجع لطبيعتها بعيد عن بلطجة الاشغالات والباعة الجائلين،
🛑 القريق احمد خالد اللي مش بيظهر اعلاميا كتير او بتاع شو كان قائد لقاعدة مطروح البحرية، ثم قاعدة البحر الأحمر البحرية،
🛑 بعدها رئيس أركان قاعدة الإسكندرية البحرية، ومساعد لرئيس أركان حرب القوات المسلحة، ورئيس لشعبة العمليات البحرية، ورئيس لأركان القوات البحرية، وقائدًا للقوات البحرية في 17 ديسمبر 2016.
🛑 وصدر قرار جمهوري من الرئيس السيسي في 14 ديسمبر 2021 بتعيين الفريق أحمد خالد حسن قائدًا للقيادة الاستراتيجية ومشرف على التصنيع العسكري بدرجة نائب وزير.
🛑 خد بالك الاخوان بيكرهوا لانهم مقتنعين انه كان صاحب فكرة نقل مرسي من الحرس الجمهوري للقاعدة البحرية في اسكندرية وكان المسؤول عن تأمينه وقتها.
🛑 كلمة نتنياهو
______________________
🛑 أول مرة أشوف برلمان بيسقف أكتر من عندنا .. التصفيق والتصفير من النواب الأميركيين لكلمة نتنياهو وصل إلى عدد قياسي أحصاه موقع "سكاي نيوز عربية"، بـ 81 مرة في الكلمة خلال 52 دقيقة،
🛑 معدل التصفيق لنتنياهو داخل الكونجرس، كان مرة كل 40 ثانية !!
🛑 «نتنياهو» قال إن «7 أكتوبر يوم سيبقى في التاريخ» وإنه أد 11 سبتمبر 20 مرة،
🛑 اما باقي كلمته كلها كذب مش مهم حتى الكلام عنه.
#الاسعار #البنزين #السيسي #الاسكندرية #تسونامي #الذهب #الدولار #جون_المصرى #غزة #الامارات #نتنياهو #محمد_بن_زايد
6 сен 2024