ما عليك سوى الانتساب إلى هذه القناة للاستفادة من المزايا:
/ @amsubh
Mn...
يقول من قلبه تزايد هيامه
فوقه رحا بقعا تطاحن لواحيه
يا حافرٍ للكنز تسعين قامة
خذ كنزٍ أعظم منه واحفظ معانيه
خذ ما يفيدك في نهار القيامة
وتنزّحك من جور بقعا قوافيه
لا تصحب الا كل راسٍ وهامة
والا الذنب يلقى شبيهٍ يخاويه
بجاحةٍ تلقى وراها سلامة
ولا حَياً جاب المطمّه براعيه
من لا يثمّن في المجالس كلامه
يطيح فيمن يصمخه لين يعميه
الطِيْب بَيّن والرخامه رخامة
والناس متساوين لولا المشاريه
والعلم لا جاء من كبير العمامة
كلٍّ بدل ما في فمه قال لبّيه
الخبل دايم ما يردّه خطامه
والقرم ما يحتاج قرمٍ يوصّيه
من يحسبنّ الذيب مثل النعامة
لو يرمي طويقٍ بكبره بيخطيه
من لا يبدّي للنشامى سلامه
عَدّه والى مرّيت به لا تحيّيه
ما كلّ رَجّالٍ خواله عمامه
يقضي لزومٍ جيت تبغاه يقضيه
احدٍ مثل نور القمر في تمامه
واحدٍ ظلامٍ تايهٍ من يقدّيه
احدٍ حسامه ما ذبح له حمامة
واحدٍ حسامه فالمصايب ينجّيه
كم واحدٍ فالناس خانه حزامه
وجاه الفرج من واحدٍ كان شانيه
الناس تدمح كلّش الا الكرامة
ولا فيه إناء إلا وينضح بما فيه
والشور في تركه دليل الغشامة
لا جاك شورٍ طيّبٍ لا تخلّيه
من عاش بين الناس يبغى زعامة
حلو الكرى ما ذاقت العين حاليه
من لا تشيله في المواقف عظامه
ما شاف من عزٍّ سوا اسمه وطاريه
احدٍ فعل كفّه يعلّي مقامه
واحدٍ مقامه فعل كفّه يردّيه
كثر الحذر ما فكّ ظبي العدامة
من صايبٍ بين القرون متمثنيه
حمر البقر ما سلّمته الضخامة
من ناب ليثٍ نشّبه في كلاويه
ولا نقّصت عمر العقاب القرامة
وفرخ القطا ما زاد عمره تتقّيه
ما اخبلْك يمبدّل شداده مسامه
وما ارْداك يملقّي رفيقه علابيه
من لاسقا نفسه ولا اسقا حيامه
مااحدٍ بمسقيها ولا احْدٍ بمسقيه
من يبذر المعروف عند الهلامة
غير الفلَس ما فيه شيٍّ بيجنيه
من ملّك المقرود مقضب زمامه
يصبر على مايلحقه منه ويجيه
من لا يراعي من ضعيف ذمامه
يصبح ذمامه ما لقى اللي يراعيه
والناس يبن الناس لولا الملامة
ما شفت اخٍ منهم يسيّر على آخيه
ولولا الثنا ماتت علوم الشهامة
ولا شفت مَن خربق رصاصٍ ثناديه
من لا تصحّيه العِبَر من منامه
مصيبةٍ وحده طلاق انْ تصحّيه
بين البياضة دايمٍ والسحامة
مكانٍ اقشر جنّبه لا تجي فيه
العزّ شمسٍ والمذلّه عسامة
يكفيك من مي ازرق الجمّ صافيه
الصيرمي لا جاك زادك صرامة
والا الجبان يحطمنّك دواديه
بالك عن الهالك تنشّد علامه
وانشد عن الناجي وش اللي منجّيه
عزي لمن زاد اليتامي طعامه
يا ويله من الله بساعة يلاقيه
ان كان في بعض التعجل ندامة
كم فات رزقٍ صاحبه من تباطيه
ناسٍ تزيد اهل الفخامة فخامة
وناسٍ من تجيه متعلّي تدربيه
يا كَرشها والا الفقار وسنامه
قدرك وكلّ انسان قدره بأياديه
ايامنا بين العوض والغرامة
انسان تاخذ منه وانسان تعطيه
احدٍ بنى فوق الثريا خيامه
واحدٍ تحَت،في سابع ارضٍ مبانيه
من لايصلّي وش كسب من صيامه
إلاالعطش يصلاه والجوع صاليه
كم من قزم زاده غروره قزامة
وكم محسنٍ زاد التواضع حسانيه
طيبٍ مع الخايب يزيده لئامة
وطيب مع الطيّب يزيد الوفا فيه
احدٍ على مَن جاه ماطر غمامة
واحدٍ على من جاه نارٍ تلاظيه
بيموت ما حقّق بيومٍ مرامه
من لا مشى في لازمه لين ينهيه
من لا يسنّ غلامه أفسد غلامه
واليا كبر خيّب غلامه رجاويه
في الحكم رجّالٍ يحلّل حرامه
كافر ومن حرّم حلاله مساويه
من لا خلع عن وجه بقعا لثامه
قامت تشاوح به فنايع لياليه
خمسٍ من الاسلام تكمل لزامه
شهادتينٍ ثمْ صلاةٍ تذرّيه
ثم الزكاة تطهّره من أثامه
والرابع صيام رمضان ومواريه
حسب الأهله عند ربي نظامه
والحج عند الاستطاعه تؤدّيه
اليا زعل منك النذل في قمامة
واليا زعل طيّب فحقّه تراضيه
في الطيّبين من المراجل وسامة
في كل وجهٍ غيهب النور غاشيه
وفي الخايبين من الرخامة دمامة
في كل وجهٍ قارٍ اسود مغطّيه
الحرٍّ حرٍّ واللمامة لمامة
الله يعين اللي من الناس قانيه
لعيون مجمولٍ يرودع وشامه
كم غاليٍ في الناس يبكيه غاليه
احدٍ قصر دون الطويلة لجامه
واحدٍ وصل من كل علمٍ حراويه
احدٍ على السفلى هفا به فطامه
واحدٍ على العليا رقت به مجانيه
احدِ على الماجوب جاله قوامه
كم من قعودٍ برّكه في صوانيه
واحدٍ عن الواجب ضرب له مهامه
يحتجّ بأدنى معذّره لا يسوّيه
ومن لا يحني دم الاعدا حسامه
والا بدمه سيف الاعدا تحنّيه
راح الشيوخ اهل السلف والجهامة
وجانا زمانٍ سابقاته مخازيه
في المجلس احدٍ كنّه ابو دلامة
واحدٍ رزينٍ كلمته ما توطّيه
من لا سرى في الليل خشية ظلامه
يجيه من سرّ الدهر ما يسرّيه
وعداد من حلوا قصور اليمامة
لا راح وفد جاك وفد متقفّيه
وعدة حصا كشبٍ ورمل الثمامة
على احمد المختار طابت مساعيه
ازكى صلاة طيّبه في ختامه
ينهي بها شاعر مضر هيض خافيه
والقصيدة اطول من ذلك.
ناصر الفراعنة
مناصر ناصر
شاعر الجن
شاعر الثقلين
شاعر الإنس والجن
25 окт 2022