السلام عليكم صباح مبارك للجميع منذ التزامي بديني واتباعي لسنة رسول الله صلى الله عليه وسلم امتلأت نفسي ثقة وايمان لم تعد الحياة وصعوباتها تزعزع هذا الايمان لان مصدره القرب من الله وحتى لو تعثرنا مرات لا للاستسلام بل نعم للنهوض والنجاح والتالق الحب والتقدير لك اخت الفاضله ولكل امرأة واثقة وواقفة
بارك اللّٰه فيك اختي نجاح موضوع في غاية الأهمية اختي نجاح اخواتي الكريمات الصراحة تقال انا قبل ما نتغرب ما ماكانتش عندي الثقة بالنفس بالرغم اني لاباس بيا ما خصني والو ومربيين والحمدلله لكن كنا في مجتمع لازم يديرو فيك لولة انا كنت نحشم بزاف حتى هذيك الحشمة ولات خوف كانوا بعض الناس من قوة الحسد والغيرة اللي فيهم رجعوك انت ما شي مليحة ما شي كيما هما حاطين روحهم خير منا وطبعا بتشجيعات الاهل انتاعهم واحنا الأهل انتاعنا رباونا غير على كلمة اسكتي معليش بلاك يقولوا غارت بالاك بقولوا حسدت امبصح بلاك الأهل انتاعنا ما ربوناش على الثقة بالنفس لكن علمونا كيفاش نديرو الواجب مع الناس مع الوقت عرفت بلي الواجب وحسن معاملة الناس غطات بزاف على الثقة بالنفس كان بزاف ناس اللي علموهم الأهل انتاعهم الثقة بالنفس لكن ما علموهمش بأن بين الثقة بالنفس والغرور شعرة لكن عندما تغربت اكتسبت الثقة بالنفس من معاملة الغرباء معي ويخلوك تحبي نفسك بالسيف عليك ومن المفروض هذا يكون في المجتمع الاسلامي رجعت نقول لا للشيء الذي لا يعجبني ونعم للشيء الذي يعحبني وما نحشمش ما لازمش نشوف نفسي بطريقة سلبية لازم تكون عندي ثقة بنفسي بعد التوكل على اللّٰه وحسن الظن بالله لازم علينا نحدد قيمة أنفسنا ما لازمش نصغرو نفوسنا رجعت نقول لازم نشوف روحي كيما انحب انا ما شي كيفاش يشفوني الناس لازم اذا طحت انوض وحدي ما نبقاش نستنى شكون اللي ينوضني واللي يجوز يعفس عليا حتى ولادي قلتلهم اقعدوا بالسيرة الحسنة انتاعكم لكن ما تصغروش روحكم قدام غيركم اهدرو وراسكم مرفوع خاطر ربي كامل خلقنا كيفكيف ما كاش واحد احسن من الآخر الا اذا احنا حبينا نذلو روحنا وفي الاخير لو كانت القيمة تقاس بالوزن لكانت الصخور اغلى من الألماس لذا لا نصغر من أنفسنا امام فخامة الاخرين لأن الدنيا قش في قش واللي ينفخ روحو ينفش بارك اللّٰه فيك اختي نجاح وجمعة مباركة للجميع 😘💕
Oum Ayoub كلامك يدل على شخصيتك القوية وثباتك ودرس لمن لا ثقة لأنفسهم ومن يربي أبناءه على الكبت وقتل الثقة في أنفسهم مما يولد أبناء ضعفاء نفسيا ومعقدين شكرا لك
اييييه فكرتيني بوحد لجرح قديم الحمد لله بريت منو بقوة شخصيتي وارادتي وحبي لعائلتي حبيت نكون عونهم وسندهم باش يكبرو ولادي أقوياء أو يتقدمو فلحياة كما تمنيت انا بدات قصتي كي كان في عمري 13 سنة وليت نحس كي نمشي مجينية ولعضمة تترتق وتوجعني شكيت لأهلي مصدقونيش وبداو لغوماغك كي وصلت 15 سنة يضحكو عليا ويقولولي وعلاش كي تمشي تتزعبلي سقمي روحك وانا وليت كي نمشي نعس روحي نزير روحي والو كرهت روحي أو وليت نحشم نمشي قدام الناس ولفاميلية روماركاوني ويضحكو عليا حاسبيني نتزعبل وليت نقعد فدار منحبش نخرج وتراجعت فلمسيد بعدما كنت نجيب تهنئة وليت لوحة الشرف المهم جازو ليام وانا مشومبرة منخرجش غير لمسيد أو كي يحتمو عليا نخرج نشري نروح بجرية ونولي بجرية باش ميشوفونيش الناس تدهورت نفسيتي وديما نخمم بلي انا ناقصة أو معوجة ونبكي حتى النفس يتقطعلي تفاقمت حالتي وداوني لطبيب لعضام وهنا كانت المفاجأة رجليا ولاو ماشي قد قد جاني ورم اتسل عضام رجلي وكبر الورم حتى أثر على نمو رجلي وليت عايبة ايه الناس يضحكو عليا وانا فلحقيقة عندي ورم تبريزيت تحطمت مات قلبي واحساسي بلفرحة وكرهت الناس وماخلاصتش معاناتي درت عمليات باش يستاصلو كل الورم مقدروش جوزت انتاجاتي يقراو وانا نبكر مع صباح على 5 نروح لدزاير لبرد أو رخامة لمقلاصيا فسبيطار جامي ننساها والألم تاع لعضام عشت بيه ليل نهار ولا جزء من حياتي المهم مابقالي والو قعدت نطبع روحي فلقراية ونجيب عوامي ولبست صباط كبير على صباط باش نقدر نمشي مليح وهنا زدت تشوكيت لي يقراو معايا كي نطلع للصبورة يعسو صباطي ويضحكو يتغامزو ورجعوني شغل تافهة وبهلولة وليت منحبش نطلع للصبورة يعيطو عليا شيوخا وانا والو نحمل لعياط ولا نضرات الاستهزاء المهم تعدبت بزاف وشديت منداك نضعف منداك ندير لروحي لكوراج حتى جبت الباك أو رحت للجامعة قريت وتخطبت وتزوجت وعايروني فاميلة راجلي على مشيتي وضحكو عليا بصح انا قويت خلاص واحد ميطيحلي لمورال شاطرة فدار أو قايمة بولادي الكل يشهدلي ربي عوضلي واعطاني قوة واحد ميقدر يهزني ولا يقيسني انا نفتخر بروحي أو بدبلوماتي نفتخر بشجاعتي أو مثابرتي رغم الألم والضعف والهوان لي عشتهم وديما نشجع أولادي وندعمهم ياريت تدو عبرة محكايتي وترحمو رواحكم وتقدرو أنفسكم رغم عن أنف المستهزئين
السلام عليكم و رحمة الله و بركاته ،انا في رايي الثقة في النفس ليست وراثية بل مهمة الوالدين في مشوار التربية ،كلمة منهما تبني او تهدم ، فهما المسؤولان الرءيسيان في بناء او هدم الشخصية و من ثهمة تكوين فرد يثق في نفسه او لا يثق في نفسه .التربية عملية معقدة و شاقة لان الاطفال كثيرا ما يتاثروا بالوالدين و هنا الكارثة ! الله المستعان .
موضوع مهم مهم التقة في النفس مرتبطة بشخصية الانسان كيفاش تربى ووين تربى والديه كيفاش عاملين بالمختصر سلسلة مترابطة ، تقة في النفس مهمة الا ماشي لنفسك لولادك لان الاولاد يستمدو التقة من الوالدين بصح صراحة في وقتنا انفقدت التقة في النفس بزززاف ،عن نفسي كل مرة كيفاش نكون حسب الضروف ولكن الحمد لله بفضل ربي صامدة ناخد قوتي من كلام ربي لي هو القرآن الكريم هو يعطيني تقة كبييببببرة في نفسي في حياتي الحمد لله (وكفى بالله وكيلا) بارك الله فيك لعزيزة نجاح
سلام انا واحدة من ناس الي مدايراش الثقة فى نفسي تالمون عشت مع ناس ينتقدوني فى كلش شكرا لك على كل ماتقدميه وعلى كا ما ترويهلنا ماعنديش بزاف ملى عرفتك فى رمضان 2019 ودورك دايما نسمعك ونشوف لفديو تاعك الله يعطيك الخير والثقة فى قلوب جميع الى يحبوك سلام🌹🏵🌸💐🌼🌺🌷💐💐💐💖💖💖💖💖
صباح الخير والحب انا من متتبعاتك و محباتك بزااف اليوم راح نفتحلك قلبي كنت صغيرة اكثر انسانه ما عندهاش ثقه بالنفس مع انو جامي تضربت ولا تعايرت لا من والديا ولا من عماتي لي ربَّاوني مي نحشم نرفد ستيلو يطيحلي من طابله نحشم نهدر معلومه علابالي بيها وحتى لقسم كامل ما عرفهاش ينوض قلبي يخبط يخبط ونحب نقول وما نقدرش و بزاف و بزاف مواقف ما نوجعلكش قلبك 😭😣 المهم كي كبرت وطلعت للجامعه و تخصصت ولقيت بلي راني متفوقة فالفوج تاعي وفالمجموعة انا الاولى عرفت قيمة نفسي بلي نقدر ندير ..و قدرت نتجاوز العقدة لي عندي و عدت نوقف قدامهم و نهدر مسرحة و واثقة من نفسي ووصلت والحمد لله و ضرك كي تزوجت عرفت بلي التجربة تاع الجامعة فادتني و قدرت نواجه الحياة وكون ما لقيتش نفسي راني ضرك ضايعة مع ولادي و زوجي ..... المهم هذي تجربتي مع دنيا وشكرا شكرا ❤💗😍😘
كلام جميل انا كنت شخصية مقدامة قريت وديما امتياز حتي، نهار تزوجت في دار هاديك لا هاديك لا نتي، مرا الذري، الصغيير، عندهم عندو قيمة علي، المرا يعني انا، انوض مالكرسي، علي ولاد لوسي الصغار بصح الحمد لله صبرت ونلت ربي عطاني دار بعيدة 300كلم والله ما علابالي كيفاش جات بصح، كنت كل ما نسجد، ندعي بسكو انضريت لانو حنا بابا ربانا ديما راسنا، مرفوع ودوك الحمد لله كي بعدنا راجلي خرجتو من هاديك القوقعه وصاب بلي عندو مرا فحله وين رحت نسلكها ولا يزوخ بيا مع نسا صحابو متخلوش الزواج يذوب شخصيتكم نحبك طاطا في الله ربي يعطيك كل خير
Leila Chot والله، غير اصبري وتشوفي كيفاش ربي، يفرج وانتي تاني اتكلي على ربي واسعاي على سكنة تاعك، بصح بلا مشاكل يرحم والديك المشاكل ما يديرو والوا وسيي انتي ارفعي المعنويات لروحك وكوني، إيجابية وصفي نيتك وربي يجيبها فالصواب، ان شاء الله
موضوع جميل جدا انا كذلك اعاني من عدم الثقة في نفسي بالرغم من اني متعلمة وام وجميلة الشكل لكن دايما احس بالنقص بين وبين نفسي اشعر بعدم اهميتي في الحياة اخجل من التعبير عن مشاعري والتعبير عن رايي حتى وان كنت على صواب
وانما بذكر الله تطماءن القلوب ربي يهدينا معك حق هناك لا يملكونا من الدنيا الا القليل وبالعزيمة حققوا الكثير اللهم ارزقنا رجاحة العقل وثبات القلب على دينك مشكورة اختى نجاح على هذه اللفة الطيبه لهذا الموضوع
تسلمي عزيزتي الناس التي لاتثق في نفسها يكون ناتج عن تراكمات للتربية الطفل و هو صغير اذا كان الوالدين يستصغرو هذاك الشخص يكبر بقلة قيمة و نقص هي مش وراثة ودائما متألقه عزيزتي لايك
انا من متتبعيك بصمت و ليوم حبيت نكومونتي و نقلك ربي يطول فعمرك و يبارك فصحتك كل ما يهبطو معنوياتي و نفسيتي تضعف نجي نجري عندك و سبحان الله نوض بعزيمة و قوة و نكمل نهاري بدووون ضعف
السلام عليكم، أختي دداح، انا شخصيا قستيني في الصميم، كلامك دوا تقول نعرفك من زمان، ربي يلاقينا في الجنة العليا مع اخواتنا المستمعات، و ألف رحمه على أمك العزيزة اللي خلات موراها ثمرة عطرة مثلك أختي دداح، ربي يعطيك الصحة و دائما في القمة إن شاء الله
جمعة مباركة للجميع، موضوع هام وجميل أنا شخصيا نحس روحي قوية وعندي ثقة كبيرة في نفسي ومازالني لاني مؤمنة كل انسان عندو مزايا معينة مالازمش نحشم بعيوبي مهما كانت ،والعيب في العيب مادامني على خلق ومانديرش في الحرام أي شيء آخر يهون حتى اذا عجبش انسان آخر ،ونعرفو كامل بلي ارضاء الناس غاية لاتدرك، لهذا الثقة في النفس هي ارضاء الخالق إرضاء النفس وطبعا الحبوني رح اشفوني خيار الناس ولي ميحبونيش ميهمونيش ورايهم فيا آخر همي، لانهم اشوفوني بعين الغيرة، الانسان يطور نفسو بالشيء القدر في جميع المجالات ومش محتم نكون طوب المهم المحاولة، الموضوع طويل وشيق المهم كيما قالت الاخت دداح البعد عن الناس السلبية غنيمة والرضا ثم الرضا رغم كل شي.
جازاك خيرا نصيحة لكل ام لا تتركي الاساتذة يعيثون فسادا في ابنك لان كرامته قبل اي تحصيل علمي خاصة وقتنا هذا كثرت فيه الامراض النفسية و عندك الحق في كل كلمة قلتيها ربي يحفظك
طولي وزيدي لوكان نسيب متسكتيش اامهم كنت البارح عند طبيب القلب تلقيت بوحد الانسانة مشاءالله هي تصبر في النساء لمريضة وتنصح الايمان بالله وتقة بالله ووووو.. اللمهم هذه اللانسانة غدوةعندها عملية فى تذيها عنذها سرطان ادعلها ربي يسلكها على خير
اولادي كل حياتي والله اختي عندك الحق انا مجربتها في صغري فقدت تقتي في نفسي كان اي حاجه نعملها يقلولي ماتعرفيش خلي عليك حتي فقدت تقتي في نفسي منبعد داركت نفسي اصبحت نجرب كلشي حتي ولو فشلت عادي مايهمنيش المهم جربت واسترجعت تقتي في نفسي والحمد لله
Oui vous avez raison la confiance en sois n'est pas héréditaire c'est quoi ça De parler d'hérédité et de la génétique . et la psychologie est un domaine très compliqué et c'est la spécialité la plus difficile en medecine et c'est pas a n'importe qui de faire un diagnostique détaillé Sur ce sujet or la confiance en sois Est un traie de la personnalité qui se forge des l'enfance en prenant en compte des étapes passé tout au long de la vie .
بوركتي يا أختاه. ماشي غير تبري الجرح ، لا ولكن تضربي على المخبي في أعماق الكثيرات مثلي. سبب تعاستي هي:la timidité. الحمد الله ربي رزقني بالكثير من الصفات ولكن شدة الخوف جعلني مشلولة الى درجة وليت تالية في عقر داري. ربي يخليك لينا تحينا من وقت لاخر.
بارك الله فيك😍💕 انا شخصيتي ضعيفة و معنديش قوة الشخصية و لو شيء بسيط....حتى من الكلام .....و حتى بنتي عمرها 6 سنين خجولة بزاااف و ما تحبش تهدر....احيانا الناس ايولو يحكو معاها ما تهدرش..حتى ايقولو راهي مش رح تهدر امها شكون....اي انا........حابا انقوي شخصيتي و بالاخص نحب نكون قدوة جيدة لبنتي.......انصحوني اخواتي.....
شكرا اختي نجاج على هذه المواضيع القيمة. لوكان تقدري ديرينا حلقة على الحشمة الزايدة مع الناس.. قصدي عدم القدرة على قول "لا "للناس خاصة الانتهازيين و المنافقين و الذي يحولنا الى فريسة سهلة للناس من هذا النوع
mouna bell سامحيني يا أختي على التدخل هاذيك يسمونها جياحة . ماتكوني عسل يبلعوك .ماتكوني مرة يطيشوك وخاصة مع الناس الانتهازيين والمنافقين وووو.الخ أرنا كامل عايشين معاهم .وين تروحي تلاقيهم لازم تكوني معاهم هكذا 💪
موضوع في غاية الأهمية تشكرين عليه يستحق النقاش لأنه أساس النجاح في الحياة وما زاد الموضوع جمالا وموضوعية الصور المعبرة عنه مع صوت المحبوبة نجاح شكرا وألف تحية .
ياييياه ما احل كلامك وما اعسله. يانجاح يالعزيزة.شحال نحبك ونحترمك.وعجبتني التصويرةتاع القط الي شاف روحو من هذا الباب ملك الغابة.انا نقولك بغافو عل الكلام المنطقي الي يدخل كالسهم للقلب‘مي مباسرة.لان سهم نجاح ميوليش للوراء.لانك و ببساطة ملكت القلوب العقول.
Walah oukhti Najah tu as parlé de ce sujet mieux que les psychologues et psychothérapeutes et Dieu sais que je regarde beaucoup beaucoup de vidéos sur "comment apprendre à avoir confiance en soi"! Bref, le fait est que les proverbes de nos grands-parents sont d'une sagesse!!! C'est vrai walah tu as (ou plutôt, ils ont raisons) الوجه لي تحشم بيه، قابل بيه j'ai déjà entendu ce proverbe sans y prêter attention! Maintenant, ça m'aide vraiment 👍. En ce qui me concerne, j'ai 40 ans et je souffre d'un immense manque de confiance en moi, pourtant et hélas! J'ai beaucoup de compétences! Mais je n'exploite aucune car qlqs personnes de mon entourage très proche (Allah yahdihoum mais je n'arrive pas à dire Allah ysamahhoum) m'ont cassé pendant longtemps 😢 إهانة، سب، شتمان،يقولولي أنني ناقصة ... et en grandissant leurs paroles raisonnent tjrs dans ma tête. A l'âge de 38 ans j'ai commencé à essayer de ne plus écouter ces personnes mais c'est très difficile car c'est les personnes les plus proches pour moi! Maintenant je souffre un peu moins mais j'ai qlqs crises de temps à autre (je ne sais pas pourquoi) des crises où je n'arrive même pas à sortir de la maison ni à parler aux gens car je me sens "sans intérêt " c'est à dire "ما نسواش" 😢 .... eh oui حطموني. Merci oukhti pour tout 👍👏❤
غبت عن نفسي......غاب الاحساس العميق بداخلي اتجاه اشياء كثيرة اصبحت اكثر هدوء و اطول صمت......غبت عن نفسي.....حتى صرت غير الذي كنت لايرضيني ما صرت اليه و لامعجزة تكفي لاعود هناك!سنوات مضت و انا لست انا ما عدت اعرفني! ضياع روحي ليس بالضرورة علامة على حزني العميق بل حزنا على احلام صارت في المرتبة الثانية بعد ان كانت تحتل الاولوية في قاموسي المفعم بالحياة لطالما تمنيت ان اعود طفلة في هذه الليلة فقط! لاطرق الباب على امي واخبرها اني خائفة جدا و اختبئ في حضنها.....خائفة انا من الحياة
صح انا هاكذا بسبب الخوف وعندي مرض الخوف حتى من الأحوال الجوية والسبب كيما قلتي وراثي /أمي مسكينة بسيطة جدا رغم اننا قرينا وما خصنا والو ماديا ومعنويا /والله صح لكن زوجي دائماً ندعيله عمرو ما رجعني اللور دائماً للقدام حتى كسرت الحاجز ووليت واثقة من نفسي
جمعة مباركة سيدة دداح موضوع في غاية الاهمية يعاني منه ناس من جميع الفئات العمرية والثقةفي النفس تتغرس مند الصغر في الاطفال وتتطور مع العمر يعطيك الصحة على هذا الموضوع ربي يوفقك 👍👍👍👍👍👍👍👍👍👍👍👍👍👍👍👍👍👍
كلامك عسل مشاء الله غيرتي فيا حوايج بزاف متعرفيش وشحال نحبك نحبك نحبك نحبك نحبك نحبك نحبك ونحترمك احترام كبار انتي ملكة بالنسبة لي تعلمت منك الكثير شكرا جزيلا ربي يحفضك ويجازيك كل خير ان شاء اللة تحية خالصة من قلب الى اولاد بلادي جزائرية مقيمة في المانيا
مااحلى كلامك عسل ودوا والله ...انا نقلك برك قصة صغييييرة على بنتي ..مرة جات وقاتلي ماتزيديش ديريلي شعري هاكدا ...كان الدخول المدرسي وشعرها بوكلي ونص متلوق ...قالت البنات يضحكو عليها ...قلتلها بلي البنات غارومنك وماعندهمش شعر كيماتاعك وشباب وغيرو.....المهم قنعتها بلي شعرها شباب مع انو كان عاجبها وكي ضحكو عليها ماولاتش عندها الثقة في نفسها وحبت ترضيهم قلتلها الا درتي كيما يحبو الان راح في كل حاجة يضحكو عليك باه يتسلاو بيك واديري واش يقولو وتولي ضعيفة قدامهم ...وكي كانت رايحة لعشية للمدرسة قلتلها جيبي نطمهولك قاتلي لالا خليه واش دخلهم...بعد ماجات تبكي وماشي عاجبتها روحها راحت وهي مفتخرة بشعرها...وهكذا في كل موقف يواجهها تحكيلي وانا انشجعها ...كانت حينها سبع سنوات والان عشر سنوات والكثير من المواقف تحلهم وحدها اصبحت تثق في نفسها ...وهذه عبرة فقط للامهات باه يعالجو مواقف لي تواجه اولادهم في الصغر وعلموهم يحكولكم كل شيء هكدا راح يتعلمو الثقة في النفس ونزيد نقولكم انتوما لي تمدولهم الثقة ماراحش يصيبوها ولايكتاسبوها هاكداك برك ...وعدراللاطالة باه يستافدو المشتركات ربما...
ياحبيبتي كي كنت صغيرة نخاف نرد حتى ولو كنت عندي الحق حتى كي تزوجت منقدرش رد على أي حاجة وجيت لفرنسا وعندي زوج بنات كنت نحشم كي يشوفوا فيا كي راني لابسة الحجاب وهذاك الوقت مكانش الحجاب بزاف اهنا ولكن مع الوقت اعرفت ديني مليح واعرفت بلي انا خير منهم وانا مسلمة وعند ربي انا خير وذرك سعدو يالي تكلملي على الحجاب وعلى الاسلام عندو مايسمع مني حتى يقولولي منتكلموش على المسلمين اللى كيما انت نتكلمو على المخربين حتى تلاقيت مع وحدة لأبسة جلباب تقولي كي تصرا حاجة اهنا نحط واسي ونخاف ولكن انا نقولها ارفعي رأسك ياخي انت مادرتي والو مالا ماتخافيش حتى من واحد وكي بشوفوا فيك ماتحطيش رأسك وشكرا لك على الموضوع
المرادف لعدم الثقة بالنفس هو الجياحة .انا في سن 17 كنت جايحة ونخاف يضحكو عليا كي نهدر وكنت نكرر الحروف لما نجي نهدر وكي نجي نحكي نتلعثم وكي نجيب جملة مفيدة وصحيحة نفرح .بصح الآن راني في 29 اللي يشوفني يتخلع من شخصيتي القوية والكلمة نردها بعشرة .انا لما تزوجت فسن 19 بديت نغير من روحي ونبدل الآن صىت نسخة افضل من ما كنت احلم به في شخصيتي اللي ضعفت بسبب تنمر صحاباتي عليا ولباسي المبهدل بكري كي كنت فقيرة فقر مدقع. والحمد لله ننصح كل وحدة مرت بتجربة عدم الثقة بالنفس وتسلبت منها .ديري القلب وكيما قالت داداح ازدمي .انا كي تزوجت ابليجي عليا اني نحتك بالناس اللي كنت خايفة منها ونحشم يضحكو عليا لما نحكي نقول لوكان نحكي بالاك كلامي مايكونش فالصواب ويضحكو عليا ويقولو متعرفش تهدر. لاكن بحكم الإحتكاك مع الناس تدربت ووليت مرا ونص والحمد لله
انا عندي رهاب المجتمع نخاف من الناس مانيش اجتماعية خلاص والناس دايريني متكبرة ومسمامة كي شافوني مانهدرش مانعرفش نجبد الحديث مع الناس حتان هوما إلي يبداو يهدرو معايا كاينين بزاف إلي صارحوني وقالولي تباني متكبرة ومسمامة بصح كي عاشروني لقاوني إنسانة طيبة وبشوشة وضحايكية
كلامك صحيح يا أختي نجاح يعطيك الصحة و نتمنى من للي الوالدين لأنهم هوما الصح في بناء الثقة في أولادهم و تعويدهم على الثقة في الله و في أنفسهم باش يقدروا يواجهوا الناس لأنو يا ما سمعنا مصايب جابتها معايرة الآباء والأمهات لأبنائهم و مقارنتهم بالآخرين و الإستخفاف بهم ناسين انو هذاك الولد أو البنت أمانة سيسألون عنها و ذخر لهم في الدنيا و الآخرة ان أحسنوا لهم و لا حول و لا قوة إلا بالله العلي العظيم
السلام عليكم اختي نجاح يعطيك الصحة على الموضوع في منتهى الروعة في الواقع تاعنا نلتقي بالكثيرمن النماذج الي يفقدو الثقة في انفسهم لكن الاصرار على النجاح والشجاعة لازمة للتغلب على المشكل ولازم الاسرة والمدرسة تلعب دورها لمساعدة هذ الناس
ما شاءالله الأخت نجاح اسم على مسمى. أنا عندي بعض الخبرة في مجال التنمية البشرية باش نعاون تلاميذي خاصة المقبلين على شهادة البكالوريا. . سمعت بزاف. .. بصح نتي وحدك وصوتك مريح ما شاءالله. ...نقعد 2 سوايع نسمع فيك منكرهش. .. ما شاءالله. .
الله يعطيك على قد نيتك والله العظيم أحبك في الله بالرغم من انني لا أعرفك شكرا شكرا شكرا على كل كلمة منحتها لأنك والله العظيم غيرتي فيا كثير من الأفكار السلبية فيا
انا معنديش ثقة بالنفس داخل المنزل مع دارنا أمي و خواتي ، و لبرا عندي ثقة كبيرة في نفسي و ناجحة في حياتي و قارية و واصلة و بالمنصب تاعي و ننجح لبرا في كل التحديات، لكن في الدار معنديش ثقة في روحي حتى في الهدرة معاهم نحس بلي في الدار شخصيتي تذوب، و نخاف من كلش و نحس بلي دارنا البلاسة لي تهبطني مليااااار
Je crois que j ai rate ma vie a cause de manque de confiance en moi et pourtant j ai fait des etudes superieures et je me suis mariee jai des enfants mzis je n ai pas realize mes reves les plus simples j essaye de fzire des efforts mais je suis tjrs frenee par ma timidite et la peur merci pour tes conseils t entendre parler me fait tjrs du bien et j attend tes emmission avecimpatience merci encore
على بالك المشكل تاع البيسين راني فيه 8 حصص و مازال ماقدرتش نتحرك في الما رغم أني محتاجة لهذا. فرحت بزاف كي هدرتي في هذا الموضوع خاصني عفسة ننحي بيها الخوف من الماء. شكرا على مجهوداتك كلها.
والله كلامك موزون وداءما جيبي المواظيع الي تفيدنا وانا رغم اني كبيرة الا اني تخصني بزاف الثقة في نفسي وما عنديش الكراج في كلش وبعتش هذي الصفة تنتقل الى اولادي بالك احنا والدينا بكري وربوناش على الثقة في النفس لانهم كانو جاهلين وعندهومش الحنانة ارجوك اختي نجاح تكثرلنا مثل هذه الماظيع والتردي عليا لانني من المتتبعات الداءمة لكي ارجوك
سلام ياالغالية، والله عندك الحق، انا واحدة تاني بزاف خجولة ونخاف بزاف، حتى مثلا عندي رخصة السياقة اكثر من 10 سنين ومانيش قادرة نسوق، وراني خايفة هاد الخجل والخوف يتزرع في اولادي.
نضن المعاير اللي يضعفو الشخصية يديرو الحشمة و الخوف الزائد ماناش كيما الأوروبيين أي حاجة بسيطة يديرها وليدو ولا بنتو يكبروها و راك فور و منا يطلعولو المورال أما حنا ياحابس روح شوف فلان و فلتان .......
بارك الله فيك عندك الحق لي حاب اعيش و ما ينذلش يقوي شخصيتو ما كاش كلمة مانقدرش انا نقدر ادا ماشي علاجالي علاجال والديا إذا ماشي علاجال والديا علاجال ولادي إدا ماشي علاجال ولادي علاجال بلادي
