القصيدة : من رفت عيوني الرادود : علي الساعدي الشاعر : احمد الذهبي °°°°°°°°°°°°°°°°°°°°°°°°° من عيني ما أدري ، دم لو دمع يجري يلجمني يا ستار ، حتى الهوى بصدري من رفت عيوني عرفتك ما ناوي ترجع من غربتك دم لو دمع يجري °°°°°°°°°°°°°°°°°°°°°°°°° يحسين . حسيت كلشي ما بقة الليله بمكانه وانتَ ولا خبر منك إجانه يحسين . والروح جنها تريد تلطم مني كوه وخايف كلبي وبناره يتجوه . يا مصدر أمانه مدري شبيه حيرانه . يبني وعيني سهرانه وتدري شكد محنتي عليك . غير ام البنين أنه ولدي الاربعه وامهم . غيرك تدري ميهمهم من دونك يغالي الكون . ما يسواله شيء عدهم يالسافرت عني ، وينه اليطمني وبشاره كون يريد ، كل العمر مني يالما ترد زادت معزتك ما ناوي ترجع من غربتك دم لو دمع يجري °°°°°°°°°°°°°°°°°°°°°°°°° يحسين . لو جان بعدك عايش بخير وسلامه وديلي يبعد امك علامه يحسين . وانجان إن لا سامح الله وصار موتك لتكلي بقوا عدلين اخوتك . تكتلني الملامه خو ما كصروا عنك . يمه وخيبوا ضنك آنه وياهم مقصرين . ونريد العذر منك يبني وداعة العِشره . كل هذا وآنه ومقصره كون امربيه إلك خوان . فوك الاربعه عشره كلت إلهم و وصيت ، بيضولي بس وجهي يمه الولد شنهي ، يالتامر وتنهي مدري شجاني وما لحكتك ما ناوي ترجع من غربتك دم لو دمع يجري °°°°°°°°°°°°°°°°°°°°°°°°° يحسين . وياك لو ماخذني اصير هناك خيمه خاف تمر على زينب ظليمه يحسين . والله حيل بدونكم وحشه الليالي وغير عيونكم ماكو اعله بالي . وجن الدنيا هيمه روحي البيها بس إنتوا . راحت مني من رحتوا حسيت آنه جاني الموت . اول ما علي غبتوا أدور بالهوى عنكم . هلبت بي عطر منكم هلبت نسمه لو بالطيف . توصل يمي واشتمكم لا من خبر وديت ، لا من إلي رديت لا من عطر بالريح ، من عندك إشتميت يا من هوى الروحي حسبتك ما ناوي ترجع من غربتك دم لو دمع يجري °°°°°°°°°°°°°°°°°°°°°°°°° يحسين . مطروح كالوا عالرمل ومسلبينك والحافر سحك حتى اعله عينك وضلوعك كسرها كالوا شيبك تخضب . واعله الرمله تتكلب وسفه من الظهر مذبوح . هذا اللي اشد واصعب لا يوم المثل يومك . يالحدر الشمس نومك يا جاسي المكارم ثوب . وإنتَ مسلبه هدومك يبني وبعد شصبر ، ومن الزمن شنطر وانتَ الشماته هناك ، كطعولك الخنصر يمدوخ الدنيا بوكفتك ما ناوي ترجع من غربتك دم لو دمع يجري °°°°°°°°°°°°°°°°°°°°°°°°°
اللهم بحق ابا عبد الله الحسين عليه السلام بن علي ع حفيد النبي محمد ص ارزقنا الذرية الصالحة امين يارب العالمين 🤲اخوان اليقرء التعليق دعواتكم يحفظكم الباري
كتبت هاي الابيات لئن ذكرتو ام البنين عليها السلام ب القراية اليوم ودزيتها النظر عيني الغالي ابوميمون الرادود علي الساعدي ربي يحفظك ويطيك الصحه والعافيه بجاه ام البنين عليها السلام
عظم الله اجورنا واجوركم بإستشهاد سيد شباب اهل الجنة مولاي الحسين بن علي عليهما السلام. موفقين ملة على هذا الاداء الاكثر من رائع وطيب الله انفاسك لقراءة هذه الكلمات بهذا اللحن الشجي
