قرض إنطلاقة او credit intelak
القرض الي ميحتاج لا ضمانات ولا راواج فالحساب و اليوم باعتباري موظف بنكي عندوا تجارب مع قرض انطلاقة غادي نبسط ليكوم هاد القرض الي كثر عليه القال و بلي الاغلبية مستافدوش منو يا اما لعدم القدرة على توفير الوثائق المطلوبة او ملي تيمشي للوكالة البنكية مكيعرفش علاياش يسول و بالتالي كيخرج خاوي الوفاض ..
اولا قرض انطلاقة عليه الطلب حينت كيقدم نسبة فوائد تفضيلية (٪2) و الي ماكاينا فتا شي قرض اخر و الي تعطا بأوامر من جلالة الملك محمد السادس نصره الله لدعم الشباب و اصحاب المشاريع الناشئة .. هاد القرض ممكن يوصل تال 120 مليون طبعا على حسب المشروع الي بغيتي تمول و الوثائق الي كتوفر عندك .. ندخلوا فالصح .
من قبل كيفاش كتعطي البنك قرض لاصحاب المشاريع ؟ عن طريق الرواج او chiffre d'affaires السنوي ديالو .. كيشوفو مثلا اخر 12 شهر من المعاملات البنكية الي قام بها (relevé bancaire) و من خلالها الى كان السيد شهريا كيفيرسي او كيدفع مبلغ لابأس به فالحساب ديالو نفهم ان مشروعه الحالي ناجح و كيمكنوا من واحد الربح كيشيط ليه فالكونط و بالتالي يقدر يخلص لينا الاقتطاعات الشهرية الى عطيناه قرض باش يزيد يطور هاد المشروع .. اذا البنك غير عنطريق كوشوفات الحساب الشهرية ( relevé bancaires) كتعرف ان الزبون ناجح فالدومين ديالو دون الحاجة انه يوفر ليك شواهد ديال التكوين او التجربة ..
اجي دابا لقرض انطلاقة .. فهاد القرض البنك مكيعتارفش بالرواج ديال الحساب حينت ممكن تكون زبون جديد يالاه حال الحساب و تستافد من القرض اذا كيفاش غادي يتأكد البنك انه غادي ينجح ليك المشروع و بالتالي تقدر تخلص ليهوم للإقتطاعات الشهرية .. الجملة الرئيسية هنا هي ( ينجح ليك المشروع) و الي غيخليه ينجح هي الخبرة و التجربة فداك المجال .. سابقا قلنا البنك كيعرفك ولد الدومين عن طريق الرواج ديالك و الى كنتي زبون جديد غادي يعرف عن طريق
----- الشواهد التكوينية و الديبلومات ----
و الي هي الحجرة الاساس فقبول قروض انطلاقة لدى الابناك .. عنعطيكوم مثال .. انا مثلا امارس مهنة الحلاقة و عندي دبلوم الحلاقة و باغي نستافد من قرض انطلاقة .. مشيت للبنك ( اول مرة نمشي للبنك يعني مكيعرفوش المهنة ديالكي ) و طلبت منهوم يمولوا ليا جوج مشاريع الاول هو شراء المعدات الكاملة لمحل الحلاقة و الثاني آلة ديال النجارة .. اول شيئ غادي يسولني عليه البنكي قبل دراسة المشروع و les devis الخاص بالمعدات و عقد كراء المحل و غيرها ... غادي يسولني على الشواهد التكوينية او الديبلومات .. حينت هي دليل الخبرة و التجربة فالميدان و كترفع من نسبة نجاح المشروع لدى اعينهم .. مشروع النجارة انا مكنعرف فيه والو و تجربة جديد بالنسبة ليا لكن للبنك هو تجربة خطيرة اما الادحلاقة فكاين ديبلوندم يثبت تجربتي الطويلة فالمجال و بالتالي يعتبر نوع من الضمانة و امكانية نجاح المشروع بنسبة اكبر بكثير من مشروع النجارة.
طولت فالشرح لكن لابد نوضح ليكوم بالتفصيل حينت كاين الي محتاج غير فرصة باش يغير الحياة ديالو و يدير مشروع خاص به . ملي شرحت ليكوم الدور المهم ديال الديبلوم و التكوينات فقبول قروض انطلاقة نكملوا باقي الوثائق الي كيطالب بها البنك :
- البطاقة الوطنية
- بطاقة المقاول الذاتي أو السجل التجاري الى كان عندك
- الدبلومات و الشواهد التكوينية ( أهم حاجا)
- عقد كراء محل ( الى كنتي ديجا كاريه) أول عقد الوعد بالكراء ( الى كنتي يالاه غادي تبدا هادا احسن ليك )
- دراسة المشروع ( كاينين ابناك قبلوا قروض اقل من 10 مليون بدون دراسة المشروع .. حينت اصلا كياخدوا من عندك جميع المعلومات شفويا و يعمروها فدراسة مصغرة)
- ثاني اهم حاجا من بعد الديبلومات هي les devis
و هي بحال الفاكتورا لكن كيعطيها ليك الممول او fournisseur قبل متشري عندوا السلعة او الماتريال كمثال غادي نشري بفلوس انطلاقة كراسي ديال الحلاقة .. غنمشي عند شركة كتبيع هاد الكراسي و كنطلب منها تعطيني devis ديال 5 كراسي و نقولو الثمن غيكون 10000 درهم .. و نمشي عند شركة ديال بيع معدات الحلاقة و تاهوما عطاوني devis فيه 50000 درهم .. هاد الدوفيات كتكون بحال فاكتورة و مجانية مكتخلص عليها والو .. نرجعوا البنك ..
ملي كتدفع طلب القرض للبنك غادي يسولك شحال بغيتي غتقوليه 6 مليون غيطلب منك les devis الي يقدر يكون واحد او جوج لكن المهم يكون المجموع ديالها 6 المليون .. و ملي كيتقبل القرض مكيعطيوكش الفلوس تمشي تشري الي بغيتي .. لا ثم لا .. بل كيعمروا شيك فيه 5 مليون لفائدة ال fournisseur الي غيبيع ليك معدات الحلاقة و شيك مليون لفائدة بائع الكراسي و ملي كيتخلصو من الشيكات خاص يعطيوك فاكتورة كتأكد انك شريتي السلعة.....
شاهد أيضا :
__________________________________________
طريقة استعادة اموال لم تخرج من الصراف البنكي
• طريقة إسترجاع أموال لم...
__________________________________________
كيفاش تفتح حساب مجاني مدى الحياة من منزلك بالسيلفي
• كيفاش تفتح حساب بنكي م...
__________________________________________
طريقة طلب السجل التجاري من هاتفك
• طريقة طلب السجل التجار...
__________________________________________
عشر اجراءات باش تحمي الحساب البنكي من الاختراق
• هام : 10 إجراءات باش ت...
__________________________________________
كيفاش تخرج الفلوس من الكيشي بدون بطاقة بنكية
• كيفاش تخرج الفلوس من ا...
__________________________________________
تاجر تنصب عليه ف 11 مليون مغربية
• معاملات بنكية : تاجر ت...
__________________________________________
موظف بنكي يشرح اهم وثيقة لقبول قرض إنطلاقة
• موظف بنكي يشرح أهم وثي...
__________________________________________
و المزيد من العروض و الرد على استفسارات المغاربية في ما يتعلق بالشؤون البنكية على صفحتنا
/ ajitfhamlbank
26 мар 2021