هۆنەرمەند "سەعید گاباری" ... (دەوڵەتا کورد ڕاگەهینە) .... Seîd Gabarî - Dewleta Kurd Ragehîne 

(دەوڵەتا کورد ڕاگەهینە)
Dewleta Kurd Ragehîne - Seîd Gabarî
ژینا بن دەستی نەژینە ڕاگەهینە
کولەتی ساخ ژی مرینە ڕاگەهینە
مە ژبن دەستیێ دەرینە ڕاگەهینە
ئەڤێ جارێ تۆ ببێژە و ڕاگەهینە
دەوڵەتا کورد ڕاگەهینە ڕاگەهینە
پێنجی ساڵە ئەز بۆ دخوینم ڕاگەهینە
پڕ ژ مێژڤە دلبرینم ڕاگەهینە
ترسم ئەز بمرم نەبینم ڕاگەهینە
دەوڵەتا کورد ڕاگەهینە ڕاگەهینە
گوهـ نەدە جەحش و نەزانا ڕاگەهینە
هەرۆ لسەرێ مە فەرمانە ڕاگەهینە
گوهـ نەدە ڤان ئێش و ژانا ڕاگەهینە
تۆڵا ئەنفاڵێن بارزانە ڕاگەهینە
تۆڵا شێرێن بەهدینانە ڕاگەهینە
تۆڵا حەلەبچە و گەرمیانە ڕاگەهینە
ئەڤ کلیل تو ب دەستێ تەیە ڕاگەهینە
پێنجی ملیۆن پێشمەرگەیە ڕاگەهینە
نێ مە سۆزەک دابوو تەیە ڕاگەهینە
دایکا شەهیدا دگەڵ تەیە ڕاگەهینە
ئەڤێ سۆزێ ببە سەری و ڕاگەهینە
مە دا تە بیروباوەڕی ڕاگەهینە
ئەم سەرکێ زاڤا دبێژن ڕاگەهینە
نارین واهاتیە بەر دەری ڕاگەهینە
ئەڤێ جارێ تۆ ببێژە و ڕاگەهینە
ڕێبازا تە پیرۆزە تۆ ڕاگەهینە
دەوڵەتا کورد ڕاگەهینە ڕاگەهینە
ـ ـ ـ ـ ـ
هۆنەرمەندێ پێشمەرگە و شۆڕەشگێڕ
خودێ ژێ ڕازی بیت (سەعید گاباری)
ـــــــــــــــــــــــــــــــــــــــــــــــــــــــــــــــــــ
ـ سەعید گاباری لـ ساڵا (۱۹٥٦)ـێ لـ باژێرکێ (عامۆدا) لـ پارێزگەها (حەسەکە) یا ڕۆژئاڤایێ کوردستانێ ژدایک بوویە.
ـ دژیێ (۸) ساڵیێ دا چاڤێن خۆ ژدەست داینە.
ـ خێزاندارە و بابێ (۸) زارۆکانە.
ـ لـ ساڵێن شێستان ـدا دەست بـ ستران گۆتنێ کریە.
ـ شەیدایێ دوو ژ هۆنەرمەندێن هۆنەرمەند و هۆزانڤانێن بناڤودەنگێن کورد بوویە ئەوژی (جگەرخوین) و (سەیدایێ تیرێژ) بوون.
ـ دژیێ خۆدا پتر ژ (٤) هزار سترانان گۆتینە و پرانییا وان ژی لسەر ئازارێن ملەتێ کورد و کوردینیێ و پێشمەرگی و شۆڕەشێ گۆتینە.
ـ چەندین جاران ژلایێ ڕژێمێن خوینمژێن سوریا و عێراقێ ـڤە هاتیە گرتن و ئەشکەنجەدان.
ـ گاباری لـ ساڵێن هەشتێیان قەستا هەرێما کوردستانێ دکەت و پەیوەندیێ بـ ڕێزێن پێشمەرگێ کوردستانێ دکەت و بـ هۆنەرێ خۆ خزمەتێ دکەت.
ـ ناڤبری خەونا وی یا هەرە مەزن کو هەرجا دسترانێن خۆژی ـدا ئاماژە پێ دکر، ئازاد بوونا هەمی پارچێن کوردستانێ و دەوڵەتا کوردی بوو.
ـ کاروانێ خەباتا گاباری یێ بەردەوام بوو بۆ ماوێ پێنجی ساڵان.
ـ گاباری لـ هەیڤا ئادرا ساڵا (۲۰۲۰)ـێ ژدەرڤە زڤریە هەرێما کوردستانێ و پاشی لـ نیڤەکا هەیڤا نیسانێ ساخلەمییا وی تێک دچیت و دهێتە ڕەوانە کرن بۆ نەخۆشخانێ، پشتی پشکنینێن نۆژداری بۆ هاتینە ئەنجام دان، دیار بوو کو گاباری تۆشی شێرپەنجەیا سینگی بوویە.
ـ بـ مخابنیڤە پشتی نێزیکی حەفتیەکێ ژ مانا وی دنەخۆشخانێ ـدا و لـ ژێر چاڤدێرییا چڕ یا نۆژداران، دوماهیک جار لـ سەرسپێدەهیا ڕۆژا (دووشەمبی) ڕێکەفتی (٤ / ٥ / ۲۰۲۰)ـێ دژیێ (٦٤) ساڵیێ ـدا وەغەرا دوماهیێ کر و بۆ هەتا هەتایێ خاترا خۆ ژکوردستانێ و ملەتێ کورد خاست و کول و کەسەرێن ئازادی و سەربخۆیی یا کوردستانێ دگەڵ خۆ برن.
ـ ڕاستە سەعید گاباری مریە، بەلێ دەنگێ وی و هۆنەر و پەیڤ و ئاوازێن وی هەر دێ مینن زیندی ددلێن مەدا.
گیانێ تە شاد و بەختەوەر بیت هۆنەرمەند و پێشمەرگە
مامۆستا (ســــــەعید گابـــــــــاری).
Saeed Gabari - Dawlata Kurd Ragahina