وش فيك تردف ونّتك عشر ونّات
وادناة ما جا لك حرمك الوسادة
كنك على راسك تشيل السماوات
وتشكي من الليل الطويل وسواده
ان كان عندك وقت مرّ العيادات
وشف حالة اللي عند باب العيادة
يجون بسكات ويروحون بسكات
وفيهم على ما قدّر الله جلاده
ومرّ السجون اللي عليها خفارات
سجانها ما فيه لين وهوادة
قبور الاحياء تشبه قبور الاموات
لو انها اوسع من حزوم الحماده
ومرّ الحدود وشف رجال المهمات
يرجون من وجه الكريم الشهادة
الموت يرقبهم بهجمة وغارات
ويضغط عليهم بالدقايق زناده
عشان تدري بالنعم والملذّات
وانك بخير وعايشٍ في سعادة
مير احمد الله واشكره كل الاوقات
الله وعد من يشكره بالزيادة
فهد المفرج
27 авг 2024