يايمه كان حكم الزمن //معاوية المقل // كلمات ناصر محمد محجوب// 

🌹🌹🌹🌹🌹🌹🌹🌹🌹🌹🌹🌹
💖يايمــــــــــــة (كان حكم الزمن)💖
💐كلمان الشاعر المطبوع ناصر محمد محجوب المقل💐
❤الحان واداء الفنان القامة معـــاوية المقــــــل❤
🌼عمل رابط الاغنية الموثق فرزدق القمرابي🌼
d.top4top.net/...
🌀🌀🌀🌀🌀🌀🌀🌀🌀🌀🌀🌀
يا يمه كان حُـكْم الـزمــــــن تسلك خُطــاي دربا طــــويل
وارحل براي طاوي الحُـزُن من غير رفيق شايلني شـيل
شايل أساي والـزاد شــجن الهـــــم حداي والشوق تقيل
شايلك معــاي عيني بكــــن بلَّ الدروب دمعــــــــا يسيل
والذكـــريات طافــــن نّعّــن زمنا رحل فاقـــــــــــد دليل
فـــي لحظـه جَــن وإتلملمـن طرّني ايامــــــــــــي القبيل
جــــوّه القليب إتحكّـــــــرن زادن علي تعب الرحــــــيل
ســـــاقنّي ليكي وتوّهـــــن وانا كيف بعيد لافحني ســيل
طاريك صباح والنيل حضن لون الشعـــــــاع دهبا يسيل
فوق تمره قُمريات شـــدن جــــــــاوب غنيواتن هـــديل
فرحن جداولنا وجــــــرن يا يمــــــــه في وكـت المــقيل
يرقص جريد يبرد سِعِــن يكسي الخدار ضُــــــل النخيل
واطرا الحسان وكتين يجن قـــــــدله ودلال عند الأصيل
اليوم يفوت والليل يجِــن شمس النهــــــار تنعس تميل
لمّة صِحاب طمـبور يرِن ضجة بُطان قمــــــره وشلـيل
تغشى الديار والليل سكن نسمة بحر تشفــــــــي العليـل
يا يمه ما نام لي جــــفن يملا السهـــــــاد عيني ويكيل
يا يمـــه والايام قِســــــن في صيف صحــــاريهن نزيل
وآثار جراحـــن مـــا بِرَن واصلو الزمــــــن بيهن كفيل
باقي الصّبُر يشكـي الوهـن طول السفر هــــــــــدّ الحويل
يا يمه في درْب المحــــن كم ضُقتَ مُـــــرّه وشفت ويل
تشهد علي غيمات غــشن شاطي الضياع ناويات رحــــيل
ساقن حطـــاويهن مشـــن من غير وداع عــــابرات سبيل
يا يُمـــه حِنِّك لي وطــــن خُضره وضفاف واحـــه وضِليل
سُفُن الهموم لو يوم ِرِسْن عدِّن بحـــــــــــــــور المستحيل
بطلب عفوك وانسى الحُزُن تشفى الـــــــــــجراح للبيْ تزيل
واشبع أمان دعوات وحَن والفات يهــــــــــــون يصبح قلـيل
🌀🌀🌀🌀🌀🌀🌀🌀🌀🌀🌀🌀
❤حقوق النشر محفوظة لمنتديات الفنان القامة معاوية المقل ❤
🌹🌹🌹🌹🌹🌹🌹🌹🌹🌹🌹🌹