Jai gor jai sevalal
Recording studio gormahi asola mo.8975121801
❤️❣️ जै गोर जै मरीयामा जै सेवालाल ❣️❤️
🌾🌾 तीजेर तेवारे लार कायी जपमेलोच 🌾🌾
गोरमाठीर तीजेर तेवार यी यीसवीसन पूरव ५००० ते ८००० वरस आंगाडीयाती चलो आरोच. कातो तीजेर तेवारेम येक गीद बोलेम आवच आण वू गीद आशो छ क.
कूणसे देशेती आयीये सोनकी,
मोवना रो दळ भीजेगो ये,
मेरगडेती आययी सोनकी,
मोवना रो दळ भीजेगो ये,
कूणशो सोजा लायीये सोनकी,
मोवना रो दळ भीजेगो ये,
तीजेरो सोजा लायीये सोनकी,
मोवना रो दळ भीजेगो ये,
यी गिद सिंधू संसकृरूती मायीर मोवना नगरीर वूलेख करच. यीच गिद जे आजेर घडीन बलुचिस्थान नामेर देशेमायीर मायीर मेरगडेर संस्कृतीर वूलेख करच. आण ये दोयी संसकृरूतीर विचार किदेतो ५०००ते ८००० वरस जून छ करन विज्ञान केरोच. जे याडी कनायी कूनसी शाळाम कोणी गी, काॅलेजेम कोणी गी, वू याडी वो मोवना नगरीर आन मेरगडेर वाते करच कातो वोदूर नाळ वत कती तरी जूडच. यी तेवार गोरूम घणे माणेपानेती आणी घणे हूसेती मणायेम आवच. यी तिजेर तेवार मणायर कायी गरज पडी भा. येर लार कायी कारण र यी वाते जणा म जाळंण लेयसारू दि चार डायंसांळे लोकूण भेटो आन भिमणीपुत्र बापुर काही लेख, आनवाल, आण पुस्तके वाचो जना मण कायी वाते मालम पडी. वोच वाते म तमार हूडीयांग मांडेवाळो छू.
वोदु कनेती मण मायती मळी क तिजेर तेवारे मायी भी गोरमाठी आंधश्रधा न बाळगता वोर लार येक वैज्ञानिक दृष्टीकोण रकाडण तिजेर तेवार मणायवाळो समाज र. गोर सिंध्दु संस्कृतीर आंगाडीयार मेरगडेर संस्कृतीर धणी मालक र येर पुरावम याडी भेण येक केणावट भी कच क.
म छुये केलाग ये देशेर हरपंणी,
तु छी केलाग मांदी ये देशेर धणी,
वोरे बाद लादे केलाग हाम लदेणी
आसे तराती गोर सिंध्दु संस्कृतीर मालक र येर पुरावा मळच पण जना गोरूर संस्कृतीप आर्य लोकुर आक्रमण वो जना हामार संस्कृती, हामार घरबार, नगरी से बरबाद वेगे आन हामेन नगरी सोडेन मजबुर वेणु पडो. गोर सिंध्दु संस्कृतीम वेते जना भी यी समाज ढोर जिव जनगाणी पोशेवाळ र. आन आनाज पिकान वू आनाज सारी दनीयान पूरायरो काम करतोतो. आनाजेर पडताणी करेसारू तिज नामेर सन गोरूम अस्तित्वेम लाय जेम घवूंरच वापर किदे कारण घवूं यी सबेती जूनो आनाज छ. यी आनाज छ सिंधू संस्कृतीम सापडमेलोच. तिज येर सारू पेरातेती की जे घवूं छ वो घवूंर परिक्षण करेसारू तांडेर नायक तिज पेरातोतो आण वो तिजेर नुसार वोर भाव ठरायम आवतोतो. गोर रिते नुसार जना तिजेर तेवारेन सुरूवात वेतीती जना याडी भेन नायके घर जान तिज पेरायरी वाते नायकेन केन नायकेर परवान काडतीती. पच सांज पडी तिज पेरायर ठर जाव पच छोरीय तिसरेक पोर जान मकोडार धुड लाव आन पच सांज पडी तीज पेराव. पण वोर आंगाडीया याडी येक गीद बोलतीती.
म वोलडी मंगायी हडपाती
म धूंडे मंगायी सींधू घाटीती
म घंवू मंगायी मोवना नगरीती
म पाणी मंगायी सींधू नदीती
म झूलर बलायी घणे हूसेती
आन पच तीज पेरेर टायीमेन तीजेम घंवू पडेर बाद याडी आजीक येक गीद बोली.
कूण पेरायो तीज ये घंवूला डेडरीया
नायक बापू पेरायो तीज ये घंवूला डेडरीया
कूण पेरायो तीज ये घंवूला डेडरीया
नायकण याडी पेरायी तीज ये घंवूला डेडरीया
वड फुंदी मारे मोवनारे देश,
मारे मोवनारी खबर लिया फुंदी
वड फुंदी मारे मोवनारे देश,
वड फुंदी मारे हड्डपारे देश,
मारे हड्डपारी खबर लिया फुंदी
वड फुंदी मारे हड्डपारे देश,
आसे परकारेती तीज पेरद आन वो तीजेर आपणे बालबच्या वांगर देकभाल करण वोन नव दाड रोज सांज परभाती पाणी नाकेरो. आन वोर देकभाल करेर जीमेदारी तांडेरी छोरीय लेतीती पुर्ण 9 दाडेर कालावधीम याडी भेन घणी प्रकारेर रमती रमतीती वोम जे पछमी र दन जे हिंदोळो नकातोतो वो हिंदोळेर भी याडी भेन आणंद लेतीती आन हिंदोळेप गिद बोलतीती.
सातळो पीळीय पीलोणेरी वेल ये
सातणो काका बाबारी दोयी भेनये
सातणो येके लूंगेन दोयी खायाये
सातणो काळ पडीय भमजायाये
सातमो सकाळ पडीय मलजायाये
कागला सोनो पीतळ तारो देश रे
कागला वुचीसी हावेलीम रेस रे
कागला याडी बापुन मत केस रे
कागला तरी बेटीन वनवाश रे
आन पच आठवे दनेर रातेन ढंबोळी रेतीती ढंबोळी रेतीती. आन पच ढंबोळीर दन गणगोर-गणगोरी बेसारण सांज पडी नायकण सेर घर घर जान वोलडी पुजतीती.
तु आवरी, तु गवरी,
तु चंदणेर पिढीया बेसरी,
तु नाचरी, तु कुदरी
जातेरो बेटा ठटा करे,
जातेरी बेटी मस्करी करे,
तु आजरीया पेर,
तु बाजरीया पेर,
सुंवांशे बोल सारेंगी बोल,
वोलडी पुजनु वेयेपर रात भर याडी भेन छोरी छच्यार रमती रम छोरी छोरा पिडीया खोसेर रमती रमतेते.
मारे विर सरीको विर पीडीया देदर,
मारे भेनेसरीकी भेन पीडीया लेलय,
मारे विर सरीको विर पीडीया देदर,
मारे भेनेसरीकी भेन पीडीया लेलय,
आन पच दूसरे दाड परभातीच छोरीय वूठ आन वोलडीवूप पाणी नाकेन जाव. आन पाणी नाकेर नंतर आन पच से वोलडी येक जाग जमा कर आन पच तीसरे पोरेतोनी से याडी भेने डपडाप रमती रम. पच तीसरे पोर छोरीय बोरडी झुपकेन जाव वतेन आयेर नंतर पच छोरीय चलोकडीरो डोना तोड. चलोकडीर डोनार नंतर वोलडी तोड छोरीय आंन नायकेन कारभारीन आन मोठे मोठे गोरूर बेपारीवून छोरीय चूंगा द. आन पच नायक वो वोलडी परेती वोदूर घवुंर काॅलीटी देकन वोदुर घवूंर भाव नायक कारभारी बेपारी लोक ठेराव. आन छोरीय नायकेन जे चुंगा देतीती वु चुंगा देकन नायक छोरीन रपीया द आन पच वो रपीया परती तांडेवाळ समज क मार घंवून आतरा भाव लागो वतरा भाव लागो...आन नायक जे भाव ठराव वो भावेती पच घंवूर खरेदी वेजाव. आन पच वो तीजेन आन गणगोर-गणगोरीन वेरादेतेते.
यी तीजे लारेर कारण म मार लकणीर माध्यमे मायीती थोडसेकेम मांडेर प्रयत्न कीदोचू. यिच खरो वेणु करण मारो केणु छेयी पण मार चिंतण मतण डाव लोकु कनेती मळी वोर आधारेप यी म लकोचु आन मार लकणी लकण म थांबूचू.....जै गोर जै सेवालाल
🥀🥀🥀🥀🥀🥀🥀🥀🥀🥀🥀
से गोर भायीन तिजेर तेवारेर हिवडेर गाठेकनेती घणी घणी सेवा सायीच्
20 сен 2024
