श्रावण (सावन) हिंडोरा (झूला) के कीर्तन पद
कीर्तन प्रणालिका अनुसार
1.झूलत सांवरे संग गोरी
अमित रूप गुण सहज माधुरी शोभा सिंधु झकोरी
इतन सिर मोर मुकुट की लटकन को उत बेंदी सिर रोरी
कुंडल लोल कपोलन झलकत उतही बनी कचडोरी
इत उत बेसर के मुक्ता सों चोंप बढी अति जोरी
रसिक प्रीतम वल्लभ कटाक्ष छवि हावभाव चित चोरी
2.लालन तौ हों झूलौ जो तुम हौलै हौलै झुलावौ
डरपत हों घनश्याम मनोहर अपने कण्ठ लगावौ
हों उतरों तुम झूलौ मेरे मोहन जैसें जैसें गाउँ तैसै तैसै गावौ
रसिक प्रीतम पिय यही विनती तन की तपत बुझावौ
3.आजवन कुंज हिंडोरो साज्यो।
उमग उमग झूलत पियप्यारी उमग घटा घनगाज्यो।
कालिंदीतट सुभग हिंडोरो तहां ब्रजराज विराज्यो।
ढिंग कंचनकी बेलि राधिका झूलवत सखी समाज्योत।
पीतपट और पागकसूंभी मोर पिच्छसिरसाज्यो।
चतुर्भुजप्रभु गिरिधर छविनिरखत कोटिक मनमथ लाज्यो।
4.अरीये झूलत दोऊ लालन गिरिवरधारी ब्रजजन मन हारी संग राधिका प्यारी।
गावत ऊंचे स्वर भारी किंकिणी नूपुर ध्वनि उपजत न्यारी न्यारी।
झोटा देत ललितारी त्रिविध बहे मलयारी यह सुख कहत न आवे रमकत रंग रह्यो भारी।
मंदमंद घनगरजेरी श्रवणनकों सुखकारी ये दोऊ युगल इनपर गोविंद बलि बलिहारी।
5.माई आज तौ हिंडोरे झूलें छैयां कदम्ब की
सब सखी ठाड़ी जैसें चित्र के सदन की
पीताम्बर मुक्तामाल तिलक बिराजें भाल मुकुट कुण्डल छवि छूटी अलकन की
श्रवण कपोल नयन अतिही रसीले बैन कोटि काम थक्यौ शोभा देखत वदन की
मुरली की ध्वनि सुनि मोहे सब सुरमुनि शिव से अटल ध्यानी तारी छूटी तिनकी
सुरदासप्रभु गावें रीझ रीझ सचु पावैं भये हैं मगन लीला देख श्यामघन की
6.मनमोहन वृषभानलली मिल झूलत सुरंग हिंडोरे
बाँधें शीश ऐंठवा फैंटा सरस कसूंभी रंग बोरें
कटि राजत पटपीत श्यामके सारी सुरंग बनी तन गोरे
अंसन बाहु धरें जो परस्पर चितै चपल दृग कोरें
खंभन लाग झुलावत ठाड़ी तरुणी गण चहु ओरे
रतिनायक ब्रजपति की छवि पर रीझ रीझ तृण तोरें
7.सावन की तीज हिंडोरे झूलें प्यारी सुनकें मनमोहन आए हैं झूलन
सखी भेष किए श्याम आए प्राण प्यारी पास अंग अंग भूषण बेनी भरी फूलन
नैनन काजर सोहै देखत त्रिभुवन मोहै तापर बेसर के मुक्ता की झूलन
सूरदास प्रभु नारि रूप किए प्यारी संग झूलत यमुना के कूलन।।
8.झूलत वल्लभवर सुखदाई
रसना एक कहाँ लों बरनौ अंग अंग सुंदरताई
ब्रजजन नयन चकोर चंद्रमुख पीवत रूप सुधाई
झोटा देत भक्त बड़भागी वृन्दावन बल जाई
डॉ भगवान दास कीर्तनकार, कामवन
(अष्टसखा श्रीगोविंददासजी के वंशज)
मोबाइल नं.9828737151
#shravan
#savan
#hindora
#bhagwan_das_keertankar
#jhula
#pranalika
#nitya
#keertan
#hawelisangeet
#hindorakepad
#vallabh
#pushtimarg
#pushtimargkeertan
#pushtikirtan
#keertan
#mahaprabhu
#kirtan
#havelisangeet
#bhav_vivechan
#pushtimarg_pad
#srigokulenduprabhu
#keertanbhajan
#keertanvideo
#keertansong
#ras
#bhav
#man
#kanharoirag
#shravan
#kanhara
#hindora
#varshakepad
24 сен 2024