साँझी के पद
भाद्रपद शुक्ला पूर्णिमा से आश्विन कृष्ण अमावस्या तक
कीर्तन प्रणालिका अनुसार
1. राग पूर्वी
आई हूँ अकेली साँझ साँझीके कुसुम लेंन भलौ मिल गयौ तू जात घर गाय लै
आयो घनघोर मेह सूझत नहीं कछु गेह चुंदरी चटक रंग नीरतें बचाय लै
चपला चमक चकचोंधी ते डरत हों एरे निरमोही अंग संग क्यों न लगाय लै
कहावत हौ सुजान कीजिये पे न मान यही है सयान कारी कामरी उढ़ाय लै
2. राग गौरी
राधाप्यारी कह्यौ सखिन सों साँझी धरौ री माई
बिटियाँ बहुत अहीरन की मिल गईं जहाँ फूल अथाँई
यह बात जानी मनमोहन कह्यौ सवन समुझाय
भैया बछरा देखें रहियों मैया छाक धराय
ऐसें कहि चले श्याम सुंदरवर पोहोंचे जहाँ सब आई
सखीरूप है मिले लाड़िले फूल लिये हरखाय
करसों कर राधा संग शोभित साँझी चीती जाय
खटरसके विंजन अरपे तब मन अभिलाष पुजाय
कीरति रानी लेत बलैया विधि सों विनय सुनाय
सूरदास अविचल यह जोरी मुख निरखत न अघाय
3. राग हमीर
लाड़िले गुमानी देखत दृगन अधानी
कुसुम कली हों बीनन आई सघन लता अरु झानी
सोंधे सारी कमल बदन पर मधुप करत नकवानी
प्रभु कल्याण गिरिधर छवि निरखत बालत्रिया छतिया सियरानी
4. राग मालव
खेलत साँझी रंग रह्यौ।
नंदनंदन वृषभान नंदिनी अंतरपट जु दयौ
फूलन डलियाँ भर भर लीनी चित्र विचित्र भयौ
बहु प्रकार व्यंजन घर आगे विनय करत नयौ
आरती करत कोट की सुंदरी रागही रंग छयौ
श्रीविठ्ठल गिरिधरन कृपानिधि ब्रजजन सुखही दयौ
डॉ भगवान दास कीर्तनकार, कामवन
(अष्टछाप के श्रीगोविंदस्वामीजी के वंशज)
ડૉ ભગવાન દાસ કીર્તનકાર, કામવન
(અષ્ટછાપ કે શ્રીગોવિંદસ્વામીજી કે વંશજ)
सम्पर्क 9828737151
#keertan
#hawelisangeet
#sanjhi
#bhagwan_das_keertankar
#pranalika
#rag_poorvi
#keertan pranalika
#sandhyarati
#vallabh
#pushtimarg
#pushtimargkeertan
#pushtikirtan
#keertan
#nityaseva_keertan
#mahaprabhu
#kirtan
#havelisangeet
#pushtimarg_pad
#srigokulenduprabhu
#keertanbhajan
#keertankeertan
#keertanvideo
#keertansong
#bhairav
#keertanpranalika
#nityasevakeertan
24 сен 2024