અમેરિકામાં વાવાઝોડાં હેલિનને કારણે જ્યોર્જિયામાં વ્યાપક નુક્સાન થયું છે અને ગેસ સહિતની ઘણી વસ્તુઓની અછત પણ સર્જાઈ છે. હાલ ઘણા ગેસ સ્ટેશન્સ પર લોકોની લાંબી લાઈનો જોવા મળી રહી છે ત્યારે એક ગુજરાતીના ગેસ સ્ટેશન પર ત્રણ ગણી કિંમતે પેટ્રોલ વેચાતું હોવાનો આક્ષેપ કરતો એક વિડીયો જોરદાર વાયરલ થઈ રહ્યો છે. વિડીયો ઉતારનારા શખ્સનો આરોપ છે કે જ્યોર્જિયાના ઓગસ્ટા શહેરમાં આવેલા આવેલા પોપ્સ ગ્રોસરી સ્ટોર એન્ડ ગેસ સ્ટેશનમાં પેટ્રોલ 10 ડોલર પ્રતિ ગેલનના ભાવે વેચાઈ રહ્યું છે. આ વિડીયો ટીકટોક ઉપરાંત એક્સ પર પણ શેર કરવામાં આવ્યો છે, જે જોરદાર વાયરલ થઈ રહ્યો છે. 30 સપ્ટેમ્બરના રોજ શેર કરાયેલા આ વિડીયોમાં જોઈ શકાય છે કે ગેસ સ્ટેશન પર લોકો કેરબા લઈને પેટ્રોલ લેવા લાઈનમાં ઉભા છે અને ત્યાં આ વિડીયો શૂટ કરનારો વ્યક્તિ પણ પહોંચે છે અને ગેસ એટલે કે પેટ્રોલ કયા ભાવે વેચાઈ રહ્યું છે તે પૂછે છે.
2 окт 2024
