అంతయు నీవే హరి పుండరీకాక్ష
చెంత నాకు నీవే శ్రీ రఘురామా ॥ అంతయు ॥
కులమును నీవే గోవిందుడా , నా-
కలిమియు నీవే కరుణానిధీ ,
తలపును నీవే ధరణీధరా , నా-
నెలవును నీవే నీరజనాభా ॥ అంతయు ॥
తనువును నీవే దామోదరా , నా-
మనికియు నీవే మధుసూదనా ,
వినికియు నీవే విఠ్ఠలుడా , నా
వెనకముందు నీవే విష్ణుదేవుడా ॥ అంతయు ॥
పుట్టుగు నీవే పురుషోత్తమా కొన
నట్టనడుము నీవే నారాయణా ,
యిట్టె శ్రీ వేంకటేశ్వరుడా నాకు
నెట్టన గతి యింక నీవే నీవే ॥ అంతయు ॥
13 окт 2024
