తెలుగులో ఉత్తమస్థాయి రచయితలు ఎందరో ఉన్నారు. ఒక్కొక్కరిదీ ఒక్కోవిధమైన రచనా శైలి. ఆయన శైలి ఇలా ఉంటుంది. వారు వ్రాసిన కథ ఇది, నవల ఇది అని పరిచయం చేయడం వల్ల ఆ రచయితల గురించి మీకు మంచి అవగాహనే వస్తుంది. అయితే దానితో పాటూ వారి రచనలు కొన్నింటిని యథాతధంగా వినిపిస్తే మరింత ఆనందం కూడా కలుగుతుందన్నది నా భావన. అందులో భాగంగానే చాలాకాలం క్రితం గురజాడ అప్పారావు గారి దిద్దుబాటు కథను వినిపించాను. అయితే కాపీరైట్ పాలసీల వల్ల ప్రసిద్ధ రచయితల్ అందరి కథలనూ ఇలా వినిపించడం కుదరదు. కేవలం కాపీరైటు కాలపరిమితి పూర్తయిపోయిన రచనలనే మనం చెప్పుకోగలం. అందులో భాగంగా ఈరోజు మనం త్రిపురనేని గోపీచంద్ గారి ధర్మవడ్డీ అనే కథను చెప్పుకుందాం. అసమర్థుని జీవయాత్ర, పండిత పరమేశ్వరశాస్త్రి వీలునామా వంటి నవలలతో రచయితగా, తాతత్వికుడిగా తానెంత ఎత్తో నిరూపించుకున్నారు గోపీచంద్. అలానే భారతీయ, పాశ్చాత్య తత్త్వాల గురించి వారు రచించిన తత్త్వవేత్తలు పుస్తకం అయితే తెలుగులో తప్పక చదవాల్సిన పుస్తకాలలో ఒకటిగా ఎప్పటికీ నిలుస్తుంది. అటువంటి రచయిత రచించిన ఓ కథను ఈరోజు మనం చెప్పుకుందాం. కథ పేరు ధర్మవడ్డీ. వీడెంత కర్కోటకుడురా అనిపించే మనుషులు మనకు అప్పుడప్పుడూ తారసపడుతూనే ఉంటారు. మనకు తెలిసినా తెలియకపోయినా వారి కర్కోటకత్వం వెనుక ఏదో ఒక బలమైన కారణం కూడా ఉండే ఉంటుంది. అలా అని ఎవరూ ఆ కర్కశత్వాన్ని సమర్థించరు. అయితే అంతటి కర్కోటకుడు కూడా ఒకవేళ బలహీనపడితే అంతవరకూ అతనంటే భయపడ్డ బలహీనులు కూడా అతడిపై తమ ప్రతాపం చూపించడం మొదలుపెడతారు. అతడికంటే కర్కశంగా ప్రవర్తిస్తారు. ఎన్ని విధాల అతణ్ణి బాధపెట్టాలో అన్ని విధాలా బాధపెడతారు. అదంతా చూసేవాళ్ళలో చాలామంది కూడా అతగాడికి తగిన శాస్తి జరిగిందనే సంతోషిస్తారు తప్ప.. ఆ సమయంలో వారికి మానవత్వం గుర్తుకురాదు. ఒకప్పుడు అతడు మానవత్వం మరచిపోయి ప్రవర్తిస్తే అవకాశం చిక్కగానే వీళ్ళూ మానవత్వం మరచిపోతారు. అంటే ఇక్కడ మంచి చెడు అన్న విషయంలో తీర్పు చెప్పేపెద్దమనిషి ఎవరూ అంటే.. ఆ పెద్దమనిషి పేరు అవకాశం. అలానే మంచివాడు, చెడ్డవాడు ఈ ఇద్దరిలో ఎవరు బాధితుడూ అంటే.. ఆ ఇద్దరిలో ఎవరు బలహీనుడైతే అతనే బాధితుడు. ఈ విషయాలేవీ రచయిత నేరుగా మనకేమీ చెప్పడు. కేవలం కథ చెబుతాడంతే. గోపిచంద్ అనే కాదు ఏ గొప్ప రచయితైనా అంతే. ఆ కథలో అంతరార్థాన్నీ, రచయిత హృదయాన్నీ పట్టుకుంటేనే కానీ నిజానికి మనకు ఏ కథా పూర్తిగా అర్థం మైనట్టు కాదు. మనిషి నైజంపై గోపీచంద్ గారు పలికించిన భావనే, వేదనే ఈ ధర్మవడ్డీ కథ.
29 апр 2024