යක්‌කම් පහ නමින් හැඳින්වෙන පූජා විධිය ද කොහොඹා කංකාරියේ වැදගත් අවස්‌ථාවකි. වැදි යන්නට ඉන් පළමු වැන්නයි. වැද්දන් ගිවිස්‌සීමෙන් මෙය ආරම්භ වෙයි. කොට්‌ටෝරුවා වැද්දා ලෙසත් යක්‌දෙස්‌සා මලය රජු ලෙසත් රංගනයේ යෙදේ. වැද්දා පිරුවටයක්‌ ඇඳ රෙදි කැබැල්ලක්‌ කරේ දමාගෙන සිටියි. මලය රජු වැද්දා එලවාගෙන යන අයුරින් බිම ඵළා ඇති පැදුරක්‌ වටා දෙදෙනාම දිව යැම සිදුකරති. කඳ හරහට තැබූ වංගෙඩියක්‌ වටා වැද්දන් යක්‌දෙස්‌සාත් නැටීම සිදුකරති. වැද්දාට මල්මාලයක්‌ දමා වැද්දා සමාජගත කිරීම නිරූපණය කරයි. වැද්දා හූවක්‌ තබා සියල්ලන්ටම තම සන්තෝෂය ප්‍රකාශ කරයි. ආතුරයාට දොළොස්‌ වසරක්‌ ආරක්‍ෂාව ලැබෙන්න යෑයි ආශිර්වාද කර පැන දුවයි.
20 сен 2024
