💠 ධජග්ග සූත්රය සිංහල අර්ථය
මා විසින් මෙසේ අසනලදී. එක් කලෙක භාග්යවතුන් වහන්සේ සැවැත්නුවර සමීපයෙහිවූ අනේපිඬු සිටාණන් විසින් කරවන ලද ජේතවනාරාමයෙහි වැඩවසනසේක.
එකල්හි වනාහි භාග්යවතුන් වහන්සේ “මහණෙනි” යි භික්ෂූන් ඇමතූසේක. “ස්වාමීනී” යි කියා ඒ භික්ෂූහු භාග්යවතුන් වහන්සේට උත්තර දුන්හ.
භාග්යවතුන් වහන්සේ මෙසේ වදාළසේක. “මහණෙනි, පෙරවූදෙයක් කියමි. දෙවියන් හා අසුරයන් අතර මහත්වූ යුද්ධයක් විය. මහණෙනි, එවිට ශක්ර දේවේන්ද්ර තෙම තව්තිසා වැසි දෙවියන්ට (මෙසේ) කථාකර කීවේය: ‘ඉදින් පින්වතුනි, යුද්ධයට පැමිණි දෙවියන්ට බියක් හෝ තැතිගැන්මක් හෝ ලොමුදැහැගැන්මක් හෝ උපදින්නේනම්, එකල මාගේම කොඩිය බලව් මාගේ කොඩිය බලන්නාවූ තොපට වනාහි යම් බියක් හෝ තැතිගැනුමක් හෝ ලොමුදැහැගැනුමක් හෝ වන්නේ නම් එය නැතිවන්නේය.
“ ‘
ඉදින් මාගේ කොඩිය නොබලව් නම්, ප්රජාපති දේව රාජයාගේ කොඩිය බලව්. ප්රජාපති දෙව් රජුගේ කොඩිය බලන්නාවූ තොපට වූකලී යම් බියක් හෝ තැතිගැනුමක් හෝ ලොමුදැහැගැනුමක් හෝ වන්නේ නම් එය නැතිවන්නේය.
“
‘ඉදින් ප්රජාපති දෙව් රජුගේ කොඩිය නොබලන්නාහු නම්, වරුණ දෙව් රජුහුගේ කොඩිය බලව්. වරුණ දෙව් රජහුගේ කොඩිය බලන්නාවූ තොපට වූකලී යම් බියක් හෝ තැතිගැනුමක් හෝ ලොමුදැහැගැනුමක් හෝ වන්නේ නම් එය නැතිවන්නේය.
“
‘ඉදින් වරුණ දෙව් රජහුගේ කොඩිය නොබලව් නම් අනතුරුව ඊසාන දෙව් රජුහුගේ කොඩිය බලව්. ඊසාන දෙව් රජුහුගේ කොඩිය බලන තොපට වූකලී යම් බියක් හෝ තැතිගැනුමක් හෝ ලොමුදැහැගැනුමක් හෝ වන්නේද, එය නැතිවන්නේය.’
“මහණෙනි, ශක්ර දේවේන්ද්රයාගේ ඒ කොඩිය බලන්නවුන්ට හෝ ප්රජාපති දෙව් රජුගේ ඒ කොඩිය බලන්නවුන්ට හෝ වරුණ දෙව් රජහුගේ ඒ කොඩිය බලන්නවුන්ට හෝ ඊසාන දෙව් රජුගේ ඒ කොඩිය බලන්නවුන්ට හෝ යම් බියෙක් හෝ තැතිගැනුමෙක් හෝ ලොමුදැහැගැනුමෙක් හෝ වන්නේද, ඒ බිය ආදිය දුරුවන්නේ හෝ වෙයි, දුරු නොවන්නේ හෝ වෙයි. එයට කරුණු කිම? මහණෙනි, ශක්ර දේවේන්ද්රතෙම වනාහි පහනොවූ රාග ඇත්තේය. පහ නොවූ ද්වේෂ ඇත්තේය, පහ නොවූ මෝහ ඇත්තේය. බියවන ස්වභාව ඇත්තෙය. තැතිගන්නා ස්වභාව ඇත්තෙය, පලායන දුවන ස්වභාව ඇත්තෙය,
මහණෙනි, මමද තොපට මෙසේ කියමි: මහණෙනි, ඉදින් වනයට ගියාවූ හෝ මිනිසුන් නොගැවසෙන තැනට ගියාවූ හෝ තොපට බියෙක් හෝ තැතිගැනුමෙක් හෝ ලොමුඩැහැගැනුමෙක් හෝ උපදින්නේ නම් ඒ වේලායෙහි මා ම (මෙසේ) සිහිකරව් ‘ඒ භාග්යවතුන් වහන්සේ මේ කාරණයෙන් අරහත් වනසේක, සම්මා සම්බුද්ධ වනසේක, විජ්ජාචරණසම්පන්න වනසේක, සුගත වන සේක, ලෝකවිදූ වන සේක, අනුත්තර පුරිසධම්මසාරථී වනසේක, දෙවි මිනිසුන්ට ශාස්තෘ වනසේක, බුද්ධ වනසේක, භගවා
වනසේක’ (කියායි.) මහණෙනි, (මෙසේ) මා සිහි කරන තොපට යම් බියෙක් හෝ තැතිගැනුමෙක් හෝ ලොමුඩැහැගැනුමෙක් හෝ වන්නේද, එය නැතිවන්නේය.’
“ඉදින් තොපි මා සිහි නොකරන්නහුනම්, අනතුරුව ධර්මය (මෙසේ) සිහිකරව්.
“අනේ ඒකාන්තයෙන් ම මේ ධර්මය (ස්වාක්ඛාතෝ භගවතා ධම්මෝ) භාග්යවතුන් වහන්සේ විසින් මනාකොට වදාරණ ලද්දක් ම යි. (සන්දිට්ඨිකෝ) මේ ජිවිතයේදි ම යහපත කරා ගෙනියන එකක්. (අකාලිකෝ) ධර්මය පුරුදු පුහුණු කරන කෙනාට ඕනෑම කාලයක යහපත් විපාක ලබා දෙන දෙයක්. (ඒහිපස්සිකෝ) ඇවිත් බලන්න කියලා පෙන්වා දිය හැකි එකක්. (ඕපනයිකෝ) තමා තුළට පමුණුවා ගත යුතු එකක්. (පච්චත්තං වේදිතබ්බෝ විඤ්ඤූහි) නැණවත්හු තම නුවණින් ප්රත්යක්ෂ කරගත යුතු එකක්. මහණෙනි ඉදින් ධර්මය සිහිකරන තොපට යම් බියෙක් හෝ තැතිගැන්මෙක් හෝ ලොමුඩැහැගැන්මෙක් හෝ වන්නේද, එය නැතිවන්නේය.’
“ඉදින් තෙපි ධර්මය සිහි නොකරව් නම්, සංඝයා (මෙසේ) සිහි කරව්. (සුපටිපන්නෝ භගවතෝ සාවකසංඝෝ) භාග්යවතුන් වහන්සේගේ ශ්රාවක සංඝයා මනා පිළිවෙතින් යුක්තයි. (උජුපටිපන්නෝ) භාග්යවතුන් වහන්සේගේ ශ්රාවක සංඝයා සෘජු ප්රතිපදාවෙන් යුක්තයි. (ඤායපටිපන්නෝ) අවබෝධය ඇති කරන ප්රතිපදාවෙන් යුක්තයි. භාග්යවතුන් වහන්සේගේ ශ්රාවක සංඝයා (සාමීචපන්නෝ) යහපත් වූ ධර්මය කතා කරන ප්රතිපදාවෙන් යුක්තයි. යුගල වශයෙන් හතර දෙනෙක්, පුද්ගලයන් වශයෙන් අට දෙනෙක්. (ආහුනෙය්ය) දන් පැන් අරගෙන ගිහිල්ලා පූජා කරන්න සුදුසුයි. (පාහුනෙය්ය) ආගන්තුකව වැඩියොත් දන්පැන් පූජා කරන්න සුදුසුයි. (දක්ඛිණෙය්ය) පින් සලකාගෙන දන්පැන් පූජා කරන්න සුදුසුයි. (අංජලීකරණීය) වැඳුම් පිදුම් කරන්න සුදුසුයි. (අනුත්තරං පුඤ්ඤක්ඛෙත්තං ලෝකස්ස) ලෝකයට අනුත්තර පින් කෙතයි. මහණෙනි,
(මෙසේ) සංඝයා සිහිනරන තොපට යම් බියෙක් හෝ තැතිගැනුමෙක් හෝ ලොමුඩැහැගැනුමෙක් හෝ වන්නේද, එය නැතිවන්නේය.’
“එයට හේතු කුමක්ද ? මහණෙනි, තථාගතවූ, අර්හත්වූ, සම්මා සම්බුද්ධයන් වහන්සේ පහවූ රාග ඇතිසේක, පහවූ මෝහ ඇතිසේක, බිය නොවන ස්වභාව ඇතිසේක. තැති නොගන්නා ස්වභාව ඇතිසේක, පලායන ස්වභාව නැතිසේක (එහෙයිනි.) “
භාග්යවතුන් වහන්සේ මෙසේ වදාළ සේක. මෙසේ වදාරා සුගතවූ ශාස්තෘන් වහන්සේ නැවත එයම (මෙසේ) වදාළසේක.
“මහණෙනි, වන සෙනසුනක හෝ වෘක්ෂමූල සෙනසුනක හෝ මිනිසුන් නොගවසෙන තැනක හෝ සම්මා සම්බුදුන් සිහි කරව්. තොපට භයක් නොවන්නේය.
“ඉදින්, ලෝකයට ජ්යෙෂ්ඨවූ, නරශ්රේෂ්ඨවූ බුදුන් සිහි නොකරන්නහු නම්, එවිට නිවණට පමුණුවන්නාවූ, යහපත්කොට දේශනා කරන ලද්දාවූ, ධර්මය සිහි කරව්.
“නිවණට පමුණුවන්නාවූ, හොඳින් දේශනා කරන ලද්දාවූ, ධර්මය ඉදින් සිහි නොකරන්නහු නම්, එවිට පින් කෙතවූ, ඉතා උතුම්වූ සංඝයා සිහි කරව්.
“මහණෙනි, යම්සේ බුදුන්ද, ධර්මයද, සංඝයාද සිහි කරන්නාවූ තොපට භයෙක් හෝ තැතිගැනීමෙක් හෝ ලොමුඩැහැගැනුමක් හෝ නොවන්නේ
සමිපුර්ණ දේශනාව 👇👇👇
• බියක්, තැතිගැන්ම ඇතිවු...
මේ වැනි ධර්ම දේශනා වලට සවන් දිමට මෙම (Sermons of Sathya Dharma | සත්තිය ධර්ම දේශනා) නාලිකාව දැන්ම SUBSCRIBE කර බෙල් සලකුණ ක්ලික් කරන්න. ඔබ සැමට තෙරුවන් සරණයි !!!
5 сен 2024