සම්බුදු තෙමගුල සිහිකරමින් දිවයින පුරා වෙසක් තොරණ, පහන් කූඩු, දන්සැල් ඇතුළු විශේෂාංග රැසක් සංවිධාන කර තිබෙනවා. තොරණ, පහන්කූඩු නැරඹීමට ඊයේ දිනයේ විශාල පිරිසක් පැමිණ සිටියා.
තොටලග තොරණ, නාගලගම් වීදිය පොදු වෙළඳ සංකීර්ණය අසළදී මෙවර පැවැත්වෙන්නේ, 68 වැනි වරටයි. තොටලග ශ්‍රී වෛශාලෝක සමිතිය සංවිධාන කරන තොරණින් මෙවර මහා සුපින ජාතකය නිරූපිතයි.
දෙමටගොඩ තොරණ මෙවරත් දෙමටගොඩ පොදු වෙළඳ සංකීර්ණ පරිශ්‍රයේදී ප්‍රදර්ශනය කෙරෙනවා. එය සංවිධාන කර ඇත්තේ, 46 වැනි වරටයි. යශෝධරා චරිතා ප්‍රදානය නිරූපිත තොරණේ මූලිකත්වය දරන්නේ, දෙමටගොඩ එක්සත් වෙ‍ළඳුන්ගේ වෛශාක්‍යදාන සමිතියයි.
කිරිබත්ගොඩ තොරණ 22 වැනි වරටත්, එම බස් නැවතුම්පොළ අසළදී පැවැත්වෙනවා. පරාභව සූත්‍ර දේශනාව ඉන් මෙවර නිරූපිතයි. තොරණ සංවිධාන කරනු ලබන්නේ, කිරිබත්ගොඩ සිංහල වෙළඳ සංගමය විසින්.
කැලණිය, බුලුගහ හන්දිය තරුණ කැල සංවිධාන කළ බත් දන්සැලක් කැලණිය ප්‍රාදේශීය සභාව ඉදිරිපිටදී ඊයේ දවස පුරා පැවැත්වුණා.
12 වැනි වරට සංවිධාන කෙරුණු මහර වෙසක් කලාපය, ඇල්දෙණිය, සුවත උයන පරිශ්‍රයේදී දැක ගත හැකියි. වෙසක් පහන් කූඩු, භක්ති ගීත, ජල තොරණ, ශ්‍රීපාද අනුරුව, ඇතුළු විශේෂාංග රැසක් මීට ඇතුළත්. මහර වෙසක් කලාපය, සංවිධාන කරන්නේ, ලසන්ත අලගියවන්න පදනමයි.
"සමස්ත ලංකා බෞද්ධ මහා සම්මේලනය" බෞද්ධා‍ලෝක මාවත වෙසක් කලාපය මෙවරත් සංවිධාන කළා. තොරණ, වෙසක් පහන් කූඩු, දන් සැල් සහ විවිත්‍රවත් සැරසිලි අංග රැසක් මීට ඇතුළත්. සිවිල් ආරක්‍ෂකදෙපාර්තමේන්තුව සංවිධාන කළ භක්ති ගීත සන්දර්ශනයක් ද පැවැත්වුණා.
කොළඹ - වැලිකඩ බන්ධනාගාරය අසල ද වෙසක් කලාපයක් දැක ගත හැකියි. දිවයිනේ, බන්ධනාගාරවලින් නිර්මාණය කරන ලද වෙසක් පහන් කූඩු රැසක් මීට එක් කර තිබෙනවා.
කජුගම ප්‍රදේශවාසීන් සිය වෙසක් බත් දන්සැල මෙවර 88 වැනි වරටත් සංවිධාන කළා.
බණ්ඩාරගම, මහබෙල්ලන විජය ක්‍රීඩා සමාජය ප්‍රථම වරට ඉදිරිපත් කරන වෙසක් පහන් කූඩුව මහබෙල්ලන තොටුපොළ අසළ ප්‍රදර්ශනය කෙරෙනවා.
බණ්ඩාරගම, රඹුක්න ප්‍රදේශයේ ව්‍යාපාරික ස්ථානයකදී පරාටා දන්සැලක් පැවැත්වුණා.
බණ්ඩාරගම, පානදුර පාර එක්සත් ත්‍රීරෝද රථ සංගමය ව්‍යාපාරිකයින්ගේ සහයෝගයෙන් සංවිධාන කළ බත් දන්සැල ඊයේ පැවැත්වුණා. ඒ, බණ්ඩාරගම, පානදුර මාර්ගයේදී.
හිඟුරක්ගොඩ, කැදැල්ල තරුණ සංවිධානය ප්‍රථම වරට සංවිධානය කළ සවු දන්සැල ඊයේ පැවැත්වුණා.
ගම්පොල නගරයේ චක්කින්දාරාම විහාරය ආශ්‍රිතව දින 3 ක් පුරා වෙසක් කලාපයක් පැවැත්වෙනවා.
පානදුර පුනර්ජීවනය නගරය කේන්ද්‍ර කර ගනිමින් නන්දිය දේව්පුත් කතා වස්තුව රැගත් දර්ශනීය තොරණක් ප්‍රදර්ශනය කෙරෙනවා. එය තවත් දින 6 ක් පුරා ප්‍රදර්ශනය කිරීමට නියමිතයි.
පානදුර එක්සත් පොදු වෙළඳ සංගමය සිය වෙසක් තොරණ මෙවර ඉදිරිපත් කරන්නේ, 65 වැනි වරටයි.
මාදිවෙල ප්‍රගතිපුර තරුණ කැල සංවිධාන කළ බත් දන්සැල ද ඊයේ පැවැත්වුණා.
රාජගිරිය, ජාතික ආධුනිකත්ව සහ කාර්මික පුහුණු කිරීමේ අදිකාරිය වාර්ෂිකව සංවිධාන කරන භක්ති ගීත ප්‍රසංගය සහ කහ බත් දන්සැල ඊයේ පැවැත් වුණා.
ඒ, රාජගිරිය ජාතික ආධුනිකත්ව සහ කාර්මික පුහුණු කිරීමේ අධිකාරිය පරිශ්‍රයේදී.
මහනුවර, අස්ගිරි පිරිවෙ‍ණ භූමියේ සුභා තෙරණීන් වහන්සේගේ කතා වස්තුව රැගත් තොරණක් දැක ගත හැකියි.
මල්වතු මහා විහාරයේ තරුණ භික්ෂු පර්ෂදය එකමුතුවෙන් මෙවරත් සංවිධාන කළ කඩල දන්සැල ඊයේ පැවැත්වුණා.
වෙසක් උත්සවයට සමගාමීව පිළියන්දල අධ්‍යාපන කාර්යාලය ඊයේ බැති ගී සරණියක් සහ පහන් කූඩු ප්‍රදර්ශනයක් පැවැත්වුවා.
වස විස ආහාරවලින් තොර වූ සමාජයක් බිහි කරමු තේමාවෙන් මොණරාගල දිස්ත්‍රික් ලේකම් කාර්යාලය වෙසක් කලාපයක් නිර්මාණය කර තිබෙනවා.
හිටපු ජනාධිපති මහින්ද රාජපක්ෂ මහතා ගේ, නිල නිවස ඉදිරිපිටදී අද කඩල දන්සැලක් පැවැත්වුණා.
ගිරිඋල්ල එක්සත් තොරන් කමිටුව සංවිධාන කරන වෙසක් කලාපය ගිරිඋල්ල පොළ භුමියේදී ඊයේ ආරම්භ වුණා. එය විවෘත කෙරුණේ, මැද්දේපොළ රාජමහා විහාරාධිපති පූජ්‍ය මිරිහානේ ධම්මපාල හිමියන්ගේ සහභාගීත්වයෙන්. වෙසක් කලාපය මෙවර පැවැත්වෙන්නේ, 16 වැනි වරටයි. සුජාතා ජාතක කතා වස්තුව විදහා දැක්වෙන තොරණක්, ශ්‍රී පාද අනරුවක් ඇතුළු වෙසක් නිර්මාණ රැසක් මීට ඇතුළත්. වෙසක් කලාපය, ලබන 14 වැනිදා දක්වා පැවැත්වෙන බව, තොරණ් කමිටුවේ සභාපති දුමින්ද ශාමල් මහතා සඳහන් කළා.
හෝමාගම හිරිපිටිය කරඳගහවත්ත තරුණ කැල 4 වැනි වරට සංවිධාන කරන වෙසක් පහන් කූඩුව 13 වැනි දා දක්වා ප්‍රදර්ශනය කෙරෙනවා. නලපහන ජාතකය විදහා දැක්වෙන මෙය, පරිවාර කූඩු 77 කින් සමන්විතයි. බිලිං කොළ ලක්ෂ 3 ක් යොදා ගනිමින් මෙම නිර්මාණය සිදු කර තිබෙනවා.
අගරදගුරු අතිඋතුම් මැල්කම් කාදිනල් රංජිත් හිමිපාණන්ගේ ප්‍රධානත්වයෙන් වෙසක් අසිරිය විදගන්නට පැමිණි පිරිස් වෙත පාන් සහ සිසිල් පැන් බෙදාදීමක් ඊයේ සිදු කෙරුණා. ඒ, අගරදගුරු නිල නිවස අසළ කතෝලික මුද්‍රණාලය ඉදිරිපිටදී.
Follow on:
Official website - www.rupavahini.lk
Official RU-vid Channel - www.rupavahini.lk/youtube
5 май 2023
